Акафист священномученикам Василию, Ефрему, Евгению, Елпидию, Агафодору, Еферию и Капитону, в Херсоне епископствовавшим

Акафист священномученикам Василию, Ефрему, Евгению, Елпидию, Агафодору, Еферию и Капитону, в Херсоне епископствовавшим
Кондак 1

Избранные угодницы Божии, святители и мученики Христовы – Василий, Ефрем, Евгений, Елпидий, Агафодор, Еферий и Капитон, в Херсоне епископствовавшие, всю страну нашу учением своим просветившие и землю нашу кровью вашей осветившие, яко имущии дерзновение ко Господу предстательством и молитвами вашими у Престола Божия, от всяких нас бед свободите и петь вам научите:

Радуйтеся, Священные Отцы, за Христа кровь свою излившие.

Икос 1

Ангелы земные и человеки небесные, Священномученики седмочисленные, Престолу Небесного Царя и Владыки вселенной предстоящие и нас грешных на земле сущих наставляющие, услышите молитвы наши с похвалами от всей души к вам возносимые:

Радуйтеся, заступники наши и предстатели у Господа Бога предобрые;

радуйтеся, первозванному Апостолу Андрею ревностные подражатели.

Радуйтеся, по стопам его, освятившим область нашу, шедшие;

радуйтеся и венцы мученические, якоже он, стяжавшие.

Радуйтеся, безбоязненные веры Христовой проповедницы;

радуйтеся, мужественные истинного учения исповедницы.

Радуйтеся, за проповедание веры и жизни своей не пощадившие;

радуйтеся, души свои за имя Христово положившие.

Радуйтеся, во глубины сатанинские дерзновенно прийти возревновавшие;

радуйтеся, мрак языческого многобожия в земле нашей рассеявшие.

Радуйтеся, от Солнца правды лучами все концы ее озарившие;

радуйтеся, и ныне нам благодатным светом своим светящие.

Радуйтеся, Священные Отцы, за Христа кровь свою излившие!

Кондак 2

Видяще многобожное мучительство идолопоклонства в земле нашей, души человеческие, по Образу Божию бывшие, во образ демонский претворявшее, возревновали есте, Отцы Святые, о спасении люте погибавших, и вся красная мира отвергше, бодрено приидосте научити их единому истинному Богу петь: Аллилуйя!

Икос 2

Разум совершен стяжавшее, идеже возсия мирови свет разума, наченше от Иерусалима, по слову Христову, изыдосте, Богомудрые учители наши, с вещанием и глаголами жизни вечной во всю землю, да просветите во тьме и сени смертной сидящих, и петь всех похвальные песни вам научите:

Радуйтеся, великие таинники благодатного учения небесного;

радуйтеся, сосуды избранные, в них же хранятся глаголы живота вечного.

Радуйтеся, умы, светом евангельским просвещенные;

радуйтеся, и сердца ваша истинным ведением исполнившие.

Радуйтеся, совершенные человеки Божии, на всякое дело благое уготованные;

радуйтеся, великие дела Христовы в земле нашей богомудро совершившие.

Радуйтеся, Святые Отцы Церкви Христовой, словом и делом сиявшие;

радуйтеся, столпы Божественной Церкви и православия непоколебимые.

Радуйтеся, зверообразных мучителей ваших неустрашившиеся;

радуйтеся, бесчисленные раны и поношения с терпением от них приявшие.

Радуйтеся, яко души своя, не за други токмо, но и за враги своя положили есте;

радуйтеся, яко веру Христову в воздаяние мучителям своим даровали есте.

Радуйтеся, Священные Отцы, за Христа кровь свою излившие.

Кондак 3

Сила Вышнего осени вас, Богомудрые Святители и мученицы Христовы, и благоплодное делание ваше во мраке идолослужения ходящим яко село сладкое, озаренное Солнцем правды, показала есть, да все хотящие на ниве вами возделанной жати спасение радостно воспевают Богу Спасителю нашему: Аллилуйя!

Икос 3

Имуще в душах и сердцах своих святую ревность о славе Божией, двоица от седмичисленных Святителей – Василий Богомудрый и Ефрем славный первее вкупе трудистася, возвещающее многобожникам Единого Истинного Бога; также Ефрем – многоплодный идее с проповедью Евангелия ко Скифам, жившим по Дунаю, идеже, многих обратив ко Христу, усечен бысть мечем. Василий же, Царское священие, возвещая учение Христово Херсонитом и обличая заблуждения неверных, возбуди против себя гнев неверных, верных же научи воспевати таковая:

Радуйтеся, неустрашимые воины Христовы, враги Божии победившие;

радуйтеся, яко в броню правды одеявшиеся, пребысте непобедимы.

Радуйтеся, обувшие ноги свои во благовествование мира, и вспять невозвратившиеся;

радуйтеся, шлем спасения восприявшие и всех жаждущих спасения от него напоившие.

Радуйтеся, глаголом Божиим, аки мечем духовным, плевелы лжи посекшие;

радуйтеся; яко вещания ваша, Богомудрые, не осташася тщетными.

Радуйтеся, Святители Божии – истинные, душ своих за овец словесных не пощадившие;

радуйтеся, мученицы Божии, венцы нетленные, уготованные вам приимшие.

Радуйтеся, подвигом добрым подвизавшиеся до скончания жительства вашего;

радуйтеся, и нам грешным образ подражания в себе явившие.

Радуйтеся, научающие нас последовать вашей вере, терпению и страданию;

радуйтеся, явившиесяв земле нашей, да засвидетельствутете Божественную истину кровью вашей.

Радуйтеся, Священные Отцы, за Христа кровь свою излившие.

Кондак 4

Бурю ярости и гнева воздвигоша на блаженного Василия жители Херсонеса Таврического; претерпев же биения, мучения и изгнание из града их, Святитель Божий водворися в пещере близ лежащей горы Парфенон, идеже радуяся, яко прият за Христа биения и раны, и сетуя о мучителях, со слезами молился об обращении их к Богу, да поют Ему: Аллилуйя!

Икос 4

Слышавше люди, изгнавшие просветителя своего из града, яко молитвами его воскресил есть Бог умершего сына единого от них некоего знаменита, объятии быша ужасом и радостью, исповедаша Бога истинного и введоша Святого Василия паки во град свой с велиею честью, нас же научиша воспевати угодникам Божиим похвалы сицевые:

Радуйтеся, в терпении многом стяжавшие души ваша;

радуйтеся, яко, претерпевшие до конца, и сами спасостеся и послушающих вас введосте во спасение.

Радуйтеся, правду, мир и радость о Духе Святе стяжавшие;

радуйтеся, милосердием и любовью к ближним своим исполненные.

Радуйтеся, нищету духовную, терпение скорбей и лишений богатно имевшие;

радуйтеся, яко незлобивые агнцы, Божественному Агнцу-Христу подражавшие.

Радуйтеся, приемшие от Бога благодать скорби и болезни в радость претворять;

радуйтеся, любовью вашей самых жестоких и зверонравных врагов в кротких агнцев обращавшие.

Радуйтеся, плач пред Богом и умиление блаженное обретшие;

радуйтеся, кротостью и смирением Христу Спасителю уподобившиеся.

Радуйтеся, смирением своим высокие, нищетой же богатые явившии;

радуйтеся, дела ваши христоподражательные всем зрящим показавшие.

Радуйтеся, Священные Отцы, за Христа кровь свою излившие!

Кондак 5

Боготечной звезде яве уподобился Богомудрый Василий егда чудом воскрешения отрока озари град Херсонес и окрестные его, и там живших ко Христу приведе. Аще же по сем нечестивые, по научению злых жидовин, извлекше его из дома, связанного влачиша по стогнам града, биша и мучиша: обаче святый, и под жестокими ударами их молился о них, и так предаде душу свою Богу, с похвальной песней: Аллилуйя!

Икос 5

Видяще мученическую кончину славного Ефрема и всехвального Василия, пострадавших за проповедь Евангельскую в стране Тавроменийстей, Святители Христовы – Евгений Божественный, Елпидий мудрый и Агафодор Богомудрый, в опасении, да не разорится там дело святого Василия злоумышлением жидовским, не убояшася из страны Геллеспонтской идти в землю нашу, продолжения ради благовестия Христова. Жители Херсонеса с радостью прияша новых просветителей страны их, поучаше их с любовью взывати к ним:

Радуйтеся, верные слуги Христовы и искренние други Божии:

радуйтеся, ревнители православия усердные и идольского мракобесия искоренители премудрые.

Радуйтеся, за истинную веру Христову живота своего не щадившие;

радуйтеся, любовью к Богу и ближним предивно воспламененные.

Радуйтеся, Апостольское великое служение подвигами своими восполнявшие;

радуйтеся, стадо Христово, кровью Его искупленное, умножившие.

Радуйтеся, радостно на смерть за Христово учение шедшие;

радуйтеся, бесовское гнездо безбоязненно силой Христова имени разорявшие.

Радуйтеся, кумирницы демонские и мнимые их чтилища нещадно сокрушавшие;

радуйтеся, самого исконного врага Божия и человеческого горце уязвлявшие.

Радуйтеся, христиан правоверных сладостное утешение;

радуйтеся, ожесточенных гонителей веры Христовой грозное устрашение.

Радуйтеся, Священные Отцы, за Христа кровь свою излившие.

Кондак 6

Проповедницы Богоносные, подвигом добрым подвизавшиеся, веру бодрее соблюдшие и течение свое добре скончавшие, за страдания вами мужественно претерпенные, соблюдеся вам от Подвигоположника нашего – Господа Иисуса Христа – венец правды. Темже усердно поучающиеся в ваших деяниях, с любовью поминаем вас – наставников наших, и тщащееся подражати вере вашей, смиренно вопием Богу: Аллилуйя!

Икос 6

Воссиял свет веры Христовой в стране нашей, яко полудний, егда пяточисленные Святители наши души свои положили за свидетельство в ней истины Евангельской, воссиял нам и новый светильник Божий от Сиона – Еферий священнейший, егда воцарился великий Константин, покровительством христианству стяжавший себе имя равноапостольного. Видевше же люди, яко новый святитель был равночестен предним возопиша к ним:

Радуйтеся, Святители Божии, Апостолом единонравние;

радуйтеся, Отцы наши Богомудрые.

Радуйтеся, учители Церкви всечестные;

радуйтеся, вселенским учителям сопрестольные.

Радуйтеся, священномученики преславные;

радуйтеся, пастыри наши предобрые.

Радуйтеся, милосердные наши просветители;

радуйтеся, любвеобильные наши наставники.

Радуйтеся, изгнание правды ради претерпевшие;

радуйтеся, раны, муки и болезни за спасение наше на себе понесшие.

Радуйтеся неверие и суеверие победившие;

радуйтеся, адскую силу и мрак греховный от нас отгнавшие.

Радуйтеся, Священные Отцы, за Христа кровь свою излившие.

Кондак 7

Хотяй мирно пасти овец Церкви Херсонской, и право править в ней слово истины, Святой Еферий двукратно хождаше в Царьград к царю Константину: первее испросить помощи на разорение твердыням языческим и заступление христиан от гонения, второе же – благодарить царя за явленный покров к устроению паствы Херсонской. Егда же возвращашеся от Царьграда к пастве своей, разболелся к смерти, пристал к малому острову Аосу, идеже и предаде святую душу свою в руки Божии, c песнью: Аллилуйя!

Икос 7

Нового Святителя даровала Церковь Восточная Церкви Херсонской – Капитона всеславного, егоже с великой радостью прияша не только люди правоверные, но и неверные; наипаче же, егда пред всеми сотвори чудо великое, невредимо пребыв в огне, и на ризе своей изнес из пламени угли горящие, но не сжигающие. Известившеся о сем чуде, царь и Святые Отцы первого собора вселенского прославили Бога и великое дарование Епископа Капитона, людие же видевшие его возопили к своим Святителям:

Радуйтеся, великие наши и преславные чудотворцы;

радуйтеся, имущие веру ничем непоколебимую.

Радуйтеся, дерзновенным исповеданием веры Христовой всех удивившие;

радуйтеся, мужественным страданием за веру Христову всех неверных посрамившие.

Радуйтеся, догматы веры православной уяснившие;

радуйтеся, правило веры и образ кротости стаду вашему показавшие.

Радуйтеся, Отцы наши всечестные и лики богокрасные;

радуйтеся, на путь правый всех нас наставившие;

радуйтеся, к любви горней души наши уязвившие.

Радуйтеся, яко вами направляемы получаем от Христа Бога велию милость;

радуйтеся, яко вами покрываемы в вечные кровы вводимся.

Радуйтеся, Святые отцы, за Христа кровь свою излившие.

Кондак 8

Странно было видеть, егда корабль, на нем же Капитон Святой идяше по нуждам Церкви своей в Царьград, от Херсонеса Таврического, схвачен был бурей великой и принесен ко устьям Днепра – к нынешнему Херсону, идеже неверные люди корабль разграбили, всех бывших на нем умертвиша, а епископа в водах утопиша, верни же со слезами и рыданием Боги вопияху: Аллилуйя!

Икос 8

Вси вы, Святители Христовы, ныне в вышних пребываете, но и нас низших не оставляете вашими молитвами и предстательством у Царя славы и Господа Бога нашего. Сего ради, недоумеюще благохвалити вас по достоянию, со умилением сердца, из глубины души, взываем к вам:

Радуйтеся, вере правой нас научающие;

радуйтеся, надежду известную нам подавающие.

Радуйтеся, любовь нелицемерную в нас воспламеняющие;

радуйтеся, кротость и смирение в себе нам показующие.

Радуйтеся, терпением и мужеством души наша украшающие;

радуйтеся, нас алчущих и жаждущих правды насыщающие.

Радуйтеся, сердца наша, очищающие;

радуйтеся, очи наши духовные к зрению Бога изощряющие.

Радуйтеся, вражды и ссоры наши умиротворяющие;

радуйтеся, всякий мрак заблуждения от нас прогоняющие.

Радуйтеся, к терпению бед, лишений и скорбей нас воодушевляющие;

радуйтеся, в пренесении испытаний и гонений нас укрепляющие.

Радуйтеся, Священные Отцы, за Христа крвовь свою излившие!

Кондак 9

Вси лицы Ангельские, зрящее подвиги ваша, Святые Священномученики, по вере Христовой подъятые, радостью велией радовахуся, вы же по страдании своем на земле, вошедшее в славу Божию на небеси, и сами исполнилися есте радостью неизглаголанною. Тем же, водворившиеся в небесных обителях, вкупе со Архангелы и Ангелы, присно воспеваете Богу: Аллилуйя!

Икос 9

Витии многовещанные, аще бы и многи языки имели и глаголати восхотели, не возмогут исчести ваших трудов и воздыханий, скорбей и лишений, гонений и страданий, яже имели есте, учащее и проповедующее, настоящее благовременне и безвременне, умоляюще и запрещающее, обличающее и увещавающе люди непокоривые, за добро злом воздающие. Мы же, дивящееся подвигом вашим, умиленно взываем к вам:

Радуйтеся, трудами вашими нас ленивых к доброделанию возбуждающие;

радуйтеся, воздыханиями вашими нас унылых к молитве окрыляющие;

радуйтеся, скорбями вашими нас малодушных в пренесении скорбей утверждающие.

Радуйтеся, гонениями, вами претерпенными, нас слабых укрепляющие;

радуйтеся, лишениями вашими нас нетерпеливых к воздержанию подвизающие.

Радуйтеся, страданиями вашими нас боязливых ободряющие;

радуйтеся, учением и проповедью вашей нас темных просвещающие.

Радуйтеся, наставлением вашим благовременным и безвременным нас нерадивых ко стыду приводящие.

Радуйтеся, умолением вашим по Христе нас беспечных безответными творящие;

радуйтеся, прещением вашим нас бесстрашных устрашающие.

Радуйтеся, обличением вашим нас непослушных посрамляющие;

радуйтеся, увещанием вашим нас противляющихся к Богу приводящие.

Радуйтеся, Священные Отцы, за Христа кровь свою излившие!

Кондак 10

Спасти хотя страну нашу, иже всем хотящий спастися и в разум истины прийти, всемилостивый Господь и Бог наш, избрал и послал вас к нам, Святители Христовы, да ясно укажете всем здесь живущим и хотящим спастись пути спасения, и всех научите петь Богу: Аллилуйя!

Икос 10

Стена крепка и непоколебима есть, угодницы Божии, нам влающимся и обуреваемым в море житейстем, да выну зря море сие, воздвизаемое напастей бурею, к тихому пристанищу, ходатайству и заступлению вашему грешнии прибегаем, и из глубины души с любовью вопием к вам:

Радуйтеся, поборницы веры Христовой непоколебимые;

радуйтеся, покровители наши некрыющиеся от нашего притекания.

Радуйтеся, светильницы, во тьме греховной нам блудящим светящие;

радуйтеся, кормчие, по водам плавающих управляющие.

Радуйтеся, от потопления в водах зельных нас спасающие;

радуйтеся, ко пристани благонадежной всегда нас приводящие.

Радуйтеся, обуреваемых и бедствующих в море надеждой овеселяющие;

радуйтеся, в плавании страждущих морской болезнью оздравляющие.

Радуйтеся, сланое море страстей наших иссушающие;

радуйтеся, гнездящиеся в нас гады малые и велики убивающие.

Радуйтеся, от грехопадений наших, им же несть числа, избавляющие;

радуйтеся, миром и любовью к добру души наши снабдевающие.

Радуйтеся, Священные Отцы, за Христа кровь свою излившие!

Кондак 11

Пение всеумиленное приносим вам, Святители Христовы, с небес на мольбы наши благосердно призирающие, всем нам усердно вас призывающим помогающие, и всех почитающих вы по достоянию спасающие. Тем же молим вас – великих и усердных благопоспешников – научите нас немощных воспевати присно Богу: Аллилуйя!

Икос 11

Светильницы Божии, благодатью Святого Духа возженные, не под спудом и одром положенные, но на свещнице небесном поставленные, и тако присно пред престолом Божиим горящие, всему же миру и нам грешным на земле сущим светящие, да видящее добрые дела ваши, прославляем прославившего вас Господа славы, и к вам от всего сердца вопием:

Радуйтеся, светом вашим нашу тьму греховную разгоняющие;

радуйтеся, теплотою любви вашей наши хладные сердца согревающие.

Радуйтеся, облаком благодати Божией, данной вам, от зноя житейского нас покрывающие:

радуйтеся, палимые зноем страстей души наши прохлаждающие.

Радуйтеся, молитвами вашими на нивы наши дожди благовременно посылающие;

радуйтеся, все наслаждения наши, во утешение и наслаждение наше, орошающие.

Радуйтеся, плодами земными, веселящими нас, души наши оплодотворяющие;

радуйтесь, зверей и птиц, вреждающих полям и вертоградам нашим, отгоняющие.

Радуйтеся трудолюбивых земледельцев, плодами земными награждающие;

радуйтеся, трудящихся во спасение дарами небесными исполняющие.

Радуйтеся, в пот лица хлеб свой снедающих, тайно увеселяющие;

радуйтеся, аще ядущих, аще пьющих, аще ли ино что творящих в славу Божию, всех явно утешающие.

Радуйтеся, Священные Отцы, за Христа кровь свою излившие!

Кондак 12

Благодать от Бога данная вам, угодницы Божии и страстотерпцы Христовы, веруем, яко неистощима есть и николиже иждиваема. Сего ради, с несомненной надеждой к вам, яко приснотекущим и независтным источникам притекаем; почерпающее же от вас воду живую, утоляющую нашу жажду духовную, вся наши нечистоты омывающую и наши горести житейские услаждающую, Богу, спасающему нас вами, с любовью вопием: Аллилуйя!

Икос 12

Поюще ваши подвиги и страдания, блаженную кончину и водворение со святыми в небесных обителях, восхваляем ваши добрые дела, ими же угодили есте Господу Богу, им же и нас научите, молимся, да прославляем Отца нашего небесного купно с вами, да видят доброе житие наше заблуждающиеся братья наши, от нас исшедшие, но не бывшие от нас, и вразумляются, яко ходим во свете, они же в обольстительной лжи пребывают, да негли купно с нами возопиют когда к вам:

Радуйтеся, за Христа на земле страдавшие и со Христом на небеси царствующие;

радуйтеся, с высоты небесной милостивно на нас недостойных призирающие.

Радуйтеся, похвалы наши, аще и недостойные вас, благосердно приемлющие;

радуйтеся, молитвам нашим, аще и немощным, с любовью внемлющие.

Радуйтеся, от всей души и сердца возносимые к вам прошения наши исполняющие;

радуйтеся во всех нуждах, бедах и обстояниях нам помогающие.

Радуйтеся, безвестные и тайные премудрости Божии нам открывающие;

радуйтеся, благие мысли и чувства в недоумении нам сущим внушающие.

Радуйтеся, святые желания и намерения ко спасению нашему в сердца нам влагающие;

радуйтеся, добрыми плодами веры, надежды и любви души наши исполняющие.

Радуйтеся, в час кончины вас на помощь призывающим предстательствующие;

радуйтеся, по кончине нашей, с любовью души наши в свое общение пред Богом приемлющие.

Радуйтеся, Священные Отцы, за Христа кровь свою излившие!

Кондак 13

О, всеблаженные угодницы Божии, Святители Христовы и страстотерпцы Василий, Ефрем, Евгений, Елпидий, Агафодор, Ефеорий и Капитон, услышите моления наша и благохваления к вам возносимые, призрите на вся наша нужды – душевные и телесные, помогите нам странствующим в море житейском и далече отстоящим от вас, возвышайте наши мысли, чувства, желания и намерения от земного к небесному, да безбедно прешедше сланное страстей море и минувшее без боязни тени смертные, преселимся радостно во страну живых. Идеже представшее пред лице Бога вечного, выну поем с вами: Аллилуйя!

Этот кондак читается трижды, затем икос 1 и кондак 1
Новые молитвы

Молитвы от коронавируса

Ознакомиться

Молитвы о самоубийцах

Ознакомиться

Молитвы за скончавшихся вне своего Отечества, за безродных и убогих

Ознакомиться

Молитвы за наставников и воспитателей

Ознакомиться

Молитвы за всякого усопшего

Ознакомиться