Акафист преподобному Ферапонту Можайскому

Акафист преподобному Ферапонту Можайскому

Кондак 1

Возбранному Воеводе и Господу Иисусу последствуя, молитвою, постом и труды плотския страсти победил еси: темже, яко добр воин, увенчался еси от Царя Христа, Егоже не престай тепле молити о нас, рабех твоих, преподобне, да тобою избавльшеся от бед, присно поем ти:

Радуйся, Ферапонте, угодниче Христов и чудотворче.

Икос 1

От младенчества твоего и даже до престарения телом и душею работал еси Господу Иисусу Христу и Пречистей Его Матери, и се ныне душа твоя ликовствует в Его Небесных обителех, тело же твое, зде почивая, сияет чудесы; сего ради вопием ти радостно:

Радуйся, во след Христа неуклонно шедый.

Радуйся, слово Его соблюдавый твердо.

Радуйся, во славу Христа Бога подвизавыйся.

Радуйся, Пречистую Христа Матерь неумолчно славивый.

Радуйся, от Христа и от Матери Его прославленный.

Радуйся, имый дерзновение велие ко Христу.

Радуйся, защитниче обители Лужецкия.

Радуйся, хранителю земли Можайския.

Радуйся, поборниче крепкий за державу Российскую.

Радуйся, добропобедный воине Православныя Церкве.

Радуйся, всем призывающим тя подающий скорую помощь от Христа Бога.

Радуйся, Ферапонте, угодниче Христов и чудотворче.

Кондак 2

Пребывая в житейстей молве, не усладился еси благими, ниже опечалился еси злыми мира сего, но, взирая к почести вышняго звания, под бременем мирских сует памятствовал еси всегда пети Богу: Аллилуиа.

Икос 2

Усердно совершая дела мирскаго служения твоего, преподобне, едино точию имел еси в сердце твоем: да не осужден предстанеши на Страшнем Судищи Господа Славы; и ныне, благочестно к тому себе предуготовав, слышиши от всех:

Радуйся, ум свой вперивый в горняя.

Радуйся, от мира тленнаго к нетленному очи возведый.

Радуйся, паче земных благ возлюбивый нищету духовную.

Радуйся, в печали о гресех снискавый себе утешение.

Радуйся, кротостию благоукрасивыйся.

Радуйся, взалкавый праведности пред Богом.

Радуйся, согрешающим благоснисходительный.

Радуйся, страждущим сострадавый тепле.

Радуйся, ко всем благоприветливый.

Радуйся, всем ведущим тя прелюбезный.

Радуйся, милостыни подававый щедро.

Радуйся, Ферапонте, угодниче Христов и чудотворче.

Кондак 3

Да не злоба изменит твоего благаго разума, тайно от присных твоих отшел еси во святую обитель блаженнаго Феодора, да тамо, свободь мирских сует, воспоеши Богу: Аллилуиа.

Икос 3

От Бога наученный о тебе, блаженный Феодор уразуме тя уже искушенна в посте и молитве, радостно прият тя во обитель свою, и в день пришествия твоего к нему облече тя в чин иноческий, со всеми сподвижники своими вопия тебе:

Радуйся, вся красная мира презревый.

Радуйся, от мира льстиваго излетевый, яко птица от сети.

Радуйся, паче Богу, нежели человеком, работати избравый.

Радуйся, иночество ради добраго Богу делания приявый.

Радуйся, яко уже в мире инок искусен уготовался еси.

Радуйся, всего себе Христу, яко чистую жертву, принесый.

Радуйся, ради Христа отвергийся себе самаго.

Радуйся, Христов крест подъявый истинно.

Радуйся, со Христом быти присно возжелавый.

Радуйся, Христа Бога всею душею возлюбивый.

Радуйся, Христу Богу возлюбленный.

Радуйся, Ферапонте, угодниче Христов и чудотворче.

Кондак 4

Старцу, емуже вручен был еси, яко отцу работал еси; исповедая же ему на всяк день грехи твоя, прогонял еси от себе лукавыя помыслы, сего ради с ним чистым сердцем вопиял еси Богу: Аллилуиа.

Икос 4

Подвигом иночества добре подвизаяся, не мнил еси себе доброе что сотворша, но мнил себе непотребна быти и, припадая стопам спостников твоих, слезно молил еси их умолити Пречистую Богородицу, да спасет тя от геенны огненныя. Сие ведуще, вопием ти:

Радуйся, слезами покаяния очистивый душу свою.

Радуйся, низложивый в себе духа гордыни.

Радуйся, научивыйся зрети своя точию согрешения.

Радуйся, не осуждавый ни единаго от согрешавших.

Радуйся, братолюбием утишавый прекословия.

Радуйся, ко всем в послушание вдавыйся неуклонно.

Радуйся, молитвами братии подкрепленный.

Радуйся, не на тебе самаго, а на Пречистую Богородицу уповавый.

Радуйся, во всех трудех твоих благословенный от Пречистыя Богородицы.

Радуйся, Заступницею себе стяжавый благословенную Матерь Христа Бога.

Радуйся, Ею от вечныя муки свобожденный.

Радуйся, Ферапонте, угодниче Христов и чудотворче.

Кондак 5

В той же обители блаженнаго Феодора имел еси равнолетна тебе друга, спостника и сомолитвенника, преподобнаго Кирилла, с нимже, от преподобнаго Сергия наученный, единем сердцем и единеми усты непрестанно пел еси Богу: Аллилуиа.

Икос 5

Спостницы твои, видевше тя зело преспевающа в добром иноческом житии, в смирении и послушании, в целомудрии и братолюбии, славиша Бога и Пречистую, давших ти таковую благодать. Мы же, уведевше о сем, вопием ти:

Радуйся, иноче, иноков похвало.

Радуйся, спостниче преподобнаго Кирилла.

Радуйся, верный учениче преподобнаго Сергия.

Радуйся, целомудрия образ явивый собою истинный.

Радуйся, пощением укрепивый сердце твое.

Радуйся, бдением окриливый душу твою.

Радуйся, молитвами твоими благоухающий Богу.

Радуйся, ангельския чистоты рачителю.

Радуйся, херувимскаго богомыслия подражателю.

Радуйся, серафимския к Богу любве ревнителю.

Радуйся, во след Христа неуклонно шедый.

Радуйся, Ферапонте, угодниче Христов и чудотворче.

Кондак 6

Обходя страну Белоезерскую, обрел еси многая места красная и удобная, во еже тамо в конечнем безмолвии пребывати, и возжаждал еси сего безмолвия, да в нем втайне Богу зовеши: Аллилуиа.

Икос 6

По гласу Пречистыя пришед в страну Белоезерскую со другом твоим, преподобным Кириллом, создал еси недалече от него в дебрех безмолвную келлию, да в ней втайне усугубиши труды твоя пред Богом. Мы же, уведевше я, вопием ти:

Радуйся, ради Бога возжаждавый тишайшаго безмолвия.

Радуйся, устроением Пречистыя приведенный в пустыню со другом твоим.

Радуйся, со единем точию другом твоим разделявый безмолвие пустыни.

Радуйся, и от сего друга разлучивыйся, да со единем Христом будеши.

Радуйся, о пустынней келлии паче царскаго чертога веселивыйся.

Радуйся, в ней дни в трудех, а нощи в бдениих проводивый.

Радуйся, ради Христа от тяжких к тяжчайшим трудом устремлявыйся.

Радуйся, тайнаго делания пред Отцем Небесным достигнувый.

Радуйся, гласом твоим молитвенным огласивый дебри пустынныя.

Радуйся, немолчно твоими усты славивый имя Христово.

Радуйся, в уме и сердце имевый Иисуса Сладчайшаго.

Радуйся, Ферапонте, угодниче Христов и чудотворче.

Кондак 7

Разбойников ярость нищетою и терпением посрамил еси, нощных птиц клики и зверей шатание победил еси верою во Христа, труды же неусыпными до конца сокрушил еси похоти и немощи плотския, немолчно вопия Богу: Аллилуиа.

Икос 7

Далече зело слышано бысть богоугодное житие твое, преподобне, и от конец земли Русския притекоша к тебе любящии безмолвие. Ты же сих приемляй с любовию, яко отец о обращении заблуждших чад радовался еси. Темже и мы вопием ти:

Радуйся, древних отцев пустынножителей подражателю.

Радуйся, зной, хлад и глад в пустыни с терпением понесый.

Радуйся, тяготу дневную и страх нощный любовию ко Христу победивый.

Радуйся, не устрашивыйся ни зверей дивиих, ни злых человеков.

Радуйся, доблий низложителю искушений диавольских.

Радуйся, за тайныя твоя подвиги в пустыни для Бога прославленный от Бога яве.

Радуйся, яко и в пустыни Господь содела тя вождя ищущим спасения.

Радуйся, благоукрасивый пустыню обителию иночествующих.

Радуйся, неискусных иноков добрый вождь ко Христу.

Радуйся, освятивый пустыню устроением храма Божия.

Радуйся, в храме со ученики твоими воспевавый Богу радостно.

Радуйся, Ферапонте, угодниче Христов и чудотворче.

Кондак 8

Слышав о тебе и о сподвижницех твоих, преподобне, благоверный князь Андрей всем сердцем вознесе хвалу Богу, благословившему отчину его таковыми обитателями, и воспе радостно Богу: Аллилуиа.

Икос 8

Возжела благоверный князь Андрей прияти благословение от святыни твоея, преподобне, и пригласи тя во свой град; ты же, молению его и братии повинуяся, лета старости и труд далечайшаго пути презрев, скоро ко князю притекл еси, слышай от него:

Радуйся, леты, а наипаче благомудрием украшенный.

Радуйся, подвижниче Христов неизменный.

Радуйся, Духа Святаго преисполненный.

Радуйся, Материю Бога возлюбленный.

Радуйся, о имени Ея обитель иноков создавый.

Радуйся, стаду твоему образ истинный. Радуйся, чадолюбивый отче иноков.

Радуйся, иноки твоими любимый, яко отец чадолюбивейший.

Радуйся, всех притекающих к тебе исполняяй радости.

Радуйся, всем подаяй скорое утешение.

Радуйся, любве и мира насадителю.

Радуйся, Ферапонте, угодниче Христов и чудотворче.

Кондак 9

Радостию возрадовася благоверный князь Андрей, видев твое к нему пришествие и, да не разлучится с тобою, молением умоли тя близ него создати новую обитель иноков, дабы в ней всегда пети Богу: Аллилуиа.

Икос 9

Аще и зело отрицался еси, обаче, не князю точию, но самому Богу повинуяся, на месте краснем близ града Можайска создал еси храм Пречистыя и новую обитель иноков, имже сам в наставника был еси до конца дней твоих, темже слышиши от всех:

Радуйся, благое желание князя благовернаго совершивый мудрее.

Радуйся, вторыя своея обители иноков во имя Богоматери учредителю.

Радуйся, в сию обитель собравый множество спасающихся.

Радуйся, насадителю в ней добраго жития.

Радуйся, напоивый ю твоими наставлении.

Радуйся, возрастивый ю многими слезами твоими.

Радуйся, яко многими труды и благими подвиги твоими благоукрасил еси ю.

Радуйся, яко молитвами твоими твориши ю чисту невесту Христову.

Радуйся, радостно предавый в ней Христу душу твою чистою.

Радуйся, телом твоим нетленным пребываяй присно в сей обители твоей.

Радуйся, из нея сияяй мирови чудесы.

Радуйся, Ферапонте, угодниче Христов и чудотворче.

Кондак 10

Чистая душа твоя, преподобне, многими подвиги и скорбями усугубившая своя таланты, принесе к давшему я Богу и вниде в радость Господа своего, ныне вопиющи Ему радостно: Аллилуиа.

Икос 10

Аще и до конца дней твоих не преставал еси желати возвращения твоего в первую твою обитель, Белоезерскую, но, притек к первейшей и вожделеннейшей обители Небесней, оставил еси в покров и защиту вторыя обители твоея, Лужецкия, святыя мощи твоя, имиже хранимии, зовем ти:

Радуйся, на земли поживый равноангельно.

Радуйся, на Небеси ликующий со Ангелы.

Радуйся, на Небеси вчиненный со всеми святыми.

Радуйся, на земли чудесы прославленный.

Радуйся, верный хранителю обители, в нейже почивает нетленное тело твое.

Радуйся, избавляяй обитель сию от разрушения.

Радуйся, смиряяй в ней врагов иноплеменных.

Радуйся, низлагаяй всех ея видимых и невидимых враг.

Радуйся, всякия напасти от нея прогоняй.

Радуйся, подаяй нам молитвами твоими вся благопотребная к вечней жизни.

Радуйся, разрушителю вражды и насадителю братолюбия.

Радуйся, Ферапонте, угодниче Христов и чудотворче.

Кондак 11

Образ был еси стаду твоему во всем и явился еси всем, грядущим с тобою ко Христу по тесному пути, вождь к вечней славе, в нейже ныне со всеми святыми вопиеши Богу: Аллилуиа.

Икос 11

Пение наше тебе побеждается обилием и величием подвигов и всяких добродетелей и чудес твоих. Обаче, любовию к тебе горящии, молчати не могуще, молим: приими от нас сицевыя, аще и вельми скудныя, похвалы:

Радуйся, образе смирения, кротости и послушания.

Радуйся, похвало девствующим.

Радуйся, в душевных подвизех и в телесных трудех помощниче наш.

Радуйся, исцеляяй нас от страстей.

Радуйся, врачу скорый в недузех и болезнех.

Радуйся, заступниче сирых и всех обидимых.

Радуйся, утешителю наш в скорбех и бедах и всяких напастех.

Радуйся, от огня и от потопления избавляяй нас.

Радуйся, умоляяй Господа о обилии плодов и благорастворении воздухов.

Радуйся, питателю наш во дни глада и скудости.

Радуйся, яко Бога твориши ко всем нам милостива твоими ходатайствы к Нему.

Радуйся, Ферапонте, угодниче Христов и чудотворче.

Кондак 12

Поюще твое по Бозе житие, твой иночествующим образ, и всем твою, преподобне, помощь, благодаряще, славим прославльших тя Бога и Пречистую Богородицу и вопием Им с тобою: Аллилуиа.

Икос 12

Проповедник Православия явился еси, преподобне, граду твоему и окрестней стране, и далече от них молитвами твоими упраздняеши всякая учения лживая льстивых и лукавых человеков. Мы же тобою в правой вере утверждаемии, вопием ти:

Радуйся, правило веры Христовы.

Радуйся, образе истинныя любве к Богу.

Радуйся, неусыпный пастырю стада Христова.

Радуйся, нечестия обличителю.

Радуйся, низложителю зловерных.

Радуйся, утверждение верных.

Радуйся, всем православным охранителю.

Радуйся, всем заблуждающим подаяй скорое исправление.

Радуйся, тьму неверия разгоняяй.

Радуйся, всех приводяй ко Христу Богу.

Радуйся, укрепляющий нас служити Ему выну.

Радуйся, Ферапонте, угодниче Христов и чудотворче.

Кондак 13

О преблаженне и досточудне отче наш Ферапонте! Всех нас, ныне тебе усердно молящихся, от бед и вечных мук избави, приятными Богу твоими молитвами, да поем с тобою Богу: Аллилуиа.

Этот кондак читается трижды, затем икос 1 и кондак 1

Молитва

О всечестный и преблаженый отче наш Ферапонте! Тебе дадеся благодать молитися о нас, и вемы, яко, предстоя Престолу Господа, присно являеши любовь твою к нам непрестанными о нас твоими ходатайствы. Но понеже мы, ежечасно умножающе грехи наша, крайняго твоего отвращения достойни сотворихомся, сего ради в покаянии, со слезами припадающе, молим тя: не премени твоея милости к нам на гнев за нечестия и скверны наша, яви убо нам милость твою до конца и согрешающих нас очисти твоими молитвами, возведи к покаянию, укрепи на дела благая, сохрани в Православии и во всякой святыни. Даруй нам пребывати в мире, тишине и братолюбии, испроси нам времена безмятежна и изобилие плодов земных, избави от огня, и от потопления, и от лютых болезней, и от смертоносныя язвы. Посли труждающимся благий успех, путешествующим путь беспреткновенный, в мори плавающим пристанище тихое, плененным ослабу и освобождение, сирым помощь и заступление, богоспасаемому отечеству нашему во всем благопоспешение, воинству нашему верность, мужество и победу, и всем нам вся полезная ко временней и вечней жизни. Да любовию твоею огражденнии, благодарственная всегда поем прославившему тя Господу Иисусу Христу, Емуже подобает всякая слава и честь, со Безначальным Его Отцем и с Пресвятым и Животворящим Его Духом во веки веков. Аминь.

Тропарь, глас  4-й

Житием чистым просветився, в молитвах и постех пустыни явился еси доброе прозябение и, духовному твоему учителю последствуя, ум свой к Небесным управль, стаду твоему наставник был еси, тем тя молим, отче Ферапонте: моли Христа Бога спастися душам нашим.

Кондак, глас 4-й

Преблагий Спас наш Христос умножил есть милость Свою к нам, даровав нам в заступника и целителя преподобнаго отца нашего Ферапонта, иже просвещает нас образом святаго жития своего и ныне молитвами своими ограждает обитель свою от врагов и разрушения, страну сию от глада и напрасныя смерти, чтущих же память его всех от болезней и от лютых страстей.

Величание

Ублажаем тя, преподобне отче Ферапонте, и чтим святую память твою, наставниче монахов и собеседниче ангелов.

Новые молитвы

Молитвы от коронавируса

Ознакомиться

Молитвы о самоубийцах

Ознакомиться

Молитвы за скончавшихся вне своего Отечества, за безродных и убогих

Ознакомиться

Молитвы за наставников и воспитателей

Ознакомиться

Молитвы за всякого усопшего

Ознакомиться