Пред иконой Пресвятой Богородицы Албазинская
Всемилостивая наша заступнице, Мати воплотившагося Бога Слова, явлей чудоточный образ Свой на Амурстей земли, из него же Благодать обильно изливаеши, подавая исцеление недугов душевных и телесных. О, Всеблагая Богородительнице, непраздных жен в родах Помощнице, и Взбранной Воеводе победительная, от нашествия иноплеменных Крепкий Щите, Православие в концех земли Российстей укрепи, и подай душам нашим велию милость.
Явися яко драгоценный бисер образ Твой Богородице Дево, именуемый "Слово плоть бысть", изливающий чудес множество. Пред ним во умилении сердец возопием Госпоже Царице Небесной: "Покровом Твоим защити землю Амурскую от всех супостат и спаси души наша".
Днесь благовернии людие светло почтим Пресвятую Деву Владычицу, ради Албазинского образа Ея "Слово плоть бысть", изливающаго чудес множество. И с умилением пред ним возопием : "О Госпоже Царице и Владычице! Сохрани землю Амурскую и вся грады христианския под державным Твоим амофором и спаси души наша".
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти: ускори на молитву и потщися на умоление, предстательствующи присно, Богородице, чтущих Тя.
Величаем Тя, Пресвятая Дево Богоизбранная Отроковице и чтим образ Твой святый, имже точиши исцеления всем с верою притекающим.
Богородице Дево, Пренепорочная Мати Христа Бога нашего, Заступнице рода христианскаго! Пред чудотворною иконою Твоею предстояше, отцы наши молиша Тя, да явиши покров Твой и заступление стране приамурстей. Темже и мы ныне молим Тя: град наш и страну сию от нахождения иноплеменных соблюди и от междоусобныя брани сохрани. Даруй мирови мир, земли плодов изобилие; сохрани во святыни пастырей наших, во святых храмех труждающихся: осени вседержавным покровом Твоим строителей и благотворителей их. Утверди в правоверии и единомыслии братии наших: заблуждших же и отступльших от православныя веры вразуми и соедини Святей Церкви Сына Твоего. Буди всем притекающым к чудотворней иконе Твоей покров, утешение и пристанище от всяких зол, бед и обстояний ты бо еси больных исцеление, скорбящих утешение, заблудших исправление и вразумление. Приими моления наша и вознеси я ко Престолу Всевышняго, яко да твоим предстательством соблюдаеми и покровом Твоим осеняеми, прославим Отца и Сына и Святаго Духа, ныне и присно и во веки веков. Аминь.