Пред иконой Пресвятой Богородицы Боголюбская

Пред иконой Пресвятой Богородицы Боголюбская
Тропарь пред иконой Пресвятой Богородицы Боголюбская, глас 1-й

Всепетая и Всеславная Царице Богородице, Мати всея твари Содетеля, христианская надеждо и Заступнице, печальных утешение, ненадеющихся и отчаявшихся скорое надеяние, молим Тя: милостива буди нам, грешным, и не остави раб Своих, и не отрини моления верных, в скорбех и бедах пред честным образом Твоим избавления требующих. О Владычице, Благая Помощнице! Ризою Твоею честною нас защити и от всех зол избави, молящи Сына Твоего, Христа Бога нашего, да спасет души наша, яко Милосерд.

Тропарь иной пред иконой Пресвятой Богородицы Боголюбская, глас 1-й

Боголюбивая Царице, Неискусомужная Дево, Богородице Марие, моли за ны Тебе Возлюбившаго и рождшагося от Тебе Сына Твоего, Христа Бога нашего, подати нам оставление прегрешений, мирови мир, земли плодов изобилие, пастырем святыню и всему человечу роду спасение. Грады наша и страны Российския от нахождения иноплеменных заступи и от междоусобныя брани сохрани. О Мати Боголюбивая Дево! О Царице Всепетая! Ризою Своею покрый нас от всякаго зла, от видимых и невидимых враг защити и спаси души наша.

Кондак пред иконой Пресвятой Богородицы Боголюбская, глас 3-й

Дева днесь предстоит Сыну, руце Свои к Нему простирающи, святый князь Андрей радуется, и с ним Российская страна торжествует, нас бо ради молит Богородица Превечнаго Бога.

Величание пред иконой Пресвятой Богородицы Боголюбская

Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем с верою притекающим.

Молитва первая пред иконой Пресвятой Богородицы Боголюбская

О, Чудная и Вышшая всех тварей, Царице Богородице, Небеснаго Царя Христа Бога нашего Мати!

Услыши нас, грешных и недостойных раб Твоих, в час сей молящихся и припадающих к Тебе с воздыханием и слезами, и умильно глаголющих: изведи нас от рова страстей, Владычице: избави нас от всякия скорби и печали, огради от всякия напасти и злых клевет и от неправеднаго и лютаго навета вражия.

Можеши бо, о, Благодатная Матерь наша, не точию от всякаго зла сохранити люди Твоя, но и всяким благодеянием снабдити и спасти: разве Тебе иныя Предстательницы в бедах и обстояниих и теплыя Ходатаицы о нас грешных не имамы к Сыну Твоему, Христу Богу нашему, Егоже умоли, Владычице, да, спасеннии Тобою, славим и в будущем веце Всесвятое имя Сына Твоего и Бога нашего, купно со Отцем и Святым Духом, ныне и в безконечныя веки. Аминь.

Молитва вторая пред иконой Пресвятой Богородицы Боголюбская

О, Пречистая Госпоже Богородице, Мати Боголюбивая, надеждо нашего спасения! Воззри милостивно на предстоящия с верою и любовию и поклоняющияся пречистому образу Твоему, приими наше хвалебное пение сие и пролей теплую Твою молитву о нас, грешных, ко Господу, да, презрев вся наша согрешения, спасет и помилует нас.

О, Предивная Владычице! Покажи на нас чудныя милости Твоя: избави нас от всякия скорби, настави на путь всякия добродетели и благостыни, спаси от искушений, бед и болезней, изми от нас оклеветания и ссоры, сохрани от молниеноснаго грома, от запаления огненнаго, от глада, труса, потопа и смертоносныя язвы, подай нам Свою милостивую помощь на пути, в мори и на суше, да не погибнем люте.

О, Всемилостивая Боголюбивая Мати, с твердым упованием возсылаем к Тебе нашу убогую молитву! Не отрини наших слез и воздыханий, не забуди нас во вся дни живота нашего, но всегда пребывай с нами и подаждь нам отраду, утешение, защиту и помощь, да выну славим и величаем преблагословенное и всепетое имя Твое. Аминь.

Новые молитвы

Молитвы о самоубийцах

Ознакомиться

Молитвы за скончавшихся вне своего Отечества, за безродных и убогих

Ознакомиться

Молитвы за наставников и воспитателей

Ознакомиться

Молитвы за всякого усопшего

Ознакомиться

Молитвы об ослаблении вечных мук умерших без покаяния

Ознакомиться