Пред иконой Пресвятой Богородицы Черниговская Гефсиманская
Пречистая Владычице Богородице, упование всех христиан, понеже инаго упования не имамы разве Тебе, Всенепорочная Владычице моя, Госпоже Богородице, Мати Христа Бога моего. Темже помилуй и избави мя от всех зол моих и умоли Милостиваго Сына Своего и Бога моего, да помилует окаянную душу мою, и да избавит мя от вечныя муки, и сподобит мя Царствия Своего.
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти; ускори на молитву и потщися на умоление, предстательствующи присно, Богородице, чтущих Тя.
Достойно есть величати Тя, Богородице, честнейшую Херувим и славнейшую без сравнения Серафим. Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем с верою притекающим.
О, Пресвятая Дево, Мати Христа Бога нашего, Царице Небесе и земли! Вонми многоболезненному воздыханию душ наших, призри с высоты святыя Твоея на нас, с верою и любовию покланяющихся пречистому образу Твоему: се бо, грехми погружаеми и скорбми обуреваеми, взирающе на Твой образ, яко живущей Ти с нами, приносим смиренная моления наша, не имамы бо иныя помощи, ни инаго предстательства и утешения, токмо Тебе, о, Мати всех скорбящих и обремененных. Помози нам, немощным, утоли скорбь нашу, настави на путь правый нас, заблуждших, уврачуй болезненная сердца наша и спаси безнадежныя. Даруй нам прочее время живота нашего в мире и покаянии проводити, подаждь христианскую кончину и на Страшнем Суде Сына Твоего явися нам милосердая Предстательница, да всегда поем, величаем и славим Тя, яко Благую Заступницу рода христианскаго, со всеми угодившими Богу. Аминь.
К кому возопию, Владычице наша, Пресвятая Богородице, к кому прибегну в печали моей, аще не к Тебе, Заступнице всех труждающихся и обремененных? Кто плач мой и воздыхание мое приимет, аще не Ты, Помощнице и Покровительнице рода нашего? Услыши и ныне моления наша, Тебе приносимыя, буди нам отрада и утешение, всех благ подательница. Управи житие наше, якоже веси. Буди покров милости Твоея на нас, грешных. И ныне мы, смиреннии, благодарно вопием:
Радуйся, Радосте наша, покрый нас от всякого зла честным Твоим омофором. Аминь.