Пред иконой Пресвятой Богородицы Державная

Пред иконой Пресвятой Богородицы Державная
Тропарь пред иконой Пресвятой Богородицы Державная, глас 8-й

Ангелов лицы благоговейно Тебе служат и вся Небесныя силы немолчными гласы Тя ублажают, Богородице Дево; усердно молим Тя, Владычице, да пребудет Божественная благодать на честней иконе Твоей Державной, и светозарный луч славы чудес Твоих да нисходит от нее на всех, с верою Тебе молящихся и вопиющих к Богу: Аллилуиа.

Ин тропарь пред иконой Пресвятой Богородицы Державная, глас 4-й

Града Сионска взыскующе, под Твой покров, Дево Чистая, днесь притекаем, и никтоже возможет на ны, яко несть град силен, аще не Сущаго Бога, и несть ина крепость, аще не милость Владычицы Девы.

Ин тропарь пред иконой Пресвятой Богородицы Державная, глас тойже

Век скончавается, любовь оскудевает, победу лукавый торжествует, и кто нам помощи может, аще не Ты, Дево, Чудная Мати, оградиши Крестом Сына Твоего.

Кондак пред иконой Пресвятой Богородицы Державная, глас 8-й

Взбранной Воеводе Победительныя песни приносим, яко даровася нам держава Твоя, и ничесоже устрашимся, не от мира бо спасение наше, но превознесенныя Владычице милосердием ограждаемся и тому днесь радуемся, яко прииде Заступнице на стражу земли Своея.

Ин кондак пред иконой Пресвятой Богородицы Державная, глас 8-й

Избранной от всех родов Заступнице рода христианскаго, покровом Своея благости покрывающей страну нашу православную, благодарственныя пения приносим Ти, Владычице, о явлении нам чудныя иконы Твоея Державныя. Ты же, яко Всемилостивая Заступница всех, с верою к Тебе притекающих, от всяких нас бед свободи, да зовем Ти: радуйся, Матерь Божия Державная, Заступнице Усердная рода христианскаго.

Ин кондак иной пред иконой Пресвятой Богородицы Державная, глас 8-й

Взбранней Воеводе, Заступнице нашей Державней, песни благодарственный приносим о даровании нам иконы Ея святыя, еюже ограждаемы, ничесоже устрашимся, не от человек бо спасение наше, но Преблагословенныя Владычицы милосердием. Темже днесь радуемся и празднуем светло, яко прииде Державная на стражу земли Своей.

Величание пред иконой Пресвятой Богородицы Державная

Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем с верою притекающим.

Ино величание пред иконой Пресвятой Богородицы Державная

Достойно есть величати Тя, Богородице, земли Русския Царицу Небесную и людей православных Владычицу Державную.

Ино величание другое пред иконой Пресвятой Богородицы Державная

Достойно есть величати Тя, Богородице, честнейшую Херувим и славнейшую без сравнения Серафим.

Молитва первая пред иконой Пресвятой Богородицы Державная

О, мира Заступнице, Мати Всепетая! Со страхом, верою и любовию припадающе пред честною иконою Твоею Державною, усердно молим Тя: не отврати лица Твоего от прибегающих к Тебе, умоли, милосердная Мати Света, Сына Твоего и Бога нашего, Сладчайшаго Господа Иисуса Христа, да сохранит в мире страну нашу, да утвердит державу нашу в благоденствии, и избавит нас от междоусобныя брани, да укрепит Святую Церковь нашу Православную, и незыблему соблюдет ю от неверия, раскола и ересей.

Не имамы иныя помощи, разве Тебе, Пречистая Дево. Ты еси всесильная христиан заступница пред Богом, праведный гнев Его умягчая. Избави всех с верою Тебе молящихся от падений греховных, от навета злых человек, от глада, скорбей и болезней, даруй нам дух сокрушения, смирение сердца, чистоту помышлений, исправление греховныя жизни и оставление согрешений наших; да вси, благодарственне воспевающе величия Твоя, сподобимся Небеснаго Царствия, и тамо со всеми святыми прославим пречестное и великолепое имя в Троице славимаго Бога, Отца и Сына и Святаго Духа. Аминь.

Молитва вторая пред иконой Пресвятой Богородицы Державная

О, Державная Владычице Пресвятая Богородице, на объятиях Своих держащая Содержащаго дланию всю вселенную, Царя Небеснаго!

Благодарим Тя за неизреченное милосердие Твое, яко благоволила еси явити нам, грешным и недостойным, сию святую и чудотворную икону Твою во дни сия лукавыя и лютыя, яко вихрь, яко буря ветренная, нашедшая на страну нашу, в дни уничижения нашего и укорения, во дни разорения и поругания святынь наших от людей безумных, иже не точию в сердце, но и устнами дерзостно глаголют: несть Бог, и в делех сие безбожие показуют.

Благодарим Тя, Заступнице, яко призрела еси с высоты святыя Своея на скорби наша и горе нас, православных, и яко солнце светлое, увеселяеши изнемогшия от печали очеса наша пресладостным зрением Державнаго образа Твоего. О, Преблагословенная Мати Божия, Державная Помощнице, крепкая Заступнице! Благодаряще Тя со страхом и трепетом, яко раби непотребнии, припадаем Ти со умилением, с сокрушением сердечным и со слезами, и молим Тя и стеняще вопием Ти: спаси нас, спаси! Помози нам, помози! Потщися: погибаем! Се живот наш аду приближися: се обышедше обыдоша нас греси мнози, беды мнози, врази мнози. О, Небесная Царице! Скипетром власти Твоея Божественныя разсей, яко прах, яко дым, нечестивыя козни врагов наших видимых и невидимых, сокруши велеречивыя помышления их и запрети им, и яко Мати всех, на путь правый и богоугодный настави их. Вкорени в сердца всех нас правду, мир и радость о Дусе Святе, водвори в стране нашей тишину, благоденствие, безмятежие, любовь друг ко другу нелицемерную. Державою Твоею всесильною удержи, Пречистая, потоки беззакония, хотящия потопити Землю Русскую в страшней пучине своей. Поддержи нас слабых, малодушных, немощных и унылых, укрепи, возстави и спаси, яко да под Державою Твоею всегда храними, поем и величаем Пречестное и Великолепое имя Твое, ныне и присно и во веки веков. Аминь.

Молитва третья пред иконой Пресвятой Богородицы Державная

Ангелов лицы, благоговея, Тебе служат, и вся Небесные силы немолчными гласы Тя ублажают, Богородице Дево. Усердно молим Тя, Владычице, да пребудет Божественная благодать над Твоей Честной иконой "Державная", и светозарный луч славы чудес Твоих да исходит на верных, молящихся Тебе и вопиющих: Аллилуия.

Новые молитвы

Молитвы о самоубийцах

Ознакомиться

Молитвы за скончавшихся вне своего Отечества, за безродных и убогих

Ознакомиться

Молитвы за наставников и воспитателей

Ознакомиться

Молитвы за всякого усопшего

Ознакомиться

Молитвы об ослаблении вечных мук умерших без покаяния

Ознакомиться