Пред иконой Пресвятой Богородицы Достойно есть

Пред иконой Пресвятой Богородицы Достойно есть
Тропарь пред иконой Пресвятой Богородицы Достойно есть, глас 4-й

Oтцев все Афонское множество, соберитеся, верно празднующе, днесь радующеся и светло восклицающе вси в веселии, Божия бо Мати ныне от Ангела преславно воспевается. Темже, яко Богородицу, присно Сию славим.

Ин тропарь пред иконой Пресвятой Богородицы Достойно есть, глас 4-й

Притецем, вернии, со дерзновением к Милующей Царице Богородице и умиленно воззовем к Ней: низпосли на ны милости Твоя богатыя: град сей избави от всякаго обстояния, мир даруй мирови и спасение душам нашим.

Кондак пред иконой Пресвятой Богородицы Достойно есть, глас 4-й

Празднует днесь весь Афон, яко песнь прият от Ангела чудно Тебе, Чистей Богоматери, Юже вся тварь чтит, славящи.

Ин кондак пред иконой Пресвятой Богородицы Достойно есть, глас 8-й

Архангельский глас вопием Ти, Всецарице: достойно есть, яко воистинну, блажити Тя, Богородицу, Присноблаженную и Пренепорочную и Матерь Бога нашего.

Величание пред иконой Пресвятой Богородицы Достойно есть

Достойно есть величати Тя, Богородице, Честнейшую Херувим и Славнейшую без сравнения Серафим.

Молитва пред иконой Пресвятой Богородицы Достойно есть

О пресвятая и премилостивая Владычице Богородице! Припадающе к святей иконе Твоей, смиренно молимся Тебе: вонми гласу моления нашего, виждь скорби, виждь беды наша и, яко любвеобильная Мати, потщися на помощь нам безпомощным, умоли Сына Твоего и Бога нашего, да не погубит нас за беззакония наша, но явит нам человеколюбно Свою милость. Испроси нам, Владычице, у благости Его телесное здравие и душевное спасение, и мирное житие, земли плодоносие, воздуха благорастворение, и благословение свыше на вся благая дела и начинания наша, православному воинству нашему на вся враги победу и одоление. И якоже древле призрела еси милостиво на смиренное славословие послушника афонскаго, воспевавшего Тя пред пречистою иконою Твоею, и послала еси к нему Ангела научити его пети песнь небесную, еюже славословят Тя Ангели, тако и ныне приими наше усердное молитвословие, Тебе приносимое. О Царице всепетая! Простри ко Господу богоноснеи Твои руце, имиже Богомладенца Иисуса Христа носила еси, и умоли Его избавити нас от всякаго зла. Яви, Владычице, Твою милость к нам: болящия исцели, скорбящия утеши, бедствующим помози и сподоби нас благочестно житие сие земное совершити, христианскую непостыдную кончину получити и Небесное Царствие наследити Матерним ходатайством Твоим к рождшемуся от Тебе Христу Богу нашему, Емуже со Безначальным Его Отцем и Пресвятым Духом подобает всякая слава, честь и поклонение ныне и присно, и во веки веков. Аминь.

Новые молитвы

Молитвы о самоубийцах

Ознакомиться

Молитвы за скончавшихся вне своего Отечества, за безродных и убогих

Ознакомиться

Молитвы за наставников и воспитателей

Ознакомиться

Молитвы за всякого усопшего

Ознакомиться

Молитвы об ослаблении вечных мук умерших без покаяния

Ознакомиться