Пред иконой Пресвятой Богородицы Млекопитательница

Пред иконой Пресвятой Богородицы Млекопитательница
Тропарь пред иконой Пресвятой Богородицы Млекопитательница, глас 3-й

Без семене от Божественнаго Духа, волею же Отчею зачала еси Сына Божия, от Отца без матери прежде век суща, нас же ради из Тебе без отца бывша, плотию родила еси и Младенца млеком питала еси, темже не престай молити избавитися от бед душам нашим.

Кондак пред иконой Пресвятой Богородицы Млекопитательница, глас 5-й

Душ наших чувствия очистиши, узрим на иконе таинство преславное, Творца вселенныя и Господа вышних сил, во объятиях держима и от сосцу Твоею яко Младенца питаема, и, со страхом и радостию покланяющеся Тебе и рождшемуся от Тебе Спасу нашему, воззовем: Радуйся, Владычице, жизни нашея Питательница.

Величание пред иконой Пресвятой Богородицы Млекопитательница

Величаем Тя, Пресвятая Дево, Млекопитательнице Спаса нашего, и чтим образ Твой святый, от негоже благодать исцеления нам присно подаеши.

Молитва первая пред иконой Пресвятой Богородицы Млекопитательница

Приими, Госпоже Богородительнице, слезная моления рабов Твоих, к Тебе притекающих. Зрим Тя на свя­тей иконе, на руках носящую и мле­ком питающую Сына Твоего и Бога нашего, Господа Иисуса Христа. Аще и безболезненно родила еси Его, обаче матерния скорби веси и немощи сынов и дщерей человеческих зриши.

Темже тепле припадающе к цельбоносному образу Твоему и умиленно сей лобызающе, молим Тя, всемило­стивая Владычице: нас, грешных, осужденных в болезнех родити и в печалех питати чада наша, милостивно пощади и сострадательно заступи, младенцы же наша, такожде и родившия их, от тяжкаго недуга и горькия скорби избави.

Даруй им здравие и благомощие, да и питаемии от силы в силу возрастати будут, и питающия их исполнятся радостию и утешением, яко да и ныне предстательством Тво­им из уст младенец и ссущих Господь совершит хвалу Свою. О Мати Сына Божия! Умилосердися на Матери сынов человеческих и на немощныя люди Твоя: постигающия нас болезни скоро исцели, належащия на нас скорби и печали утоли, и не презри слез и воздыхании рабов Твоих.

Услыши нас в день скорби пред иконою Твоею припадающих, и в день радости и избавления приими благодарная хваления сердец наших. Вознеси мольбы наша к престолу Сына Твоего и Бога нашего, да ми­лостив будет ко грехом и немощем нашим и пробавит милость Свою ве­дущим имя Его, яко да и мы, и чада наша, прославим Тя, милосердую За­ступницу и верную надежду рода на­шего, во веки веков. Аминь.

Молитва вторая пред иконой Пресвятой Богородицы Млекопитательница

О Пресвятая Госпоже Владычице наша Богородице, Небесная наша Царице, млеком Христа Бога нашего питавшая, и нас недостойных и многогрешных Твоею богатою милостию питаеши. Спаси и избави нас грешных рабов Твоих от напрасныя клеветы, от всякия беды и напасти и внезапныя смерти. Помилуй нас в дневных часех, во утренних и вечерних и во всякое время сохрани нас: стоящих, сидя­щих соблюди и на всяких путех хо­дящих и в ночных часех спящих покрый и заступи. Защити нас, Влады­чице Богородице, от всех наших враг видимых и невидимых и от всякаго злаго обстояния. На всяком месте и на всякое время буди нам, Мати Преблагая, необоримая сте­на и крепкое заступление, всегда, ныне и присно, и во веки веков. Аминь.

Новые молитвы

Молитвы о самоубийцах

Ознакомиться

Молитвы за скончавшихся вне своего Отечества, за безродных и убогих

Ознакомиться

Молитвы за наставников и воспитателей

Ознакомиться

Молитвы за всякого усопшего

Ознакомиться

Молитвы об ослаблении вечных мук умерших без покаяния

Ознакомиться