Пред иконой Пресвятой Богородицы Троеручица

Пред иконой Пресвятой Богородицы Троеручица
Тропарь пред иконой Пресвятой Богородицы Троеручица, глас 4-й

Днесь всемирная радость возсия нам велия: даровася святей Горе Афонстей цельбоносная Твоя, Владычице Богородице, икона, со изображением тричисленно и нераздельно пречистых рук Твоих в прославление Святыя Троицы, созываеши бо верных и молящихся Тебе о сем познати, яко двема Сына и Господа держиши, третию же яви на прибежище и покров чтущим Тя, от всяких напастей и бед избавляти, да вси, притекающии к Тебе, верою приемлют неоскудно от всех зол свобождение, от врагов защищение, сего ради и мы вкупе со Афоном вопием: радуйся, Благодатная, Господь с Тобою.

Тропарь иной пред иконой Пресвятой Богородицы Троеручица, глас 4-й

Днесь светло красуется царствующий град Москва, имеющи в себе, о Всемилостивейшая, всея твари Честнейшая, Заступнице наша Дево Богородице, честный образ Твой, имже подсолнечныя концы земли удивляеши и мир мирови даруеши, во образ бо Святыя Троицы являеши трие руце: двема убо Сына Своего, Христа Бога нашего, носиши, третиею от напастей и бед верно к Тебе прибегающих избавляеши, и от потопления изымаеши, и всем полезная даруеши, и преподобному Михаилу Малеонскую гору показа, и всех всегда милуеши, честною ризою Своею покрываеши жительство сие и вся грады и страны наша, да зовем Ти: радуйся, Обрадованная.

Ин тропарь пред иконой Пресвятой Богородицы Троеручица, глас 4-й

Яко звезда светозаряющая, из Сербии на Афон чудесно прииде всечестная икона Твоя Троеручица, юже обитель Хиландарская благоговейно восприемши, яко Божественный дар свыше, прославляет Тя, Владычицу, и умильно вопиет: не остави милость Твою от нас, но пребуди с нами во веки.

Кондак пред иконой Пресвятой Богородицы Троеручица, глас 8-й

Днесь веселое наста ныне Твое торжество, Богомати Пречистая, вси вернии исполнишася радости и веселия, яко сподобльшеся изрядно воспети предивное явление честнаго образа Твоего и рождшагося из Тебе Младенца, истинна же Бога, Егоже двема рукама объемлеши, и третиею от напастей и бед нас изымаеши и избавляеши от всех зол и обстояний.

Кондак иной пред иконой Пресвятой Богородицы Троеручица, глас 3-й

Дева днесь благоволение к нам являет, Гора же Афон благодарение Ей приносит, Ангели и иноцы славословят, Троеручица из Сербии чудесно путешествует: нас бо ради прииде и вселися во святую обитель Хиландарскую.

Величание пред иконой Пресвятой Богородицы Троеручица

Величаем Тя, Пренепорочная Дево, и чтим чудеса образа святаго Твоего, трех пречистых рук Твоих явление в славу Божества, в Троице Бога нашего.

Молитва первая пред иконой Пресвятой Богородицы Троеручица

Пресвятая и Преблагословенная Дево Богородице Марие! Припадаем и поклоняемся Ти пред святою иконою Твоею, воспоминая преславное чудо Твое исцелением усеченныя десницы преподобнаго Иоанна Дамаскина от иконы сея явленное, егоже знамение доныне видимо есть на ней во образе третия руки, к изображению Твоему приложенныя.

Молимся Ти и просим Тя, Всеблагую и Всещедрую рода нашего Заступницу: услыши нас, молящих Ти ся, и, якоже блаженнаго Иоанна, в скорби и болезни к Тебе возопившаго, услышала еси, так и нас не призри, скорбящих и болезнующих ранами страстей многоразличных и к Тебе от души сокрушенныя и смиренныя усердно прибегающих.

Ты зриши, Госпоже Всемилостивая, немощи наша, озлобление наше, нужду, потребу нашу в Твоей помощи и заступлении, яко отвсюду врагами окружени есмы и несть помогающаго, ниже заступающаго, аще не Ты умилосердишися о нас, Владычице.

Ей, молим Ти ся, вонми гласу болезненному нашему и помози нам святоотеческую пра-вославную веру до конца дней наших непорочно сохранити, во всех заповедех Господних неуклонно ходити, покаяние истинное о гресех наших всегда Богу приносити и сподобитися мирныя христианския кончины и добраго ответа на Страшнем Суде Сына Твоего и Бога нашего, Егоже умоли за нас Матернею молитвою Твоею, да не осудит нас по беззаконием нашим, но да помилует нас по велицей и неизреченной милости Своей.

О Всеблагая! Услыши нас и не лиши нас помощи Твоея державныя, да, Тобою спасение получивше, воспоем и прославим Тя на земли живых и рождшагося от Тебе Искупителя нашего Господа Иисуса Христа, Емуже подобает слава и держава, честь и поклонение, купно со Отцем и Святым Духом всегда, ныне и присно, и во веки веков. Аминь.

Молитва вторая пред иконой Пресвятой Богородицы Троеручица

О, Пресвятая Госпоже Владычице Богородице, велие чудо святому Иоанну Дамаскину явившая, яко веру истинную — надежду несумненную показавшему! Услыши нас, грешных, пред чудотворною Твоею иконою усердно молящихся и просящих Твоея помощи: не отрини моления сего многих ради прегрешений наших, но, яко Мати милосердия и щедрот, избави нас от болезней, скорбей и печалей, прости содеянныя нами грехи, исполни радости и веселия всех, чтущих святую икону Твою, да радостно воспоем и любовию прославим имя Твое, яко Ты еси от всех родов избранная и благословенная во веки веков. Аминь.

Молитва третья пред иконой Пресвятой Богородицы Троеручица
чтомая о тяжелобольных (её принято читать у изголовья больного утром и вечером, держа в руках икону)

О, Пресвятая и Преблагая Дева Богородица Мария! Припадаем и поклоняемся тебе пред святою иконой Твоею, помня прославленное чудо Твое, исцелением усеченных десницы преподобного Иоанна Дамаскина, от иконы сей явленное. Его же знамение доныне видимо есть на ней во образе третьей руки, к изоб­ражению Твоему приложена. Помоги, Троеручица, в исцелении причудной Твоею рукой рабы Божьей

(имя)
. И услыши нас, и не лиши нас помощи Твоей Державной. Во имя Отца и Сына и Святого Духа. Аминь.
Новые молитвы

Молитвы о самоубийцах

Ознакомиться

Молитвы за скончавшихся вне своего Отечества, за безродных и убогих

Ознакомиться

Молитвы за наставников и воспитателей

Ознакомиться

Молитвы за всякого усопшего

Ознакомиться

Молитвы об ослаблении вечных мук умерших без покаяния

Ознакомиться