Молитвы девяти мученикам, иже в Кизице

Молитвы девяти мученикам, иже в Кизице
Тропарь девяти мученикам, иже в Кизице, глас 8-й

Святии девяточисленнии мученицы, от различных градов во един лик совокупившеся манием Божественным, мужественно за Христа пострадасте, невидимаго врага победисте, зловерныя князи и мучители посрамисте вашим терпением, огнем же любве Божия разжизаеми, вещественно вас огнь мучащий во хлад преложисте, темже дадеся вам от Христа Бога благодать трясавичную исцеляти болезнь, от неяже и многовидных страстей милостивно спасайте и нас предстательством вашим, молимся.

Кондак девяти мученикам, иже в Кизице, глас 2-й

Твердый и всесветлый лик мученик девяти, Трисолнечнаго Божества исповедницы, на судищи Тому начально взываху: кровь и души наша с телесы, яко непорочную жертву, приносим Тебе, Владыко: в лицех небесных Твоих сопричти, яко Бог Милостивый.

Величание девяти мученикам, иже в Кизице

Величаем вас, святии девяточисленнии мученицы, и чтим честная страдания ваша, яже за Христа претерпели есте.

Молитва первая девяти мученикам, иже в Кизице
о помощи в поиске работы

О всехвальнии святии мученицы, доблственнии раби Христови, Феогниде, Руфе, Антипатре, Феостихе, Артемо, Магне, Феодоте, Фавмасие и Филимоне! Иже Христа ради от различных стран собрастеся, и Того совершеннаго Бога и человека дерзновенно в Кизице проповедасте и, принуждаеми бывше пожрети кумиром, идолы попрасте и князя посрамисте, различных томлений и огненнаго прещения не убоястеся и по различнем страдании острием меча посечени бысте, и пролиясте за Христа кровь свою, яко воду, и тою яко багряницею Церковь Христову, яко невесту, украсисте; темже и ныне увенчани неувядаемым венцем безсмертныя славы, присно в неизглаголанной радости с лики ангельскими в небесных селениих водворяетеся, божественным светом облистаеми и зрением Его доброты неизреченныя наслаждающеся. Сего ради и мы, смиреннии, к вам притекаем и умильно на святый ваш образ взирающе, молим вы: молите за ны Христа Бога, яко дерзновение к Нему имущии, да вашими святыми молитвами всякаго недуга и вреда душевнаго и телеснаго избавимся, вам бо от Бога дадеся врачебный дар от всяких скорбей с верою к вам припадающия целити, якоже и онаго славнаго мужа от трясавичныя болезни уврачевасте, да и мы вернии, тожде получивше, почитаем вас, святии мученицы, толика дарования имущих от Христа Бога, Емуже слава купно со Отцем и Духом Святым, всегда, ныне и присно и во веки веков. Аминь.

Молитва вторая девяти мученикам, иже в Кизице
об исцелении телесных недугов

О велицыи угодницы Божии, святии мученицы Христовы: Феогниде, Руфе, Антипатре, Феостихе, Магне, Артемо, Фавмасие, Феодоте и Филимоне! Вы Царя Христа вернии слуги бысте и подвигом добрым подвизастеся, претерпевше за Него муки; темже, по неложному Его глаголу: идеже есмь Аз, ту и слуга Мой будет, - и вы ныне со Ангелы предстоите Владыце Христу и с высоты небесныя славы призираете милостивно на храм ваш и на молящихся в нем.

Умолите убо Господа Сил Церковь Его Святую и православное Отечество наше сохранити от напастей и бед, от всех враг видимых и невидимых, низложити прелесть неверия и безбожия и стадо Христово избавити от волков, губящих е, глаголющих лукавое - доброе, и доброе - лукавое, полагающих тьму - свет, и свет - тьму; от шатания умов, яко трость, ветром колеблемых, и от греховнаго душ разслабления.

Богодарованную благодать чудес ваших, мученицы Христовы девяточисленнии, прострите ко всем нам, верою к вам прибегающим, и вся наша недуги душевныя и телесныя уврачуйте, и вся прошения наша во благо исполните.

Ей, страстотерпцы святии, молите за ны Господа, да низпослет нам Божественную благодать и дар Святаго Духа, всегда немощная врачующаго и оскудевающая восполняющаго, во еже соделовати нам спасение свое, заступлением Христа Спаса нашего, и избавитися нам от сети вражия и грехов, и помиловатися душам нашим, да и мы купно с вами и всеми святыми прославим Бога, в Троице славимаго, Отца и Сына и Святаго Духа. Аминь.

Новые молитвы

Молитвы о самоубийцах

Ознакомиться

Молитвы за скончавшихся вне своего Отечества, за безродных и убогих

Ознакомиться

Молитвы за наставников и воспитателей

Ознакомиться

Молитвы за всякого усопшего

Ознакомиться

Молитвы об ослаблении вечных мук умерших без покаяния

Ознакомиться