Молитвы преподобной Евфросинии Московской

Молитвы преподобной Евфросинии Московской
Тропарь преподобной Евфросинии Московской, глас 8-й

По земнем вдовстве Небесному Жениху себе уневестивши и в княжестем чертозе подвижнически поживши, послежде и чертог и чад твоих Бога ради оставила еси, преподобная Евфросиние, и вшедши во обитель, тобою созданную, во иноческом образе многи подвиги показала еси, и святое житие по благодати Божией блаженною кончиною увенчала еси. И ныне, предстоящи Христу Богу, моли спастися душам нашим.

Ин тропарь преподобной Евфросинии Московской, глас 5-й

От юности предизбранная Богом угоднице, оставльщи светлый чертог княжеский, уклонилася еси во обитель, тобою созданную, и, пучину житейскаго моря преплывши, ныне со ангелы песнословиши Христа Бога. Емуже непрестанно молися, преподобная, яко да сохраняет выну обитель, тобою созданную, и дарует нам мир и велию милость.

Кондак преподобной Евфросинии Московской, глас 2-й

Вся красная мира сего яко суетная презревши и тело твое постом и бдением изнуривши, непрестанными молитвами Богу угодила еси, преподобная Евфросиние, и, дар исцелений от Него прияти сподобльшися, слепому прозрение и многим недужным исцеление даровала еси. Темже радостно взываем, глаголюще: слава Богу, прославляющему святыя Своя.

Величание преподобной Евфросинии Московской

Ублажаем тя, преподобная мати Евфросиние, и чтим святую память твою, ты бо молиши за ны Христа Бога нашего.

Молитва преподобной Евфросинии Московской
при болезнях глаз, от нашествия врагов и иноплеменных, для защиты детей от бед

О преподобная княгине Евфросиние, доблия в женах подвижнице, прехвальная угоднице Христова! Приими моление нас недостойных, с верою и любовию к раце мощей твоих припадающих, и теплым к Богу ходатайством испроси граду твоему и людем от бед и напастей сохранение, обители сей, тобою созданней, утверждение и благоспеяние, подвизающимся во обители твоей исходатайствуй у Великодаровитаго Христа Бога нашего, да выну пребывают тщанием не лениви, духом горяще, Господеви работающе, в молитвах неусыпающе: в мире благочестно живущим испроси у Господа в вере твердость, во благочестии постоянство, и всем с верою прибегающим к тебе, и твоея помощи и заступления, подавай присно недугов исцеление, в скорбех утешение, во всем житии благопоспешение: наипаче же умоли Господа, в мире и покаянии земное житие преити нам, мытарств горьких и мук вечных избавитися, и Царство Небесное твоим ходатайством получити, идеже ты со всеми святыми Господу предстоиши, да выну славим Отца и Сына и Святаго Духа, ныне и в безконечныя веки веков. Аминь.

Новые молитвы

Молитвы от коронавируса

Ознакомиться

Молитвы о самоубийцах

Ознакомиться

Молитвы за скончавшихся вне своего Отечества, за безродных и убогих

Ознакомиться

Молитвы за наставников и воспитателей

Ознакомиться

Молитвы за всякого усопшего

Ознакомиться