Молитвы преподобному Феодосию Тотемскому

Молитвы преподобному Феодосию Тотемскому
Тропарь преподобному Феодосию Тотемскому, глас 1-й

От юности, преподобне Феодосие, желание твое ко Христу Богу вперил еси, егоже ради град и отечество оставль и славу суетную, яко прах вменив, последовал еси преподобному Димитрию и обители его сожитель был еси, преселився ко граду Тотьме и в междоречие вселився, постом и бдением, и власяным одеянием, и веригами тело твое удручил еси. Сего ради Бог, видев твоя труды, по преставлении твоем чудесы обогати тя: бесы изгоняеши и слепыя просвещаеши, от всяких недуг и бед избавляеши приходящия к тебе с верою и вопиющия: слава Давшему ти крепость, слава Венчавшему тя, слава Дающему тобою всем исцеление.

Ин тропарь преподобному Феодосию Тотемскому, глас 2-й

От мирскаго мятежа изшед, преподобне отче наш Феодосие, и в тихое пристанище достиг, преподобному Димитрию сожитель был еси, и оттуду, Божиим Духом направляемь, во град Тотьму преселился еси, и во отоцех водных обитель себе воздвигл еси, идеже равноангельное житие пожив, последовал еси Христу, Егоже ради власяну ризу и вериги на теле твоем носил еси. Смирением и нищелюбием украсився, славу суетную презрел еси и отеческое имение добре расточил еси, молением же к Богу и слезными струями бесы посрамил еси, темже по успении твоем Христос даром чудес обогати тя. Имея убо дерзновение ко Господу, преподобне отче наш Феодосие, моли Христа Бога, да спасет души наша.

Кондак преподобному Феодосию Тотемскому, глас 8-й

Воздержанием плоть изнурил еси и непрестанными молитвами, яко Ангел, возвысился еси, струями же слезными бесовския полки погрузил еси. И ныне во Свете невечернем ликуеши у Христа Бога и приходящим ко святому твоему гробу неоскудно исцеление подаеши, верою вопиющим тебе: радуйся, отче Феодосие Богомудре.

Величание преподобному Феодосию Тотемскому

Ублажаем тя, преподобне отче Феодосие, и чтим святую память твою, наставниче монахов и собеседниче ангелов.

Молитва преподобному Феодосию Тотемского
для исцеления слепоты и паралича, беснования

О добрый наш пастырю и Богомудрый наставниче, преподобне отче Феодосие, услыши нас, грешных, молящихся тебе и призывающих в помощь скорое предстательство твое; виждь нас, грешных, в толицех обстояниих сущих, виждь нас, немощных, отвсюду уловляемых, всякаго блага лишенных и умом от малодушия помраченных, потщися, угодниче Божий, не остави нас в греховном плену быти, да не будем в радость врагом нашим и не умрем в лукавых деяниях наших. Моли о нас, недостойных, Спаса Господа, Емуже ты со Безплотными лики предстоиши. Милостива к нам сотвори Содетеля нашего в нынешнем веце и в будущем, да не воздаст нам по делом нашим и по нечистоте сердец наших, но по Своей благости да воздаст нам, на твое бо ходатайство уповающе, твоим предстательством хвалимся, твое заступление на помощь призываем и, к цельбоносным мощем твоим припадающе, недостойнии, исцеления просим: избави нас, угодниче Христов, от злых, находящих на нас, и укроти волны страстей и бед, востающих на нас, да ради святых твоих молитв не обымет нас напасть и не погрязнем в пучине греховней и в тине страстей наших. Моли, преподобне отче Феодосие, Христа Бога нашего, да подаст нам мирное жительство, оставление грехов, душам нашим спасение и велию милость. Аминь.

Новые молитвы

Молитвы от коронавируса

Ознакомиться

Молитвы о самоубийцах

Ознакомиться

Молитвы за скончавшихся вне своего Отечества, за безродных и убогих

Ознакомиться

Молитвы за наставников и воспитателей

Ознакомиться

Молитвы за всякого усопшего

Ознакомиться