Молитвы преподобному Ферапонту Монзенскому

Молитвы преподобному Ферапонту Монзенскому
Тропарь преподобному Ферапонту Монзенскому, глас 8-й

Любовию Христовою, богомудре, просветився, и добродетельми сожительствовал еси Василию Блаженному, и, всякое наслаждение плотское возненавидев, в пустыню вселился еси, в ней же вельми подвизался еси, в жизни сей временней плоть умерщвляя свою в пениих, и во бдениих, и в пощениих. Темже и Христос даром чудес обогати тя, но поминай убо нас, чтущих пресветлую память твою, преподобне отче Ферапонте, и моли Христа Бога спастися душам нашим.

Кондак преподобному Ферапонту Монзенскому, глас 8-й

Возложив себе Богу от юности, преподобне, Того паче всех возлюбив, и Тому от всея души любовию последовал еси, тленная и красная мира нивочтоже вменив, в пустыню вселився, в ней же добре подвизался еси противу невидимых врагов козней и, яко светозарное солнце, в концех Галическия земли возсиял еси, отонудуже, веселяся, пришел еси к Небесным обителем, и ныне со ангелы Владычню престолу предстоя, поминай нас, чтущих память твою, да зовем ти: радуйся, Ферапонте, отче наш.

Величание преподобному Ферапонту Монзенскому

Ублажаем тя, преподобне отче Ферапонте, и чтим святую память твою, наставниче монахов и собеседниче Ангелов.

Молитва преподобному Ферапонту Монзенскому
для исцеления телесных недугов и защиты от всякого зла

О, преподобный отче, великий заступниче, скорый услышателю, угодниче Божий и чудотворче Ферапонте! Не забуди ны, якоже обещался еси, посещай чада твоя; аще бо и отшел еси от нас телом, но духом присно с нами пребываеши. Молим убо тя, о, преподобне отче: избави ны от огня и меча, от нашествия иноплеменных и междоусобныя брани и от тлетворных ветров и от внезапныя смерти и от всех прилог вражиих, находящих на ны. Услыши ны грешныя, приими молитву и моление наше, еже к тебе, яко кадило благовонное и яко жертву благоприятную, приносим. Умерщвленныя злыми делы, словесы и помышленьми души наша, преподобне отче, оживи и возстави. И якоже многи приходящыя к цельбоносному твоему гробу с верою, всякими скорбьми и болезньми люте страждущыя исцелил еси, тако и нас исцели от недугов душевных и телесных. Исторгни нас из глубины согрешений и на путь покаяния настави, милостивым твоим предстательством от видимых и невидимых враг избавляя. Помози нам в житии сем и во исходе душ наших и в будущей жизни, во веки веков. Аминь.

Новые молитвы

Молитвы о самоубийцах

Ознакомиться

Молитвы за скончавшихся вне своего Отечества, за безродных и убогих

Ознакомиться

Молитвы за наставников и воспитателей

Ознакомиться

Молитвы за всякого усопшего

Ознакомиться

Молитвы об ослаблении вечных мук умерших без покаяния

Ознакомиться