Молитвы преподобному Макарию, игумену Калязинскому

Молитвы преподобному Макарию, игумену Калязинскому
Тропарь преподобному Макарию, игумену Калязинскому, глас 8-й

Плотская мудрования, отче Макарие, воздержанием и бдением умертвил еси: место бо, на немже поты твоя излиял еси, яко труба вопиет к Богу, поведающи твоя исправления: и по смерти честныя твоя мощи источают исцеления. Темже вопием ти: моли Христа Бога, да спасет душы наша.

Ин тропарь преподобному Макарию, игумену Калязинскому, глас 2-й

Яко древо насажденное при водах воздержания, струями слез твоих напояем, преподобне отче Макарие, сеяв бо слезами, в радости жнеши добродетельныя рукояти; тем Великий Мздодавец плоды трудов твоих прият и в житницах Небесных тя сокровище положи, но поминай чтущих любовию пресветлую память твою и моли Святую Троицу, преподобне Макарие, спастися душам нашим.

Ин тропарь иной преподобному Макарию, игумену Калязинскому, глас 8-й

Слез твоих теченьми пустыни безплодное возделал еси, и иже из глубины воздыханьми во сто трудов уплодоносил еси, и был еси светильник вселенней, сияя чудесы, Макарие отче наш, моли Христа Бога спастися душам нашим.

Кондак преподобному Макарию, игумену Калязинскому, глас 2-й

Вышних желая, воздержанием и труды, и поты насладився, желание плоти твоея обуздав, чудес дар прием от Христа Бога, светильник явился еси пресветлый. Темже Христова Церковь песньми славит тя, преподобне Макарие отче наш.

Ин кондак преподобному Макарию, игумену Калязинскому, глас 8-й

Яко финикс псаломский во удолиих постнических процвел еси, трудов своих поты, яко плоды духовными, возвеличил еси над всеми Бога, но яко имея дерзновение ко Святей Троице, поминай нас, чтущих любовию святую память твою, да зовем ти: радуйся, преподобне Макарие, отче наш.

Величание преподобному Макарию, игумену Калязинскому

Ублажаем тя, преподобне отче Макарие, и чтим святую память твою, наставниче монахов и собеседниче ангелов.

Молитва преподобному Макарию, игумену Калязинскому
читаемая при болезнях глаз, параличе, а также для исцеления от беснования

О священная главо, преподобне отче, преблаженне авво Макарие! Не забуди убогих своих до конца, но поминай нас во святых своих и благоприятных молитвах к Богу. Помяни стадо свое, еже сам упасл еси, и не забуди посещати чад своих. Моли за ны, отче священный, за дети своя духовныя, яко имея дерзновение к Небесному Царю. Не промолчи за ны ко Господу, и не презри нас, верою и любовию чтущих тя. Поминай нас, недостойных, у Престола Вседержителева, и не престай моляся о нас ко Христу Богу: ибо дана тебе бысть благодать за ны молитися. Не мним бо тя суща мертва: аще бо и телом преставился еси от нас, но и по смерти жив сый пребываеши. Не отступай от нас духом, сохраняя нас от стрел вражиих, и всякия прелести бесовския, и козней диавольских, пастырю наш добрый. Аще бо и мощей твоих рака пред очима нашима видима есть всегда, но святая твоя душа с ангельскими воинствы, с безплотными лики, с Небесными Силами у Престола Вседержителева предстоящи, достойно веселится. Ведуще бо тя воистину и по смерти жива суща, тебе припадаем и тебе молимся: еже молитися о нас Всесильному Богу о пользе душ наших и испросити время на покаяние, и о невозбранном преитии от земли на Небо, мытарств же горьких, бесов воздушных князей и вечныя муки избавитися, и Небесному Царствию наследником быти со всеми праведными, от века угодившими Господу нашему Иисусу Христу: Емуже подобает всякая слава, честь и поклонение со Безначальным Его Отцом, и Пресвятым и Благим и Животворящим Его Духом, ныне и присно, и во веки веков. Аминь.

Новые молитвы

Молитвы от коронавируса

Ознакомиться

Молитвы о самоубийцах

Ознакомиться

Молитвы за скончавшихся вне своего Отечества, за безродных и убогих

Ознакомиться

Молитвы за наставников и воспитателей

Ознакомиться

Молитвы за всякого усопшего

Ознакомиться