Молитвы святой мученице Зинаиде Тарсийской
Агница Твоя, Иисусе, Зиноидо, зовет велиим гласом: Тебе, Женише мой, люблю, и Тебе ищущи страдальчествую и сраспинаюся и спогребаюся Крещению Твоему и стражду Тебе ради, яко да царствую в Тебе и умираю за Тя, да и живу с Тобою; но яко жертву непорочную приими мя, с любовию пожершуюся Тебе. Тоя молитвами, яко Милостив, спаси души наша.
Храм твой всечестный, яко цельбу душевную обретше, вси вернии велегласно вопием ти: дево мученице Зинаидо великоименитая, Христа Бога моли непрестанно о всех нас.
Величаем тя, страстотерпице Христова Зинаидо, и чтим честное страдание твое, еже за Христа претерпела еси.
О, прехвальная мученице Христова Зинаидо, благонадежная наша пред Господем предстательнице. Тебе припадаем и молимся: даждь нам быть причастником любве твоея к Богу и ближнему — еюже при жизни святая твоя душа преисполнена бысть. Озари нас истиною, просвети ум и сердце светом Божественнаго учения, научи нас тебе подражати верно, Бога и ближняго нашего любити и заповеди Господа совершати непогрешительно, да чада света явимся воистину. Призри благоутробно на всякую душу верных твоих почитателей, милости и помощи твоея ищущих. Буди всем нам в болезнех целительница, в скорбех утешительница, в печалех посетительница, в бедах и нуждах помощница, в час же смертный милостивая покровительница и защитительница и всем вся прошения ко благу исполни. Да при помощи молитв твоих даждь нам спасение вечное получити и Царствие Христово унаследовати, славяще дивнаго во святых своих Бога, Отца и Сына и Святаго Духа во веки веков. Аминь.