Молитвы святой праведной деве Иулиании, княжне Ольшанской

Молитвы святой праведной деве Иулиании, княжне Ольшанской
Тропарь святой праведной деве Иулиании, глас 8-й

Яко непорочная невеста Нетленнаго Жениха Христа, праведная дево Иулиание, со светлою свещею добрых дел вошла еси в чертог Его Небесный и тамо со святыми блаженства вечнаго наслаждаешися. Тем же моли, Его же возлюбила еси и Ему же девство твое обручила еси, спастися душам нашим.

Тропарь иной святой праведной деве Иулиании, глас 2-й

Девства добротами преочищена и целомудрия цветы венчавшися, Богоблаженная дево Иулиание, явилася еси миру в нетлением телеси твоем, источник исцелений и даров духовных подающи всем к тебе притекающим, и ныне, яко свеща теплая, благодати елеем возжженная, предстоящи Престолу Господа и Жениха твоего Небеснаго, Того моли, дево чистая, избавити нас от всякаго зла, чтущих память твою верою и любовию.

Кондак святой праведной деве Иулиании, глас 8-й

Храм Божий одушевленный, девственною чистотою благоукрашенный, вемы тя, святая и праведная дево, княжно Иулиание, темже, с любовию празднующе святых твоих мощей обретение, молим тя, известная желаний наших ходатаице: принеси за нас молитвы твоя ко Господу и от всяких бед свобождай нас предстательством твоим у Престола Всевышняго, да зовем ти: радуйся, дево святая Иулиание, невесто Христова прекрасная.

Кондак иной святой праведной деве Иулиании, глас 8-й

Приводим Ти, о Всещедре, Иулианию, присносветящую свещу, елеем благодати обдержимую, немощным цельбу. Еяже молитвами от всякаго зла свободи нас и спаси всех, иже Тя с поклонением величают.

Величание святой праведной деве Иулиании

Величаем тя, святая праведная дево Иулиание, и чтим святую память твою, ты бо молиши за ны Христа Бога нашего.

Молитва святой праведной деве Иулиании
при душевных болезнях

О, святая праведная дево Иулиание, княжно Ольшанская, помощнице всем жаждущим спасения исцеления от болезней душ и телес! О, святая агнице Божие, яко имея дар мнози болезни целити и от всех козней врагов ограждати, исцели убо наша страсти душевныя и облегчи тяжкия болезни телесныя, отраду в скорбех даруй и избави нас от всяких бед и напастей. Призри на вся предстоящия честным твоим мощем (иконе) просящим твоея помощи сердцем сокрушенным и духом смиренным, да принесем во всем житии нашем плоды духовныя: любовь, благость, милосердие, веру, кротость, воздержание, да сподобимся жизни вечныя и да любовию твоею ограждаеми, поем прославльшему тя Господу Иисусу Христу. Ему же подобает всякая слава и честь со Безначальным Его Отцем и Пресвятым Животворящим Его Духом, ныне и присно, и во веки веков. Аминь.

Новые молитвы

Молитвы от коронавируса

Ознакомиться

Молитвы о самоубийцах

Ознакомиться

Молитвы за скончавшихся вне своего Отечества, за безродных и убогих

Ознакомиться

Молитвы за наставников и воспитателей

Ознакомиться

Молитвы за всякого усопшего

Ознакомиться