Молитвы святому благоверному царевичу Димитрию Угличскому и Московскому

Молитвы святому благоверному царевичу Димитрию Угличскому и Московскому
Тропарь святому благоверному царевичу Димитрию Угличскому, глас 1-й

Царскую диадиму обагрил еси кровию твоею, богомудре мучениче, за скиптр крест в руки приим, явился еси победоносец, в жертву непорочну Владыце принесл еси себе, яко бо агнец незлоблив от раба заколен еси, и ныне радуяся предстоиши Святей Троице. Моли Христа Бога спастися душам нашим.

Тропарь святому благоверному царевичу Димитрию Угличскому, глас 4-й

Всеоружеством Духа благодати вооружен быв и необорим столп и утверждение отечеству своему показася, яко агнец незлобивый, от врага неправедно заклан быв и в жертву непорочну Господеви принесеся. И ныне дар благодати от всех Подвигоположника прием, источаеши всем исцеление, достохвальне благоверный царевичу княже Димитрие. Слава Восприимшему тя от земных в Небесная, слава Венчавшему тя венцем неувядаемым, слава Действующему тобою всем исцеление.

Тропарь святому благоверному царевичу Димитрию Угличскому, глас 8-й
перенесение мощей

Днесь вельми хвалится царствующий град Москва, имея в себе праведныя твоя мощи, благоверне царевиче Димитрие, яко цвети благоуханныи, пребываеми во святем храме, просвещение подают душам и телом нашим. Тем радостно тя восхваляем, и честное пренесение мощей твоих верно почитаем, и молим тя: моли Христа Бога даровати нам велию милость.

Кондак святому благоверному царевичу Димитрию Угличскому, глас 8-й

Возсия днесь в славней памяти твоей верным веселие, яко бо доброрасленный грезн, прозябл еси и Христу красен плод принесл еси себе; темже и по убиении твоем соблюде тело нетленно, страдальчески обагренное кровию. Благородне святе Димитрие, соблюдай отечество твое и град твой невредим, тому бо еси утверждение.

Молитва первая святому благоверному царевичу Димитрию Угличскому
о покровительстве сиротам, инвалидам и беспризорникам

О преславный и дивный в чудесех, красото мучеников, страстотерпче княже царевичу Димитрие! Скоро предстани Небесному Царю и мученическия твоя руце о нас, грешных, молебне к Нему простри, яко имеяй дерзновение велие. Сохрани же твоими молитвами град сей и вся грады и веси православныя, и святейшия патриархи и преосвященныя митрополиты, архиепископы и епископы, и весь священный чин церковный, и вся православныя христианы; всех нас приими в твое заступление, от всех бед и зол избавляя и от нашествия видимых и невидимых борющих нас врагов свобождая, и тех всяк навет и злохитрство погубляя и отгоняя; таже прегрешений наших прощение испроси и в век будущий небеснаго царствия нас сподоби и спасенных Богу представи, благодатию и человеколюбием Господа и Спаса нашего Иисуса Христа, Ему же честь и поклонение подобает, ныне и присно и во веки веков. Аминь.

Молитва вторая святому благоверному царевичу Димитрию Угличскому
о возрождении России

О святый мучениче, благоверный царевичу и княже Димитрие! Яко агнец незлобив от раба заколенный, венцем царским от Господа венчался еси, и сын царев быв, мученик непобедим явился еси, и вместо земных и тленных на небеси нетленная восприял еси. И ныне предстоя в радости Святей Троице, посещай творящих верно твою светоносную память: соблюдай отечествие твое и град твой невредим, тому бо еси утверждение: утверди православных жительство в мире глубоце: междоусобную брань укроти, и вся полезная даруй всегда людем молитвами твоими, да верою и любовию вопием ти: радуйся, святе Димитрие, верных людей теплый заступниче и прибежище и земли Российския украшение. Аминь.

Молитва третья святому благоверному царевичу Димитрию Угличскому
о прощении грехов, избавления от бед и напастей

О великий и милостивый страстотерпче, царевичу княже Димитрие! Услыши нас, грешных, моление со усердием тебе приносящих, и помози нам в жизни сей, от грехов и скорбей избавляя, и в будущем веце буди помощник и заступник, от мучений адовых свобождая и сподобляя купно с тобою покланятися и воспевати Всесвятую Троицу, Отца и Сына и Святаго Духа, ныне и присно и во веки веков. Аминь.

Новые молитвы

Молитвы от коронавируса

Ознакомиться

Молитвы о самоубийцах

Ознакомиться

Молитвы за скончавшихся вне своего Отечества, за безродных и убогих

Ознакомиться

Молитвы за наставников и воспитателей

Ознакомиться

Молитвы за всякого усопшего

Ознакомиться