Блаженство Евангельское возлюбив, Богомудре княже Андрее, чистоту сердца девством почтил еси, и суету мира сего презрев, устремился еси зрети Бога, Иже тя прослави чудесы во врачевании различне страждущих. Сего ради молим тя: проси нам у Христа Господа от всяких скорбей избавления и получения Царствия Небеснаго.
Град твой Смоленск, яко чужд, имея, водворился еси во град Переяславль, и в дому святителя Николая жестоким житием временную жизнь совершив, востекл еси в горняя предстояти Христу; Егоже моли о творящих память твою, да вси вопием ти: радуйся, святе княже Андрее, ангелом собеседниче и человеком помощниче.
Возвысився на добродетель и, очистив ум свой, к желанию прекрасному достигл еси, безстрастием украсився своим пощением изрядно, в молитвах безплотно вознесеся и возсия в мире, яко солнце, во граде Переяславле, отче преблаженне, святе княже Андрее Смоленский, моли спастися душам нашим.
Насажден во дворех Господних своими преподобными детельми, в дому святаго чудотворца Николая красно процвел еси, мира красоту и славу сего света нивочто вменив, единаго Христа возлюбил еси; слез твоих течением напаяем, уязвился еси желанием будущих даров. Темже зовем ти: радуйся, святе княже Андрее Смоленский, граду Переяславлю похвало и всей Российстей земли великое утверждение.
О преизрядный и дивный в чудесех, прославляемый от Бога в небеси, делателю Христова винограда, жителю вышняго Сиона, предустроеннаго града Иерусалима! Святых Ангел присная радость и человеком дивная благость, пречудных и дивных небесных селений быв желатель, а ныне со всеми святыми тех еси совосприятель. Аще естеством ты, святе княже Андрее, и был еси человек, но усердно в подвизех потщався и получил нескончаемый будущий век. Странен и пришелец на земли был еси, того ради получил житие в небеси. Оставив отечество земное и тленное, восприял еси нетленное и вечное. Сугубо тя Господь Бог увенча и чудес тебе дар дарова, еже на земли недуги исцеляти и приходящим к тебе с верою милостивно присещати; прояви бо тя нам Господь Бог милосердый, яко отец к болящим чадом благосердый. Сего ради милися деем, предстояще пред твоим многоцелебным гробом, просити и молити тя недоумем, да покрыеши нас грешных твоим предивным покровом, не от злата и серебра истканным, но от Бога ти в благодати поданным. Предстоим умильно пред твоим гробом со страхом, осквернившиися во гресе всяком; сего ради слезы проливаем и умильно к тебе взываем: помилуй нас, о святый и дивный благоверный великий княже Андрее, подаждь нам руку помощи и Божия милости. Ходатая тя к Богу предлагаем, от Негоже нам помощи желаем; вемы бо тя неложна раба Божия, избави нас от всякаго навета вражия. Буди о нас милостивый защититель и от болезней наших скор исцелитель. Свободи от руки чуждаго и от всякаго прилога злаго. Многими бедами есмы обстоими, всеми злыми скорбьми сокрушенши, к дверем смертным от скорби снидохом, и Бога грехами прогневахом, и от себе Его удалихом. Сего ради буди нам вождь и заступник, ходатай и защитниче, ко Господу нашему Иисусу Христу и к Его милосердому Отцу и Святому Духу, в триех ипостасех единому Богу, да получим мы грешнии грехов прощение и от Него милость многу. Буди, о святче Божий, споборник и заступник всему Христолюбивому воинству на вся неправославныя и крестоненавистныя злочестивыя и иноплеменныя враги и супостаты, память их злочестивыя веры да потребится, храбрость же и сила и грады да разрушатся, Русскую же нашу страну не забуди, но присно на ню призирай, и всякаго изобилие плодов земных подати Бога умоляй, и всем призывающим тя с верою во всяких скорбех, болезнех и напастех буди вспомогатель и скор исцелитель. Даруй же нам здравие неоскудно и молящимся тебе помощь неослабну, благодатию и щедротами и человеколюбием Господа Бога и Спаса нашего Иисуса Христа, Емуже от нас буди слава и держава, ныне и во вся веки нескончаемых веков. Аминь.
О святый благоверный княже Андрее, подаждь нам, рабам Божиим (имена), руку помощи и избави нас от всякаго навета вражия: буди нам милостивый защититель и от болезней наших скорый целитель: свободи нас от руки чуждаго, и от всякаго прилога злаго. Се бо многими бедами есмы обстоими, всеми злыми скорбьми сокрушеннии, ко дверем смертным, от скорби снидохом и Бога грехми прогневахом и от себе Его удалихом. Темже буди нам вождь и заступник пред Господем нашим Иисусом Христом, Емуже славу возсылаем со Безначальным Его Отцем и Святым Духом во веки. Аминь.
Владыке Человеколюбче, Царю небесный, Господе Иисусе Христе, Боже наш! Нас ради человеков и нашего ради спасения на земли с плотию явися и с человеви поживи: молим тя, Вседержителю Господи, долготерпеливе и многомилостиве, даждь нам всегда пред Тобою имети мысль благу и Тебе благоугодну, да и мрачнаго зла диавола свободившеся, со всяким усердием поработаем Тебе в преподобии и правде и истине, со страхом и трепетом во вся дни живота нашего, и до последняго издыхания воспевати Тя будем во славословии всегда бодренно и трезвенно; вся бо Ти возможна суть и без твоея воли ничтоже есть, твориши бо вся, елика хощеши творити и елика Твое неизреченное благоволит благоутробие. Како убо молчит язык наш, или киими песньми во хвалении не воспоем о Твоем к нам великом милосердии и благоутробии, яко таковыя радости нас грешных и веселия духовнаго исполнивый? Како убо возможем воспети языки нашими или киими усты восхвалити и возвеличити неизреченную Твою к нам благодать, еже показа нам такова праведника днесь? О Владыко Человеколюбче, Боже наш, Господи Иисусе Христе! Услыши нас недостойных, молящихся Тебе, и посли в помощь к нам праведнаго сего Твоего угодника, благовернаго князя Андрея, яко да молитвами его свободимся от всяких напастей душевных и телесных, ибо мы, прибегающе ко гробу его, покланяемся и целуем с верою святый его образ, подавает бо молящимся многая чудеса и исцеления. О дивный в чудесех, прославляемый от Бога в небесех, святый благоверный княже Андрее, молися о нас грешных ко Христу Богу, да помилует нас всех, приходящих ко гробу твоему и молящихся тебе с верою, и поклоняющихся образу святому твоему и с любовию целующих его, и призывающих тя на помощь во всяких скорбех и напастех: буди теплый вспомогатель и в болезнех скор исцелитель, даруй же нам здравие неоскудно и помощь неослабну молящимся тебе, буди же помощник и заступник сиротам безпомощным и вдовицам, и всем подаждь вся, яже ко спасение и пользе просимая, и святыми твоими молитвами защити, соблюди и сохрани Российския грады и страны от всех зол, болезней, напастей и навет вражиих и от нахождения иноплеменных и междоусобныя брани. Ты убо, предстоя у престола Владычня, молися о нас грешных ко Христу Богу нашему, яко Тому подобает всякая слава, честь, поклонение и великолепие, купно со Отцем и со Святым Духом, ныне и присно и во веки веков. Аминь.