Молитвы святому благоверному князю Феодору и чадам его Давиду и Константину Ярославским

Молитвы святому благоверному князю Феодору и чадам его Давиду и Константину Ярославским
Тропарь святому благоверному князю Феодору и чадам его Давиду и Константину Ярославским, глас 4-й

Измлада явистеся святии, Богомудре Феодоре и блаженне Давиде с Константином славным, Божественный сосуди, избранный Богови. Ныне же источаете нам многа исцеления от честных мощей ваших, вся ереси потопляюще, и спасающе присно град свой, и всех верных сохраняюще невредимо от видимых и невидимых враг. Темже верою молим вас, святии: молите Христа Бога в мире сохранитися нам и спасти души наша.

Тропарь святому благоверному князю Феодору и чадам его Давиду и Константину Ярославским, глас 4-й
на преставление

От юности вашея Христове любви прилепившеся, святии, усердно закон и оправдания Того сохранисте; отонудуже и чудесными дарованьми обогатившеся, исцеления источаете, Феодоре, Давиде и Константине, о верою вас почитающих, молите Христа Бога спастися душам нашим.

Тропарь святому благоверному князю Феодору и чадам его Давиду и Константину Ярославским, глас 8-й
на перенесение мощей

Яко звезды многосветлыя от юности возсиявше, осветили есте сердца верных пренесением честных мощей ваших, во плоти, яко ангели, на земли показастеся, пощением насаждени бысте, яко древа, при водах воздержания, напоени струями слез ваших, и скверну омысте. Сего ради явистеся приятелища Божия Духа, Феодоре, и Давиде, и Константине, молите Христа Бога спастися душам нашим.

Ин тропарь святому благоверному князю Феодору и чадам его Давиду и Константину Ярославским, глас 4-й

Иже от юности Христовы любве прилепившеся усердно, святии законы и оправдания Того сохраняюще, отнюдуже и чудесными даровании обогатистеся, исцеления источаете иже верою вас почитающих, темже молите Христа Бога спастися душам нашим.

Ин тропарь иной святому благоверному князю Феодору и чадам его Давиду и Константину Ярославским, глас 4-й

Яко апостолом сопричастницы и врачеве предобрии, служители Богоприятнии, памяти вашей Божественней притекающим, святии Богомудрии, достоблаженнии, благочестивии князи, новоявленнии чудотворцы Феодоре, и Давиде, и Константине, сошедшеся любовию в память вашу светло празднуем, в песнех и пениих радующеся, Христа славяще, таковую благодать даровавшего вам исцелением, граду вашему Ярославлю великое утверждение.

Кондак святому благоверному князю Феодору и чадам его Давиду и Константину Ярославским, глас 8-й

Богомудренно преселистеся, святии, во град, присно добродетельми цветущий, в жизни сей приносяще Богови плоды благи, преподобне Феодоре и блаженне Давиде с Константином славным, и явистеся, яко многоцветущая райская древеса жизни и яко многосветлыя звезды, в мире сияюще благодатию, в добродетели исправивше жизнь свою, и сего ради получисте живот вечный на Небесех. Темже благодарственно вам зовем: радуйтеся, всемирнии светильницы и граду нашему Ярославлю великое утверждение.

Кондак святому благоверному князю Феодору и чадам его Давиду и Константину Ярославским,, глас 4-й
на преставление

Явися велие солнце Христове Церкви, просвещая учением светлостьми, всечестне, яко черпалом златым от кладязя неископаннаго чудес почерпл еси от Источника неистощимаго на успение свое приспел еси, всеблаженне Феодоре, ныне всем даеши грехов прощение.

Кондак святому благоверному князю Феодору и чадам его Давиду и Константину Ярославским, глас 8-й
на перенесение мощей

Явистеся светильницы всесветлии, во плоти яко ангели, и яко жизни древеса райская, пощением, бдением и верою возращаеми, процвели есте молитвами вашими, небесныя благодати приемше. Врачеве же крепцы явльшеся, исцеляете недугующих души, с верою прибегающих к раце мощей ваших, чудотворцы славнии, Феодоре, Давиде и Константине. Молите Христа Бога грехов оставление даровати, верою и любовию чтущим память вашу.

Ин кондак святому благоверному князю Феодору и чадам его Давиду и Константину Ярославским, глас 8-й
на перенесение мощей

Яко светильницы и врачеве преизряднии явистеся, верним сердцем озаряюще добродетельми чудес ваших, в плоти бо на земли благоугодители, Иже во святых Прославляемому непрестанно молите о всех нас.

Величание святому благоверному князю Феодору и чадам его Давиду и Константину Ярославским

Величаем вас, святии благовернии князие Феодоре, Давиде и Константине, и чтим святую память вашу, вы бо молите за нас Христа Бога нашего.

Молитва первая святому благоверному князю Феодору и чадам его Давиду и Константину Ярославским
об укреплении веры

О угодницы Божии, святии и благовернии князи Феодоре, Давиде и Константине! Прострите благоприятныя молитвы ваши ко Господу и Создателю нашему и умолите Его благость даровати нам (имена) вся к вечному спасению потребная, таже и к житию сему временному нужная: веруем бо несомненно, яко вся возможна, вам, яко истинным Его угодником. Ей, чудотворцы святии! Не посрамите упования нашего, но молитвами вашими сотворите нас наследники быти Царствия Христова, да прославляем человеколюбие в Троице славимаго и покланяемаго Бога, Отца и Сына и Святаго Духа, и ваше святое заступление, во веки веков.

Молитва вторая святому благоверному князю Феодору и чадам его Давиду и Константину Ярославским
о спасении России, защиты от зла и недругов, для утешения в скорби и печали

О велиции угодницы Божии и чудотворцы, святии и благовернии князе Феодоре, Давиде и Константине, припадающе к святым и многоцелебным мощем вашим, молим вы со смирением, верою и любовию: прострите благоприятные молитвы ваша ко Господу и Создателю нашему, и умолите Его благость, даровати нам вся нужная к житию сему временному, и потребная к вечному спасению нашему: веруем бо несумненно, яко вся возможна вам, яко истинным Его угодником. Сего ради просим вы: испросите нам у Царя царствующих и Господа господствующих страждущую страну Российскую от лютых безбожник и власти их Господь да свободит, верных рабов Его, в скорби и печали день и нощь вопиющих к Нему, многоболезный вопль да услышит и да изведет от погибели живот наш. Испросите престольным градом, граду нашему и всем градом Российским благополучие, изобилие и от злых сохранение, всем же правоверным людем, почитающим вас, и на поклонение мощем вашим святым приходящим, милость Божию и благих прошений скорое исполнение. Ей, чудотворцы святии, не посрамите упования нашего, но молитвами вашими сотворите нас наследники быти Царствия Христова: да прославляем человеколюбие в Троице славимаго и поклоняемаго Бога, Отца и Сына, и Святаго Духа, и ваше святое заступление во веки веков. Аминь.

Новые молитвы

Молитвы о самоубийцах

Ознакомиться

Молитвы за скончавшихся вне своего Отечества, за безродных и убогих

Ознакомиться

Молитвы за наставников и воспитателей

Ознакомиться

Молитвы за всякого усопшего

Ознакомиться

Молитвы об ослаблении вечных мук умерших без покаяния

Ознакомиться