Молитвы святому благоверному князю Всеволоду Псковскому

Молитвы святому благоверному князю Всеволоду Псковскому
Тропарь святому благоверному князю Всеволоду Псковскому, глас 4-й

Из млада явился еси, Богомудре княже Гаврииле, Божественный сосуд, избран Богови, благочестием воспитан, веру непорочну соблюд и многи святыя церкви устроив, изгнание претерпел еси от своих, якоже и целомудрии прародители твои от брата убиение. С нимиже предстоя Святей Троице, молися, стране нашей сохраненной быти и всем нам спастися.

Тропарь святому благоверному князю Всеволоду Псковскому, глас 4-й
на обретение мощей

Наста днесь всечестный новый праздник, обретение честных мощей блаженнаго князя Гавриила, веселящи изрядно всех благочестивых множества, темже, вси вернии, сошедшеся во святый храм Живоначальныя Троицы, возопием: блаженне княже Гаврииле, имея дерзновение ко Христу Богу, моли спастися празднующим любовию память твою.

Кондак святому благоверному князю Всеволоду Псковскому, глас 8-й

Многомудренно преселився во град Псков блаженне княже Гаврииле, плод благий Богови в жизни сей был еси, присноцветущ добродетельми, и якоже Давид незлобием. Того ради получил еси жизнь вечную на Небесех, всегда зря Святую Троицу. Моли избавитися нам от всяких бед, да зовем ти: Радуйся утверждение граду нашему.

Кондак святому благоверному князю Всеволоду Псковскому, глас 8-й
на обретение мощей

Возвеселися, Христова Церковь, имущи в себе источника чудесем обильна. Днесь, любовию сошедшеся в тя, людие твои, во обретение честных мощей блаженнаго князя Гавриила, воспоем песнь единому Богу в Троице, радующеся, сподобльшаго нас видети пречестное сокровище, мощи его, от мног лет сокровенны, напоследок же нам явлены. Яко да молитвами его к Богу от всех находящих зол избавимся и радостною душею и веселием сердца благодарная воспоем, глаголюще: Радуйся, утверждение граду нашему.

Величание святому благоверному князю Всеволоду Псковскому

Величаем тя, святый благоверный княже Гаврииле, и чтим святую память твою, ты бо молиши за нас Христа Бога нашего.

Молитва первая святому благоверному князю Всеволоду Псковскому
при голоде, о мужестве в искушениях

О, великий угодниче Божий и преславный чудотворче, святый благоверный княже Всеволоде Гаврииле, града Пскова и всея державы Российския небесный заступниче и покровителю, и всех нас усердный пред Богом предстателю и защитителю! Предстоя Престолу Великаго Царя и Бога нашего, в Троице Святей славимаго и покланяемаго, велие дерзновение имаши к нему, яко верный раб Его и угодник. К тебе убо, яко сроднему нам и многомощному пред Господем ходатаю, прибегаем мы грешнии и недостойнии и умиленно просим тя: моли Триединаго Бога, да отвратит от нас гнев свой, праведно по делом нашим на ны движимый, и презрев безчисленныя прегрешения наша, обратит нас на путь покаяния и спасения. Огради молитвами твоими в мире живот наш, и во всем благом благое поспешение и вся, яже к животу и благочестию потребная, нам даровати испроси. И якоже древле град твой Псков от пленения и разорения ратнаго дивно избавил еси, тако и ныне нас и вся грады и веси страны нашея от всяких напастей и бед, и напрасныя смерти, предстательством твоим избави, и от всех враг видимых и невидимых покровом твоим защити. Моли присно милостиваго Бога: страждущую страну Российскую от лютых безбожник и власти их да свободит, и да возставит престол православных правителей, верных рабов Его, в скорби и печали день и нощь вопиющих к нему, многоболезный вопль да услышит и да изведет от погибели живот наш, да тихое и безмолвное житие поживем во всяком благочестии и чистоте, и тако в мире временное сие житие прешедше, в вечный достигнем покой, и сподобимся Небеснаго Царствия, славяще Отца и Сына и Святаго Духа и твое святое заступление, во веки веков. Аминь.

Молитва вторая святому благоверному князю Всеволоду Псковскому
о наставлении на путь истинный

О святый княже Всеволоде-Гаврииле! К тебе убо прибегаем мы, грешнии раби Божии (имена), и умиленно просим тя: моли Всеблагаго Бога, да отвратит от нас гнев Свой, праведно, по делом нашим, на ны движимый, и, презрев безчисленная прегрешения наша, обратит нас на путь покаяния и спасения. Огради молитвами твоими в мире жизнь нашу и во всем благое поспешение и вся к животу и благочестию потребная нам даровати испроси, да тихое и безмолвное житие поживем во всяком благочестии и чистоте и сподобимся Небеснаго Царствия, славяще Отца и Сына и Святаго Духа и твое заступление, во веки веков.

Новые молитвы

Молитвы о самоубийцах

Ознакомиться

Молитвы за скончавшихся вне своего Отечества, за безродных и убогих

Ознакомиться

Молитвы за наставников и воспитателей

Ознакомиться

Молитвы за всякого усопшего

Ознакомиться

Молитвы об ослаблении вечных мук умерших без покаяния

Ознакомиться