Молитва Святому Царю Страстотерпцу Николаю II

Молитва Святому Царю Страстотерпцу Николаю II
Тропарь Святому Царю Страстотерпцу Николаю II, глас 5
из Службы Святым Царственным Мученикам

Царства земнаго лишение, узы и страдания многоразличныя кротко претерпел еси, свидетельствовав о Христе даже до смерти от богоборцев,страстотерпче великий Боговенчанный царю Николае, сего ради мученическим венцем на Небесех венча тя с царицею, и чады, и слуги твоими Христос Бог, Егоже моли помиловати страну Российскую и спасти души наша.

Кондак Святому Царю Страстотерпцу Николаю II, глас 3-й

Мирликийскому предстателю подражатель, благоверный Царю Николае Вторый чудотворец показался еси. Христово бо Евангелие исполнив, положил еси душу твою за люди твоя и спасл еси неповинныя, паче же повинныя от смерти. Сих ради мученическою кровию освятился еси, яко великомученик Церкви Христовы.

Величание Святому Царю Страстотерпцу Николаю II

Величаем тя, Страстотерпче Царю Мучениче Николае, и чтем честная страдания твоя, яже во Христе за Россию потерпел еси.

Молитва первая Святому Царю Страстотерпцу Николаю II
о покровительстве русским воинам, о спасении России

О святый страстотерпче, царю мучениче Николае! Господь тя избра помазанника Своего, во еже милостивно и право судити людем твоим и хранителем церкви православныя быти. Сего ради со страхом Божиим царское служение и о душах попечение совершал еси. Господь же, испытуя тя, яко Иова многострадальнаго, попусти ти поношения, скорби горькия, измену, предательство, ближних отчуждение и в душевных муках земнаго царство оставление. Вся сия ради блага России, яко верный сын ея, претерпев и, яко истинный раб Христов, мученическую кончину прием, Небеснаго Царства достигл еси, идеже наслаждаешися вышния славы у престола всех Царя, купно со святою супружницею твоею, царицею Александрою, и царственными чады Алексием, Ольгою, Татияною, Мариею и Анастасиею. Ныне, имея дерзновение велие у Христа Царя, моли, да простит Господь грех отступления народа нашего, и подаст грехов прощение, и на всякую добродетель наставит нас, да стяжим смирение, кротость и любовь и сподобимся Небесного Царствия, идеже купно с тобою и всеми святыми новомученики и исповедники российскими прославим Отца и Сына и Святаго Духа, ныне и присно, и во веки веков. Аминь.

Молитва вторая Святому Царю Страстотерпцу Николаю II
о помощи в учебе

О, святый страстотерпче Царю Мучениче Николае, ты еси отец чадолюбивый народа твоего, всепрощающее и милостивое сердце от нас, многогрешных, не отвративый, любовию Христовою нас покрывый до последния капли царственныя твоея крове. Предстательством твоим перед Господом сохраняеми есм даже доныне. Вемы, яко слышиши нас в скорбех наших и болезнех, и ходатайством твоим услышит нас и Царь Небесный и подаст прощение множества грехов наших. О молитвенниче о державе Российстей, ты еси воистину ея и верным слугам ея образ чести. Испроси у Господа мужам, отцам и чадам нашим чести обновления и в трудех повседневных мужества и благодушнаго терпения, народу православному - в вере стояние и всем нам чистоту душевную. Кротостию Христовою твоею обрати ожесточенные сердца наша, чадом нашим (чаду нашему), в страстях погрязшим и слепотою духовною недугующим, исходатайствуй избавление от растлевающих зол: винопития, наркомании, азартных увлечений и всякого разврата душевного и телеснаго, да в уме и совести отрезвятся благодатию свыше. Помози нам (...мне, ...чаду моему, ...чадам моим и т.п.), о, дивный Царю Мучениче наш святый Николае, да очистится от грехов род наш и сохранится в богоугодном житии до второго пришествия Спасителя нашего Иисуса Христа, Ему же слава, честь и поклонение, всегда ныне и присно и во веки веков. Аминь.

Молитва третья Святому Царю Страстотерпцу Николаю II
от бед и напастей

О святый новомучениче страстотерпче Царю Николае, ты от Господа избран и помазан был еси, во еже милостивно и право судити людем твоим и хранителем Державы Православныя быти, и царское свое служение и о душах попечение со страхом Божиим совершил еси. Испытуя же тя, яко злато в горниле, скорби горькия, яко же Иову Многострадальному, попусти ти Господь, последи же — престола царскаго лишение и смерть мученическую. Ты же вся сия кротко и безропотно претерпел еси, яко истинный раб Христов, и сего ради ныне наслаждаешися вышния славы у Престола всех Царя, купно со всеми святыми мученики. Мы же, аще и недостойни есмы, множества грех наших ради, молим тя, славне Царю страстотерпче Николае, умоли Господа о нас, да не отвратит лице Свое до конца, да не лишит народ наш избранничества Своего, но да подаст нам разум спасения, во еже восстати нам из глубины падения. Ты бо, святе Царю Николае, имаши дерзновение велие, яко кровь свою за народ свой пролиял еси и душу положил еси не токмо за други, но и за враги своя, и сего ради предстоиши ныне в невечернем свете Царю славы, яко верный слуга Его. И тако буди нам ходатай и заступник и приклони на милосердие правосудие Божие, да не погубит нас до конца Господь, но да простит вся, и милостивно помилует, и спасет святую землю Русскую, и народ ея от всяких бед и напастей защитит. О святый и славный наш Царю страстотерпче Николае, предстательством твоим и молитвами Святаго семейства твоего, невинно убиенных Царицы Александры, Царевича Алексия, Царевен Ольги, Татианы, Марии и Анастасии, да подаст нам Господь грехов прощение и на всякую добродетель наставит нас, да стяжем смирение, кротость и любовь, ихже вы, святии мученицы, явили есте. И да возродится в народе нашем вера и благочестие, и да дарует нам паки Господь Самодержца благочестиваго, во еже восставити в Российстей земли престол Царей православных. Да прославим Бога, и послужим Ему верно до скончания века на земли, и сподобимся царствия Его на небеси, идеже купно с тобою и со всеми новомученики и Исповедники Российскими, и со всеми святыми воспевати будем славу Отцу и Сыну и Святому Духу, ныне и присно и во веки веков. Аминь.

Молитва четвёртая Святому Царю Страстотерпцу Николаю II
краткая об искуплении грехов

Господи, Боже наш, Великий и Многомилостивый! Во умилении сердец наших, смиренно молимся Тебе: сохрани под кровом Твоея благости от всякаго злаго обстояния Благоверного Государя и Отца нашего, избранного Тобою рода Романовых (его же имя Ты, Господи, веси). Огради Его на всех путех Его святыми Твоими ангелы, да ничтоже успеет враг на Него, и сын беззакония не приложит озлобити Его: исполни Его долготою дней и крепостию сил. Да совершит вся во славу Твою и во благо людей Своих. Мы же, Всеблагому Твоему Промышлению о Нем радующеся, благословим и прославим Всесвятое Имя Твое, Отца и Сына и Святаго Духа, ныне и присно и во веки веков. Аминь.

Молитва пятая Святому Царю Страстотерпцу Николаю II
читаемая при гонениях и в заточении

О святый великий Российский Царю и страстотерпче Николае! Вонми гласу моления нашего и вознеси ко Престолу всевидящаго Господа стенания и воздыхания народа Русскаго, некогда богоизбраннаго и благословеннаго, ныне же падшаго и от Бога отступившаго. Разреши клятвопреступление, доселе тяготеющее над народом Русским. Тяжко бо согрешихом, отступивше от Царя Небеснаго, оставльше веру православную на попрание нечестивых, преступльше клятву соборную и не возбранивше убиению твоему, Семьи твоея и верных слуг твоих.

Не бо послушахом повеления Господня: «Не прикасайтеся помазанным Моим» паки же Давиду глаголющу: «Иже прострет руку на Помазанника Господня, не Господь ли поразит его?» И се ныне достойная по делом нашим приемлем, тяготеет бо даже до дне сего на нас грех царския крови пролития.

Доныне оскверняются святыни наши. Блуд и беззаконие не оскудевают от нас. Чада наши преданы на поругание. Вопиет к небу кровь невинная, на всякий час в земле нашей проливаемая.

Но виждь слезы и сокрушение сердец наших, каемся бо, якоже киевляне некогда пред князем Игорем, ими умученным; якоже владимирцы пред князем Андреем Боголюбским, ими убиенным, и просим: умоли Господа, да не отвратится от нас до конца, да не лишит народ Русский великаго избранничества Своего, но да подаст нам разум спасения, во еже восстати нам из глубины падения сего.

Имаши бо, Царю Николае, дерзновение велие, ты бо кровь свою пролиял еси за народ свой, и душу положил еси не токмо за други, но и за враги своя. Сего ради предстоиши ныне в Невечернем Свете Царю Славы, яко верный слуга Его. Буди нам ходатай и заступник, и охранитель. Не отвратися от нас, и не остави нас на попрание нечестивых. Даруй нам силы на покаяние, и правосудие Божие приклони на милосердие, да не погубит нас до конца Господь, но да вся простит и милостивно помилует, и спасет землю Русскую и народ ея. Да избавит же Отечество наше от постигших бед и напастей, возродит веру и благочестие, восставит же престол Царей православных, еже сбытися пророчествам угодников Божиих. И да прославят люди Русские по всей вселенней всехвальное имя Господне и верно послужат Ему до скончания века, воспевая славу Отцу и Сыну и Святому Духу ныне и присно и во веки веков. Аминь.

Новые молитвы

Молитвы от коронавируса

Ознакомиться

Молитвы о самоубийцах

Ознакомиться

Молитвы за скончавшихся вне своего Отечества, за безродных и убогих

Ознакомиться

Молитвы за наставников и воспитателей

Ознакомиться

Молитвы за всякого усопшего

Ознакомиться