Молитвы святому великомученику Никите Готфскому

Молитвы святому великомученику Никите Готфскому
Тропарь святому великомученику Никите Готфскому, глас 4-й

Крест Христов яко некое оружие усердно восприим, и к борению врагов притекл еси, и за Христа пострадав, посреде огня священную твою душу Господу предал еси, отонудуже и даров исцеление от Него сподобился еси прияти, великомучениче Никито, моли Христа Бога, спастися душам нашим.

Кондак святому великомученику Никите Готфскому, глас 2-й

Прелести посек державу стоянием твоим, и победы приим венец во страдальчествех твоих, со Ангелы славне радуешися Никито тезоимените, с ними Христа Бога моля непрестанно о всех нас.

Величание святому великомученику Никите Готфскому

Величаем тя, страстотерпче святый Никито, и чтим честная страдания твоя, яже за Христа претерпел еси.

Молитва первая святому великомученику Никите Готфскому
чтимая при порче детей, а также исцеления от «родимца»

О, великий страстотерпче Христов и чудотворче, великомучениче Никито! Припадающе ко святому и чудотворному образу твоему, подвиги же и чудеса твоя и многое сострадание твоё к людем прославляюще, молим тя прилежно: яви нам смиренным и грешным святое и многомощное твое заступление. Се бо, грех ради наших, не имамы свободы чад Божиих, еже о потребах наших Господа и Владыку нашего дерзновенно просити: но тебе, молитвенника к Нему благоприятнаго предлагаем и о твоем предстательстве взываем: испроси нам у Господа благопотребныя дары душам и телесем нашим: веру правую, спасения надежду несомненную, любовь же ко всем нелицемерную, во искушениих мужество, в злостраданиих терпение, в молитвах постоянство, душ и телес здравие, земли плодоносие, воздуха благорастворение, житейских потреб довольство, мирное и благочестное на земли житие, христианскую жития кончину и добрый ответ на Страшнем Суде Христове. И всем людем православным яви твое святое заступление: болящия исцели, скорбящия утеши, бедствующим помози. Ей, угодниче Божий и мучениче долготерпеливый! Не забуди святую обитель твою и вся живущия в ней и подвизающияся инокини же и мирския, но поспеши им во смирении и терпении носити иго Христово, и от всяких бед и искушений милостивне избави. Всех убо нас приведи в тихое пристанище спасения и наследники сподоби быти пресветлаго Царствия Христова святыми твоими молитвами: да славим и поем великия щедроты Отца и Сына и Святаго Духа в Троице славимаго и покланяемаго Бога, и твое святое заступление во веки веков. Аминь.

Молитва вторая святому великомученику Никите Готфскому
от нищеты

К тебе, яко скорому и избранному спасения нашего ходатаю, богоизбранному воеводе, оружием креста враги победившему, великомученице Никито, вседушно прибегаем: не отвратися от нашея нищеты, молению нашему внемли, и от бед нас и град сей сохрани. Простри руку твою, скорую помощь подающую, управи ум наш от пагубоносных разсеяний, и сердца наша оскверненная очисти, освяти и горе имети утверди. От враг видимых и невидимых нас сохрани, да над страстьми победители явимся, творяще святыню во страсе Господни, и всякое уныние поправше, радоватися о Господе начнем; и тако твоими ходатайствы, во смирении и простоте сердца, сподобимся до последняго издыхания боголепно Отца и Сына и Святаго Духа воспевати и твоя боговенчанныя подвиги и чудеса прославляти во веки веков. Аминь.

Молитва третья святому великомученику Никите Готфскому
в скорбях и печалях читаемая

О, великомучениче Христов, Никито! Храбр был еси во бранех, и врагом прогонитель, и обидимым заступник, всем же православным христианом предстатель. Помилуй мя грешнаго и недостойнаго, и заступи в бедах, и в скорбех, и в печалех, и во всякой злой напасти, и от всякаго злаго и обидящаго человека мя огради: тебе бо дана бысть таковая благодать от Бога, еже молитися за ны грешныя, в бедах и напастех зле страждущия. Избави убо нас от обидящих и ненавидящих нас, буди нам всегда поборник крепок на вся видимая и невидимая враги наша. О, великий поборниче наш Никито! Не забуди нас всегда молящихся тебе и просящих у тебя помощи и неоскудныя милости, и сподоби ны, грешныя и недостойныя, неизреченныя благая от Бога получити, яже уготова любящим Его. Яко тому подобает всякая слава, честь и поклонение, Отцу, и Сыну, и Святому Духу, ныне, и присно, и во веки веков. Аминь.

Молитва четвёртая святому великомученику Никите Готфскому
о прощении грехов

О великий Христов страстотерпче Никито! Услыши молитву нас, грешных, и избави нас (имена) от всякия печали и находящия напасти, от внезапныя смерти и от всякаго зла: в час же разлучения души от тела отжени, страстотерпче, всякую лукавую мысль и лукавыя бесы, яко да приимет души наша с миром в место светло Христос Господь Бог наш, яко от Него очищение грехов, и Той есть спасение душ наших, Емуже подобает всякая слава, честь и поклонение, со Отцем и Святым Духом, ныне и присно и во веки веков. Аминь.

Молитва пятая святому великомученику Никите Готфскому
от греховных помыслов

О, великое светило, осиявающее всего мира концы, страстотерпче Христов Никите! Днесь умиленно предстояще честней твоей иконе и припадающе и лобызающе сию, усердно молим тя: испроси нам у Христа Бога нашего оставление грехов, исправление жития, и вся благая ко временной и вечней жизни потребная. О, пречестный и преславный страстотерпче Христов! Не презри моления нашего и не остави нас к тебе прибегающих, но милостивно воззри на ны и на земную юдоль нашу; помяни нас странствующих и пришельствующих, и дарованною тебе от Бога силою руководи нас к Небесному Отечеству; укрепи нашу немощь, огради нас от грехопадений, возгрей в нас святую любовь ко Господу, и ревность о спасении нашем подаждь нам; насади в сердцах наших страх Божественный, и направи стопы наша к деланию заповедей Христовых. Испроси же предстательством твоим у Всемилостиваго Бога нашего мир Церкви Его, людем в вере единомудрие, суемудрия же и расколов истребление и в делех благих утверждение, больным исцеление, печальным утешение, обиженным заступление, бедствующим помощь. Наипаче же молитвою твоею соделай всем нам, еже жити целомудренно и праведно и благочестиво в нынешнем веце, присно же час смертный и страшное второе пришествие Господа и Бога нашего Иисуса Христа памятовати, да благодатию и человеколюбием Его соблюдаеми и спасаеми, мытарств горьких от бесов, воздушных князей, и вечныя муки избавимся, и в Небеснем Царствии поклонитися Престолу Божию да сподобимся, благодарно и всерадостно прославляюще Пресвятую и Пребожественную Троицу, Отца и Сына и Духа Святаго, во веки веков. Аминь.

Новые молитвы

Молитвы о самоубийцах

Ознакомиться

Молитвы за скончавшихся вне своего Отечества, за безродных и убогих

Ознакомиться

Молитвы за наставников и воспитателей

Ознакомиться

Молитвы за всякого усопшего

Ознакомиться

Молитвы об ослаблении вечных мук умерших без покаяния

Ознакомиться