Молитвы святым мученикам Евстафию Плакиде и Евфимии

Молитвы святым мученикам Евстафию Плакиде и Евфимии
Тропарь святому мученику Евстафию Плакиде, глас 4-й

Мученик Твой, Господи, Евстафий, во страдании своем венец прият нетленный от Тебе, Бога нашего; имеяй бо крепость Твою, мучителей низложи, сокруши и демонов немощныя дерзости. Того молитвами спаси души наша.

Кондак святому мученику Евстафию Плакиде, глас 2-й

Страсти Христовы яве подражав, и Сего испив усердно чашу, общник Евстафие, и славы сонаследник был еси, от Самаго всех Бога приемля с высоты Божественное оставление.

Тропарь святой великомученице Евфимии Всехвальной, глас 4-й

Агница Твоя, Иисусе, Евфимия/ зовет велиим гласом: Тебе, Женише мой, люблю, и, Тебе ищущи, страдальчествую и сраспинаюся и спогребаюся Крещению Твоему, и стражду Тебе ради, яко да царствую в Тебе, и умираю за Тя, да и живу с Тобою, но яко жертву непорочную приими мя, с любовию пожершуюся Тебе. Тоя молитвами, яко Милостив, спаси души наша.

Ин тропарь святой великомученице Евфимии Всехвальной, глас 4-й

Жениха твоего Христа возлюбивши и свещу твою светлу уготовльши, добродетельми возсиявши, всехвальная Евфимие, тем возшла еси с Ним на брак, венец страдания от Него приемши. Но от бед избави нас, чтущих верою память твою.

Кондак святой великомученице Евфимии Всехвальной, глас 6-й

Подвиги во страдальчестве, подвиги в вере положила еси тепле за Христа, Жениха твоего. Но и ныне якоже ереси и врагов шатание под ноги воинству нашему покорити моли Богородицею, яже от шестисот тридесяти богоносных отец предел приемшая и хранящая, всехвальная.

Ин кондак святой великомученице Евфимии Всехвальной, глас 4-й

Во страдании своем добре подвизася и по смерти нас освящавши чудес течением, всехвальная. Тем твое успение поем, верою прибегающе в Божественную твою церковь, да избавимся недуг душевных и чудес благодать почерпем.

Величание святой великомученице Евфимии Всехвальной

Величаем тя, страстотерпице Христова Евфимие, и чтим честное страдание твое, еже за Христа претерпела еси.

Молитва первая святому мученику Евстафию Плакиде
в печали о детях, где они находятся и живы ли

О, преславный святый и многострадальный великомучениче Христов Евстафие! Услыши ны грешныя и недостойныя, святую многострадальную память твою празднующия. Испроси нам у Господа многомощными молитвами твоими благодать, яже ко спасению, и всех грехов содеянных нами прощение, земли благоплодие, миру мирное устроение и от лютых диавольских козней свобождение, христианскую кончину жития нашего и немятежное чрез воздушныя мытарства к небеси прехождение, ты бо приял еси благодать сию от Господа, еже молитися за ны, и аще восхощи помиловати нас, почитающих священную память твою. Вся можеши сотворити. Не презри убо нас недостойных, святый великомучениче Евстафие. Испроси от Господа вся благая и полезная душам нашим, яко да и мы удостоимся славити и воспевати Всесвятое и великолепое Имя Его во премирном Царствии Небеснем, идеже есть всех святых жилище, во веки веков. Аминь.

Молитва вторая святому мученику Евстафию Плакиде
при нашествии врагов и иноплеменников, во время потопа

Святый мучениче Евстафие! Призри с небеснаго чертога на требующих твоея помощи и не отвергни прошений наших, но, яко присный благодетель и ходатай наш, моли Христа Бога, да, человеколюбив и многомилостив сый, сохранит нас от всякаго лютаго обстояния: от труса, потопа, огня, меча, нашествия иноплеменников и междоусобныя брани. Да не осудит нас грешных по беззаконием нашим, и да не во зло обратим благая, даруемая нам от Всещедраго Бога, но во славу святаго имене Его и в прославление крепкаго твоего заступления. Да молитвами твоими даст нам Господь мир помыслов, воздержание от пагубных страстей и от всякия скверны и да укрепит во всем мире Свою Едину Святую, Соборную и Апостольскую Церковь, юже стяжал есть честною Своею Кровию. Молися прилежно, святий мучениче, да благословит Христос Бог державу, да утвердит во святей Своей Православней Церкви живый дух правыя веры и благочестия, да вси члены ея, чистии от суемудрия и суеверия, духом и истиною покланяются Ему и усердно пекутся о соблюдении Его заповедей, да мы вси в мире и благочестии поживем в настоящем веце и достигнем блаженныя вечныя жизни на небеси, благодатию Господа нашего Иисуса Христа, Емуже подобает всякая слава, честь и держава со Отцем и Святым Духом, ныне и присно и во веки веков. Аминь.

Молитва святой великомученице Евфимии Всехвальной
о даровании терпения и смирения

О, святая всехвальная Евфимие, дево непорочная и великомученице преславная, истинная невеста Христова, нам в защищение Господом данная, услыши ныне моления наша, тебе с любовию приносимыя. Данною тебе от Бога благодатию, помози нам, немощным и убогим, поприще жития сего многотруднаго и многоскорбнаго безбоязненно преити, да возможем, яко же и ты, не устрашатися козней врага злохитростнаго, на ны воздвигаемых и душы наша погубити хотящаго. Принеси Господу нашему Сладчайшему Иисусу Христу смиренное моление наше и умоли Его даровати нам крепость и силу, терпение и смирение, да ими возможем врага превозмогати и Господа нашего неустанно прославляти, с Ним же и Небеснаго Отца и Святаго Духа и ныне и присно и во веки веков. Аминь.

Молитва святым мученикам Евстафию Плакиде и Евфимии
о пропавших без вести детях

О преславнии святии и многострадальнии великомученицы Христовы Евстафие и Евфимие! Услышите ны грешныя и недостойныя рабы Божии (имена), святую многострадальную память вашу празднующыя. Испросите нам у Господа многомощными молитвами вашими благодать, яже ко спасению, и всех грехов содеянных нами прощение, земли благоплодие, миру мирное устроение и от лютых диавольских козней свобождение, христианскую кончину жития нашего и немятежное чрез воздушная мытарства к небеси прохождение: вы бо прияли есте благодать сию от Господа, еже молитися за ны, и аще восхощете помиловати нас, почитающих священную память вашу, вся можете сотворити. Не презрите убо нас недостойных, святии великомученицы Евстафие и Евфимие. Испросите от Господа вся благая и полезная душам нашим, яко да и мы удостоимся купно с вами славити и воспевати всесвятое и великолепое имя Его во премирном Царствии Небеснем, идеже есть всех святых жилище, во веки веков.

Новые молитвы

Молитвы о самоубийцах

Ознакомиться

Молитвы за скончавшихся вне своего Отечества, за безродных и убогих

Ознакомиться

Молитвы за наставников и воспитателей

Ознакомиться

Молитвы за всякого усопшего

Ознакомиться

Молитвы об ослаблении вечных мук умерших без покаяния

Ознакомиться