Акафист иконе Пресвятой Богородицы Едина Надеждо отчаянных

Акафист иконе Пресвятой Богородицы Едина Надеждо отчаянных
Кондак 1

Взбранной Воеводе, Божией Матери, Небесней нашей Покровительнице, вси в борьбе со страстьми, похотьми и соблазнами житейскими изнемогающии, чрезмерною печалию во уныние и отчаяние пришедшии и благодати Духа Святаго себе отвергшии, обаче Царицею Небесною в надежди спасения укрепленнии, радостно взываем:

Радуйся, Премилосердная Богородице Дево, отчаянных единая надеждо.

Икос 1

Ангели дивятся, Богородице Дево, Твоей неустанной помощи грешным людем, страстьми, похотьми и соблазнами боримым, спесения же ищущим и с любовию велиею Тя, Пренепорочная, славословящим тако:

Радуйся, святыя Ангелы грешным людем в помощь посылающая.

Радуйся, Сама многажды чад Твоих немощных укрепляющая.

Радуйся, уныние от печальных сердец отгоняющая.

Радуйся, ленивых и нерадивых подвизатися, Царствия Небеснаго ради, призывающая.

Радуйся, совесть их спящую пробуждающая.

Радуйся, во отчаяние пришедших, Бога же не отвратившихся, от погибели спасающая.

Радуйся, полчища бесовския, на них нападающия, отгоняющая.

Радуйся, яко Тобою грешнии людие исправляются.

Радуйся, Премилосердная Богородице Дево, отчаянных единая надеждо.

Кондак 2

Видяще Пречистую Деву, велию милость ко грешником являющую и всех любящих Ея на правом пути спасения укрепляющую, печаль безмерную отринем, братие, и Богородице возопием: помози нам, Царице Небесная, примири ны с Сыном Твоими Господем нашим, укрепи волю нашу к добродетельней богоугодней жизни, да леность и нерадение отринувши, воззовем к Богу: Аллилуиа.

Икос 2

Тьмою греховною объяты есмы и разум наш омрачен есть, яко своею леностию и нерадением впадохом в забвение и окамененное нечувствие, темже понуждают ны демоны работати греху, понеже волею своею в руце их предалися есмы и друзи быхом бесовом, а не Богу: в разслабление греховное впадши, обеты крещения ни во чтоже вменихом и добрых дел никакоже творим; обаче на заступление Твое и милость благоутробия Твоего надеяся, взываем Ти сице:

Радуйся, всех любящих Триипостаснаго Бога скорая Попечительнице.

Радуйся, в борьбе со страстьми изнемогающим скорая Помощнице.

Радуйся, многоглаголивым молчание и страх Божий подающая.

Радуйся, ленивых и сонливых к бодрствованию воздвизающая.

Радуйся, омраченныя суетою и нерадением чрез печаль сердечную вразумляющая.

Радуйся, не любити мира и вся, яже в мире, наставляющая.

Радуйся, прежде любити ближняго своего научающая.

Радуйся, от любви к ближнему к любви Божией их приводящая.

Радуйся, Премилосердная Богородице Дево, отчаянных единая надеждо.

Кондак 3

Грехами одержимы есмы и в броня нечувствия сердца наша заключишася, не имамы стыда, ни покаяния, ни слез, ни страха Божия: помрачишася бо духовныя очи наша и не вемы, что творим - доброе или злое, в бездне греховней утопающи. Обаче Твоими, Владычице, молитвами совесть наша пробуждается и во гресех наших обличает ны, и научает не на своя немощныя силы надеятися, но на Твое всесильное пред Богом заступление, вопиюще Ему: Аллилуиа.

Икос 3

Имущи Тебе, Премилосердная Мати, Ходатаицу велию за род христианский пред возлюбленным Сыном Твоим и Богом нашим, радуемся вси, яко молиши Его, да не погубит нас грехов ради наших, но возвратит жаждущих спасения к добродетельней жизни и укрепит ны в борьбе со страстьми, похотьми и соблазнами житейскими; сего ради мы, грешнии, дерзаем вознести глас к Тебе, Неискусомужная Дево, и возопити:

Радуйся, Благодатная, выну за ны, грешныя, Сына Своего умоляющая.

Радуйся, и нас Ему молитися научающая.

Радуйся, творити волю Божию нам помогающая.

Радуйся, славити Бога нас вразумляющая.

Радуйся, служити ближним, яко чадам Божиим, нам повелевающая.

Радуйся, чрез любовь к ближнему любити Бога нас научающая.

Радуйся, память о ближнем с памятию Божиею в нас соединяющая.

Радуйся, усердная Хранительнице иноков, в девстве и целомудрии их сохраняющая.

Радуйся, Премилосердная Богородице Дево, отчаянных единая надеждо.

Кондак 4

Бурею суетных помышлений ум наш омрачися, яко не видети нам, ниже чувствовати грехов своих, ближняго же своего, а не себе самех, в находящих на ны скорбех и печалех обвиняем; обаче надежду на Тя, Дево, имуще, аще и побеждени есмы различными страстьми и похотьми, плененни есмы бесовскими наваждении и страховании, к молитве и доброделанию охладевшии, от всего сердца не престанем просити помощи Твоея, воспевая Богу: Аллилуиа.

Икос 4

Слышавше вси, яко Сын Твой приклоняется ко всякой мольбе Твоей за ны, грешныя, ихже Ты, Всемилостивая, желаеши спасти, молим Тя: да укрепит Господь и нас молитвами Твоими паки творити волю Божию, а не волю бесовскую, да поможет нам приклонити желание свое искренне работати Триипостасному Богу, да Тебе с любовию зовем:

Радуйся, наша истинная Ходатаице и Заступнице.

Радуйся, яко Сын Твой Тебе ради нас милует.

Радуйся, яко без Тебе никтоже может спастися.

Радуйся, лествице, от земли на небо приводящая.

Радуйся, Путеводительнице наша в Царство Небесное.

Радуйся, яко Тобою падшии людие на путь истинный наставляются.

Радуйся, рождшая нам Спасителя душ наших.

Радуйся, укрепляющая нас в напастех от враг видимых и невидимых.

Радуйся, Премилосердная Богородице Дево, отчаянных единая надеждо.

Кондак 5

Целомудрием и смиренномудрием Своим, Пречистая, превозшедши вся земнородныя, сподобилася еси Сына Божия во утробе Твоей носити и преславно Того породити; но аще и почитаема еси Ангельскими чинми и лики святых Царицею небеси и земли, обаче не оставляеши и нас, грешных, но присно молиши возлюбленнаго Сына Твоего, да сопричтет ны Своему избранному стаду, и Сама неустанно помогаеши всем, во Христа православно верующим и поющим Ему: Аллилуиа.

Икос 5

Ведуще велию милость Божию к почитающим Его, даровавшаго нам Тебе, Заступницу рода христианскаго, да ни един веруяй в Него не погибнет, аще прибегнет к Тебе, Божией Матери, помощи и утешения просящи, со благодарением во умиленном сердце зовем Ти:

Радуйся, единое наше в скорбех утешение.

Радуйся, единое наше тайное вразумление.

Радуйся, ума нашего просвещение.

Радуйся, душ и телес наших исцеление.

Радуйся, наше с Богом примирение.

Радуйся, в Царство Небесное наше возведение.

Радуйся, мудрая Украсительнице душ святых.

Радуйся, единая Помощнице во благих начинаниих наших.

Радуйся, Премилосердная Богородице Дево, отчаянных единая надеждо.

Кондак 6

Проповедницы истиннии явишася святии Апостоли, слышавше от Тебе, Богородительнице: «Аз есмь с вами до скончания века!» Не остави и нас, аще и просвещенных учением святых Апостолов, обаче по множеству грехов во уныние и отчаяние впадших, помози нам, Владычице, от всякаго злаго и богопротивнаго уклонятися, яко не имамы сил своя греховныя навыки отринути и всем сердцем, и всею волею Богу служити, не можем паки духовныма очима воззрети горе, но безволием и унынием пораженнии, молим Тя о помощи, Всепетая, взывая к Богу: Аллилуиа.

Икос 6

Показала еси нам Свет истинный – Христа Бога нашего, Пренепорочная Богородительнице, Ты бо еси небесныя врата, имиже на землю сниде Сын Божий, да Тобою возведется род христианский в Царство Небесное. Мы же, уповающе на помощь Твою, молим Тя: не остави нас, волею разслабленных, безпомощных и во отчаяние пришедших, помози нам и научи, Премилосердная, греховное житие исправити, да усердно Богови благоугождая, воспоем Тебе сицевая:

Радуйся, Пренепорочная, плотию Спаса и Бога нам рождшая.

Радуйся, Препрославленная, яко Сыном Твоим грехи нам прощаются.

Радуйся, яко ходатайством Твоим людие покаявшиися число ангелов падших восполняют.

Радуйся, яко любовию Твоею мы, мертвии духом, оживотворяемся.

Радуйся, яко Тобою от сна греховнаго пробуждаемся.

Радуйся, яко Тобою совесть наша очищается.

Радуйся, бодрость духовную нам посылающая.

Радуйся, ум наш просвещающая.

Радуйся, Премилосердная Богородице Дево, отчаянных единая надеждо.

Кондак 7

Вемы, яко Ты еси воистину Помощница всем, со страстьми, похотьми и соблазнами усердно борющимся и во смирении вся скорби житейския и лишения претерпевающим. Темже и мы, аще по немощи человечестей и впадаем во грехи, обаче на Твое заступление и помощь, Царице Небесная, надеяся, усердно взываем Богу: Аллилуиа.

Икос 7

Новую показал есть нам милость Свою Творец явлением чудотворныя Твоея иконы, «Отчаянных единая надежда» нареченныя. Мы же, грехми благодать, сущую в нас, преобидевшии, и сего ради во уныние и отчаяние пришедшии, видяще, яко с верою приходящии к ней получают помощь и скорое исцеление, воспеваем Ти сицевая:

Радуйся, Благая Целительнице болезней душевных и телесных.

Радуйся, во всех скорбных обстояниих наше истинное увеселение.

Радуйся, яко Тобою ожесточеннии и озлобленнии сердцем смягчаются.

Радуйся, яко Тобою ненавистницы любовию обогащаются.

Радуйся, яко Тобою нетерпеливии терпети научаются.

Радуйся, яко Тобою завистливии доброжелательными бывают.

Радуйся, яко Тобою сребролюбцы нестяжанию и милостыни навыкают.

Радуйся, яко Тобою одержимии пианством и курением от гнусных страстей избавляются.

Радуйся, Премилосердная Богородице Дево, отчаянных единая надеждо.

Кондак 8

Странное чудо явил есть нам Господь и Творец, даровавый Тебе, Богомати, великую Помощницу всем в сознание своея греховныя жизни пришедшим и исправления тоя желающим. Мы же, поработившеся злым своим обычаем, не имамы сил преискренне служити Богу и Божественныя Его сладости духовно наслаждатися.Темже паче во уныние и отчаяние пришедше, со слезами припадаем к Тебе, Пренепорочная, да умолиши Сына Твоего за ны, вопиющия Богу: Аллилуиа.

Икос 8

Вси заблуждшии в сей привременней жизни, соблазнами мира сего уловленнии и духовныя своя очи тем помрачившии, в мори житейстем погибающии, пастыря же и учителя никакоже обретшии, не ведают, како устроити житие свое, во еже спастися, к Тебе же, истинней Путеводительнице, в надежде на помощь прибегают, глаголя:

Радуйся, о жизни сей, яко скоротечней, помышляти научающая.

Радуйся, просящим помощи Твоея коегождо крест нести помогающая.

Радуйся, к тленному богатству не прилеплятися вразумляющая.

Радуйся, нетленное сокровище на небеси стяжавати повелевающая.

Радуйся, благодать душам нашим дарующая.

Радуйся, совесть нашу пробуждающая.

Радуйся, богоугодно молитися нас научающая.

Радуйся, непрестанно за ны молитвы к Богу возносящая.

Радуйся, Премилосердная Богородице Дево, отчаянных единая надеждо.

Кондак 9

Всякое естество Ангельское удивляется Твоему милосердию ко грешному роду человеческому, в тине страстей, похотей и соблазнов погибающему, яко Ты, Пресвятая Дево, присно на небеси в наслаждении духовных благ пребывающая, о нас же болезнующи, души наша спасаеши, в надежде на милосердие Божие вопиющия Богу: Аллилуиа.

Икос 9

Ветия многовещанныя не возмогают достойно глаголати о велицей Твоей помощи всем с верою к Тебе и Сыну Твоему прибегающим, в борьбе со своею плотию, соблазнами мира и духами злобы поднебесными изнемогающим, но надежду на Тя имущим и поющим Тебе сицевая:

Радуйся, свет людем во мраце греховнем возжигающая.

Радуйся, яко Тобою духовныма очима зрети горе научаемся.

Радуйся, всех сирот Премилосердная Мати.

Радуйся, вдовиц честных Попечительнице.

Радуйся, богобоязненных пустынножителей Наставнице.

Радуйся, благочестивых мирян вразумление.

Радуйся, на боголюбивыя с любовию взирающая.

Радуйся, нетленное богатство собирати им помогающая.

Радуйся, Премилосердная Богородице Дево, отчаянных единая надеждо.

Кондак 10

Всех хощеши спасти, Пречистая Мати, аще кто приискренне жаждет спасения, обаче и забывших Бога и похотьми плотскими уловленных призываеши болезньми и скорбьми к покаянию, знамении их вразумляющи, да от сна греховнаго возставши в покаянии слезном воззовут к Богу: Аллилуиа.

Икос 10

Стена еси, Богородице Дево, всем хотящим спасения, еюже сохраняемся от стрел враг видимых и невидимых. Сего ради на всяком месте и во всякое время жития нашего Твою помощь и заступление обретающе, с любовию почитаем Тя и воспеваем Ти сицевая:

Радуйся, мир и покой нам дарующая.

Радуйся, божественною радостию души наша напояющая.

Радуйся, долготерпению нас научающая.

Радуйся, благочестием сердца наша исполняющая.

Радуйся, милосердие в нас утверждающая.

Радуйся, веру в нас укрепляющая.

Радуйся, с кротостию нас вразумляющая.

Радуйся, к воздержанию нас побуждающая.

Радуйся, Премилосердная Богородице Дево, отчаянных единая надеждо.

Кондак 11

Пение всякое земнородных не может достойно прославити Твое, Царице Небесная, милосердие к роду христианскому, яко Ты, Всеблагая, не токмо жаждущим спасения, но и утратившим надежду на него, яко не в силах победити навыки своя греховныя, в великом томлении духа, унынии, отчаянии, омрачении ума, в ожесточении и окаменении сердечнем пребывающим, но Христа не отвергшимся, великое являеши вспоможение, из глубины сердца взывающим к Тебе и Сыну Твоему: Аллилуиа.

Икос 11

Светоподательница явилася еси, Пречистая Дево, во тьме греховней блуждающим, да вси, иже из мрака греховнаго к свету истины прейти искренне желают, Тобою просвещеннии, возмогут неуклонно шествовати путем спасения, взирающе непрестанно духовныма очима горе и в радости поюще таковая: Радуйся, слепоту духовную гордых и тщеславных просвещающая.

Радуйся, временными испытании на путь спасения их наставляющая.

Радуйся, теми же ко искреннему покаянию их приводящая.

Радуйся, благодать обильную кающимся подающая.

Радуйся, телесныма очима ослепленных зрением духовным обогащающая.

Радуйся, внезапным прозрением их возвеселяющая.

Радуйся, ревность к подвигом в нас распаляющая.

Радуйся, непрестанно молитися нас научающая.

Радуйся, Премилосердная Богородице Дево, отчаянных единая надеждо.

Кондак 12

Имаши яко Мати Всемогущаго Бога власть выну подавати нам благодать Сына Твоего, Владычице, юже мы в крещении получивше, множеством грехов наших отринули есмы, обеты, нами Богу данныя, забывше и ризу чистоты и целомудрия своего не сохранивше, нечувствием и омрачением одержими есмы, обаче Тебе, Всемилостивая, имамы неусыпную Ходатаицу за род наш, заступающую всех, во отчаянии взывающих к Богу: Аллилуиа.

Икос 12

Поюще Тя, всех земнородных Чистейшую, Еяже смирение и непорочность соделаша дражайшим сосудом Духа Святаго и Материю Сына Божия, Царицу неба и земли, Юже царскою диадимою венча Пребожественная Троица, мы, падшии и обремененнии грехми многими, достойно восхвалити Тя недоумеюще, грешными устнами дерзаем воспевати Ти сицевая:

Радуйся, кротосте паче всякия кротости.

Радуйся, мудростию Своею всех мудрых превозшедшая.

Радуйся, Игумение, всех ко спасению направляющая.

Радуйся, благоговейным пастырем стадо свое пасти помогающая.

Радуйся, отцем духовным согрешения чад их, ко исправлению тех, открывающая.

Радуйся, тех, яко руководящих ко спасению, почитати с благоговением научающая.

Радуйся, чадом, молитвами их, милость Свою дарующая.

Радуйся, не имущих духовнаго руководства, яко истинная Наставница, в Царствие Божие управляющая.

Радуйся, Премилосердная Богородице Дево, отчаянных единая надеждо.

Кондак 13

О Премилосердная Богородице Дево! Услыши нас, леностию, унынием и нерадением в безчувствие пришедших, отчаявшихся и надежду на спасение погубивших, на путь спасения настави и от вечныя погибели всех нас сохрани, да, Тобою укрепляеми, с радостию вопием всех благ Подателю Богу: Аллилуиа.

Этот кондак читается трижды, затем икос 1 и кондак 1
Тропарь, глас 4-й

К Богородице прилежно ныне притецем, грешнии и смиреннии, и припадем, в покаянии зовуще из глубины души: Владычице, помози, на ны милосердовавши, потщися, погибaем от множества прегрешений, не отврати Твоя рабы тщи, Тя бо и едину надежду имамы.

Кондак, глас 6-й

Не имамы иныя помощи, не имамы иныя надежды, разве Тебе, Владычице. Ты нам помози, на Тебе надеемся, и Тобою хвaлимся: Твои бо есмы раби, да не постыдимся.

Молитва

К кому возопию, Владычице? К кому прибегну в горести моей, аще не к Тебе, Царице Небесная? Кто плач мой и воздыхание мое приимет, аще не Ты, Пренепорочная, надеждо христиан и прибежище грешным? Кто паче Тебе в напастех защитит? Услыши, убо стенание мое и приклони ухо Твое ко мне, Владычице, Мати Бога моего, и не презри мене, требующаго Твоея помощи, и не отрини мене грешнаго. Вразуми и научи мя, Царице Небесная, не отступи от мене, раба Твоего, Владычице, за роптание, но буди мне Мати и Заступница. Вручаю себе милостивому покрову Твоему: приведи мя, грешнаго, к тихой и безмятежней жизни, да плачуся о гресех моих. К кому бо прибегну повинный аз, аще не к Тебе, упованию и прибежищу грешных, надеждою на неизреченную милость Твою и щедроты Твоя окриляемь? О Владычице, Царице Небесная! Ты мне упование и прибежище, покров и заступление и помощь. Царице моя Преблагая и скорая Заступнице! Покрый Твоим ходатайством моя прегрешения, защити мене от враг видимых и невидимых, умягчи сердца всех злых человек, возстающих на мя. О Мати Господа моего Творца! Ты еси корень девства и неувядаемый цвет чистоты. О Богородительнице! Ты подаждь ми помощь немощствующему плотскими страстьми и болезнующему сердцем, едино бо Твое и с Тобою Твоего Сына и Бога нашего имам заступление, и Твоим пречудным заступлением да избавлюся от всякия беды и напасти, о Пренепорочная и Преславная Божия Мати Марие. Темже со упованием глаголю и вопию: радуйся, Благодатная, радуйся, обрадованная; радуйся Преблагословенная, Господь с Тобою. Аминь.

Новые молитвы

Молитвы от коронавируса

Ознакомиться

Молитвы о самоубийцах

Ознакомиться

Молитвы за скончавшихся вне своего Отечества, за безродных и убогих

Ознакомиться

Молитвы за наставников и воспитателей

Ознакомиться

Молитвы за всякого усопшего

Ознакомиться