Акафист на Хвалу Пресвятыя Пречистыя и Преблагословенны Царицы Богородицы
Избранная Богоотроковице, всех созданий Владычице, рождество Твое радость сотвори всей вселенней, из Тебе бо возсия солнце правды, Христос Бог наш, и разрушив клятву даде благословение, о сем бо поят небесные и земные:
Радуйся, святейшая святых Богоотроковице, Царице Небесная.
Ангелами покланяемая, Архангелами служимая, Херувимами воспеваемая и всеми силами небесными превозносима еси, Пресвятая Пречистая Владычице, приими пение сие:
Радуйся, цвете райский, небесное прозябение.
Радуйся красото небес, земли освящение.
Радуйся небесными дарами украшенная.
Радуйся, паче всех небесных превозносимая.
Радуйся, небесный цвете неувядаемый.
Радуйся, безсмертия источниче неисчерпаемый.
Радуйся, дщерь Божия благословенная.
Радуйся, от всех пророков пронареченная.
Радуйся, пресущественная словесе лепото.
Радуйся, Богоначертанная небесная красото.
Радуйся, от всех родов богоизбранная.
Радуйся, Царице в небесах увенчанная.
Радуйся, Святейшая Святых Богоотроковице, Царице Небесная.
Видяще небесные чины, Тебе Пресвятую Боговместимый храм, приветствующую благословенную, в храм Господень введенную, во Святая Святых, яко невесту Бога Всецаря, воспевше: Аллилуиа.
Разум недоразумеваемый, открывая и тебе в пении Пресвятая Богоотроковице гласом своим во святилищи за второю завесою, в месте Тебе Единой приступном, и о сем припоминающе поем:
Радуйся, Пречистая, Ангелов удивление.
Радуйся, Пресвятая праотцев избавление.
Радуйся, храм освятившая вхождением.
Радуйся, небесных возвеселившая введением.
Радуйся, прекрасное святилище.
Радуйся, всех святое очистилище.
Радуйся, введенная в храм рукотворенный.
Радуйся, храм Божий одушевленный.
Радуйся, всех творений Царице.
Радуйся, Невеста Божия, голубице.
Радуйся, с Архиереем во святилище введенная.
Радуйся, от сил небесных окружаема и служимая.
Радуйся, Святейшая Святых Богоотроковице, Царице Небесная.
Сила Вышняго, сый сияние славы, Сын Божий, Сын Твой, Пречистая Дево бывает, Гавриил Тебе благовестил сие: Радуйся благодатная Господь с Тобою, и все творения поют: Аллилуиа.
Имуще Святая благоприятную утробу востекла еси Богоневесто к Елисавете, пророчица же и младенец, во утробе ея, радости исполнилися, и мы в веселии взываем Владычице:
Радуйся, всех пророчеств исполнение.
Радуйся, всех таинств изъявление.
Радуйся, Архангелом радость миру приимшая.
Радуйся, невместимаго Бога вместившая.
Радуйся, яко Тобою дадеся благословение.
Радуйся, яко Тобою клятв истребление.
Радуйся, возжелавший Твою доброту.
Радуйся, возлюби Господь Твою красоту.
Радуйся, Пресвятая Отроковице неблазная.
Радуйся, Пречистая, Девице прекрасная.
Радуйся, Ты едина благословенная.
Радуйся, свято девством запечатленная.
Радуйся, Святейшая святых Богоотроковице, Царице Небесная.
Буря и тьма разсеяны, из Тебе бо Пречистая, возсия мирови тихий свет разума, солнце правды, Христос Бог наш, в рождестве пречистом сохрани нетленну, о сем слава в вышних Богу и на земли мир воспевше: Аллилуиа.
Слышаще пастырие Ангелов поющих, и волсви цари, водимые звездою, падши поклонившеся с дарами, сшедшему с небес и воплотившемуся пожденному Богу , и Тебе Святейшей Святых Богоневесто вопиюще:
Радуйся, дщерь Вышняго, присноблаженная.
Радуйся, матерь Господня благословенная.
Радуйся, Заре Божественная блистающая.
Радуйся, Солнце Бога нам являющая.
Радуйся, горо Святая, Даниилом изъявленная.
Радуйся, врата Божии Иезекиилем предреченная.
Радуйся, Едина в девах, паче всех благословенная.
Радуйся, в роды родов есть покланяемая.
Радуйся, в пречистом чреве Бога носившая.
Радуйся, Пресвятая Бога Господа носившая.
Радуйся, Божественная Купина неопалимая.
Радуйся, скиние святая Бога вместившая.
Радуйся, Святейшая Святых, Богоотроковице Царице Небесная.
Боготечная звезда сияющая, из тебе бо явися свет превечный, просвещаяй сущия во тьме, веселятся праведнии Симеон и Анна, и все пророки провозвестившия пришествие на землю, Возлюбленнаго Твоего Сына и Бога вопиюще: Аллилуиа.
Видевше совершение пророчеств, мудрецы во Египте неразумевше чудес Твоих, непомянувше множество милостей Господних, прошение оными сокрушения идолов. Ты же свет тихий Пресвятая, приими пение сие:
Радуйся, Божиею красотою удобренная.
Радуйся, Архангельским служением почтенная.
Радуйся, державная наша представительнице.
Радуйся, поднебесных всех ходатаице.
Радуйся, всех праведных удобрение.
Радуйся, всех Святых украшение.
Радуйся, смиренная и прекрасная Богоотроковице.
Радуйся, невесто Божия Владычице.
Радуйся, истина Божия совершенная.
Радуйся, превыше всех превознесенная.
Радуйся, всех Ангелов удивление.
Радуйся, всех Святых укрепление.
Радуйся, Святейшая Святых Богоотроковице Царице Небесная.
Проповедницы величия, отчий глас свидетельствуя в крещении, Возлюбленнаго Сына именуя, и Дух Святый в виде голубине явлейся, пришел с Тобою, Сын Божий, и явился Свет неприступный в пении песней: Аллилуиа.
Возсиявый свет велий седящим во тьме и сени смертней, избавление давый Господь людем своим, Ты бо Всесвятейшая наше спасение и избавление приими похвалы сия:
Радуйся, светило, вечно нас озарившая.
Радуйся, источник благости нам явившая.
Радуйся, умов наших просветительнице.
Радуйся, душ наших утешительнице.
Радуйся, Владычице, сило непостижимая.
Радуйся, Божественная премудросте недомыслимая.
Радуйся, всех Красот Краснейшая Девице.
Радуйся, всех высот высшая Царице.
Радуйся, Божественная радость сладчайшая.
Радуйся, Святейшая радость дражайшая.
Радуйся, слава миру, всех украшение.
Радуйся, радость сладчайшая, всех утешение.
Радуйся, Святейшая Святых Богоотроковице Царице Небесная.
Хотящу Господу показати ученикам славу свою преобразивыйся на горе, возсиявый свет свой присносущный, яко есть воистину Отчее сияние, о сем поют Ему: Аллилуиа.
Новое показа просвещение миру Тобою Пресвятейшая, видена всетайновидцем в солнце облеченная и звездами украшен венец Твой, луна под пречистыми стопами, Ты бо наше просвещение приими пения сии:
Радуйся, Божиим светом сияющая.
Радуйся, весь мир просвещающая.
Радуйся, Земных к небесным приведение.
Радуйся, светлое к нетеленным присвоение.
Радуйся, Божественное солнце озаряющая.
Радуйся, пресветлейшая луна просвещающая.
Радуйся, Звездо Израилево предреченная.
Радуйся, Едина пречистая предъявленная.
Радуйся, явившая Божие видение.
Радуйся, утвердившая на небо восхождение.
Радуйся, рождшая Бога Спасителя.
Радуйся, стершая главу губителя.
Радуйся, Святейшая Святых Богоотроковице Царице Небесная.
Странное, видевше на престоле на небеси, и на жребяти на земли носимый Сын Твой, Пресвятая, Бог наш, приявый Ангельское хваление и детей воспевание прославляемый песньми: Аллилуиа.
Весь бе в вышних и нижних Господь сый и Зиждитель Возлюбленный Сын, никакоже Его отлучилася и при Кресте предстояла еси со учеником и на персником. Приими Владычице пения сия:
Радуйся, всех благих добрейшая.
Радуйся, всей премудрости мудрейшая.
Радуйся, Едина паче всех желанная.
Радуйся, паче Естества всего избранная.
Радуйся, яко Тобою дадеся благословение.
Радуйся, яко Тобою всей клеветы истребление.
Радуйся, страстей нас избавляющая.
Радуйся, духовною сладостию утешающая.
Радуйся, прибежище, всех избавление.
Радуйся, помощь верным и защищение.
Радуйся, сугубое к миру всему благоволение.
Радуйся, всей тьмы и злобы низложение.
Радуйся, Святейшая Святых Богоотроковице Царице Небесная.
Все естество Ангельское удивися запечатану гробу, живот от гроба возсиял еси и дверем заключенным предстал есть учеником всех воскресение о сем поем: Аллилуиа.
Вития многовещанныя изъявити Твоей радости не могут. Егда узрела еси Владычице Воскресшаго Сына и Бога и услышала сладкий глас Его, ниспосли Богоневесто и нам тишину и радость в бурях житейских, да поем тебе:
Радуйся, видевше Христа из гроба возсиявшаго.
Радуйся, все концы света облиставшаго.
Радуйся, Отца Небеснаго благоволение.
Радуйся, Сына возлюбленнаго селение.
Радуйся, Духа Святаго жилище.
Радуйся, Божественное святилище.
Радуйся, в законе Вышняго прообразованна.
Радуйся, Святыми Праотцами предначертанна.
Радуйся, Тобою блаженство явлено.
Радуйся, Тобою все зло сокрушено.
Радуйся солнца седмирицею светлейшая.
Радуйся, небеса небес чистейшая.
Радуйся, Святейшая Святых Богоотроковице Царице Небесная.
Спасти изволяя мир вознесся во славе на небеса Сын Твой, Пресвятая, Христос Бог наш, радость сотворивый учеником обетованием Святаго Духа и никакоже отлучаяся, но пребываяй неотступно всегда с нами о сем поем: Аллилуиа.
Стена еси и покров, защищение Владычице, провождала еси Возлюбленнаго Сына и Бога на гору Елеонскую, Тебе бо в мире, вместо Себя оставляюща на спасение всех тебе призывающих:
Радуйся, зревшая Сына и Бога на небо вознесенна.
Радуйся, яко сама в жилище Его переселенна.
Радуйся, девством Ангелов превышающая.
Радуйся, на земли покой и мир утверждающая.
Радуйся, яко Тебе вси Ангели ублажают.
Радуйся, яко повеления твоя исполняют.
Радуйся, на престоле Божественном седящая.
Радуйся, озлобленным радость творящая.
Радуйся, яко твоя радость вечная.
Радуйся, власть Твоя безконечная.
Радуйся, в вышнем Сионе царствующая.
Радуйся, жизнь блаженную рабом своим дарствующая.
Радуйся, Святейшая Святых Богоотроковице Царице Небесная.
Светоприемное светило Божество превечное в сошествии Святаго Духа на Апостолы, на Тебе бо первее почил во Святыне своим благолепием, приими пресвятейшая пение сие: Радуйся пресвятая Владычице! Приими хвалы приношение и умоли милостиваго Создателя Сына Твоего, Бога нашего, да простит согрешения наши и да сподобит милости своея Божественныя, да в сем веке и в будущем прославляем Пресвятое имя Твое, и слышати сподоби гласы поющих: Аллилуиа.
Светоприемное светило, сущим нам во тме возсиявшая, Пресвятая Богоневесто, облеченная в солнце, венец имеющая из звезд, луна светится под стопами Божественными Твоими, о Пресвятая, приими наше пение:
Радуйся, вход в небеса открывшая;
Радуйся, землю небом явившая.
Радуйся, многих в разум просвещающая;
Радуйся, простых мудрыми являюща.
Радуйся, Тобою всех печалей избавляемся;
Радуйся, Тобою райских веселий наслаждаемся;
Радуйся, Пречистая, благодатию просвещающая.
Радуйся, Божественная, благостию утешающая;
Радуйся, всея вселенныя хранительнице.
Радуйся, всех благих даровательнице.
Радуйся, вся доброты превосходящая лепотою;
Радуйся, всех небесных высшаячистотою.
Радуйся, благодатная, Господь с Тобою!
Благодать дати восхотев, всех Зиждитель Бог, спасение человеческое, Тобою бо, Пречистая, приидут в вечный Сион с радостию, и радость вечная, хвала и веселие приимет их и воспоют вечно: Аллилуиа.
Воспевая Твое величие, славим, покланяемся, Ты бо одушевленное святилище Божие, новое небо; ибо Творца небеси и земли во чреве пречистом вместила еси. О сем покланяющеся славим:
Радуйся, в Тебе Святейшей Божие пребывание;
Радуйся, исполнившая Святых ожидание.
Радуйся, всех красот краснейшая;
Радуйся, всей чистоты чистейшая.
Радуйся, Божиею силою освященная;
Радуйся, невеста Божия совершенная;
Радуйся, всему миру радость и благословение.
Радуйся, пресладкая надежда и избавление;
Радуйся, Пречистая небес высшая.
Радуйся, воплощеннаго Бога носившая.
Радуйся, источниче благодати и утверждение;
Радуйся, от грехов древних разрешение.
Радуйся, благодатная, Господь с Тобою!
О Пресвятейшая святых, Приснодево, Богоневесто, Владычице, имущая державу вечную над всем созданием видимым и невидимым! от всякия нас избави беды, и сподоби получити радость вечную, вопиющих Тебе: Аллилуиа.
О Пресвятая, Пречистая Дево, Госпоже, Владычице, Богородице, мысленно падаю пред святыми Твоими стопами; и прошу не оставить Твоим Божественным милосердием. Сподоби получити прощение всем моим прегрешениям, пред Сыном Твоим, Господом Богом нашим. Защити, спаси и помилуй, всемогущая Царице небесная. Сподоби провождати жизнь во исправлении заповедей Господних, удерживати язык от всякаго зла, иметь кроткое и смиренное сердце и любовь ко всем человекам, воспоминать горняя-небесная и презирать суетная-земная. О всесвятейшая Владычице! Да освящается сердце мое выну божественным Твоим именем; да будет свет моей души, просвещающий путь сей жизни. По кончине же сподобив внити в радость вечную, да всегда прославляю Отца и Сына и Святаго Духа и Твое предстательство, ныне и присно, и во веки веков. Аминь.