Акафист преподобному Александру Куштскому

Возбранный чудотворче и изрядный угодниче Христов, всем с верою прибегающым источая многоцелебныя дары, похвальная восписуем ти, творящии всечестную память твою. Ты же, яко имеяй дерзновение ко Господу, моли спастися душам нашым, да зовем ти:

Радуйся, преподобне чудотворче Александре, пустынный жителю.

Ангелское твое во плоти житие провидев всея твари Создатель, от юности избра тя в жилище Себе, Егоже тя обиталище быти уведевше, похвальная восписуем ти:

Радуйся, благочестивую родители благоприятное испрошение.

Радуйся, благочестиваго корене отрасле святейшая.

Радуйся, от юности твоея Богу послуживый.

Радуйся, воздержанием ангелов удививый.

Радуйся, в молитвах теплый предстателю.

Радуйся, скорбящых скорое утешение.

Радуйся, просящым скорое поможение.

Радуйся, болящым скорый и безмездный врачу.

Радуйся, земный ангеле.

Радуйся, небесный человече.

Радуйся, сосуде избранный Духа Святаго.

Радуйся, телес наших здравие и душ спасение.

Радуйся, преподобне чудотворче Александре, пустынный жителю.

Видя тщету мирских попечений, Александре, жизнь твою не мирови, но Богу посвятил еси, сего ради оставил дом родителю своею и водворился еси с работающими в иночестем житии, во еже непрестанно и благоприятно вопити Ему: Аллилуиа.

Плотский разум отринув и к небесным всю душу вперив, от юности твоея, преподобне отче Александре, горняя мудрствовал еси, а не земная, темже взываем ти:

Радуйся, мудрости небесное жилище.

Радуйся, братолюбия зерцало.

Радуйся, иноков правило.

Радуйся, на скрижали сердца твоего закон Божий написавый.

Радуйся, сам себе и весь живот твой Христу Богу предавый.

Радуйся, ум твой к небеси вперивый.

Радуйся, страх Божий в сердцы твоем до конца сохранивый.

Радуйся, вместо тленных нетленная стяжавый.

Радуйся, гордость мирскую поправый.

Радуйся, преподобне чудотворче Александре, пустынный жителю.

Сила Вышняго осени твое сердце, преподобне отче Александре, егда на острове посреде Кубесскаго езера, братии ради неусыпно труждаяся и различная искушения и скорби мужественне претерпевая, родил еси дух спасения, поя всесильному Богу: Аллилуиа.

Имея помышление таковое в себе, преподобне Александре, яко всякая умрети имут, благоразумне разсудив краткость сея жизни и приобретения ради Христа, яко уметы вся быти вменивый, ныне убо на небесех безсмертныя насыщаяся славы, слышиши от нас таковая:

Радуйся, отвергий богатство, яко терние, подавляющее семена духовная.

Радуйся, возненавидевый то, яко вещество пламене греховнаго.

Радуйся, блаженство нищеты духовныя сподоблейся прияти.

Радуйся, восхотевый внити в Небесное Царство узкими враты и в пространстве стати.

Радуйся, иго Христово благое и бремя легкое понесый измлада.

Радуйся, не обративыйся вспять в шествии до Горняго Града.

Радуйся, прежде кончины твоея во умерщвление страстей облеченный.

Радуйся, во умерщвленнем телеси нетления ризою украшенный.

Радуйся, богатства негиблющаго в животе вечнем обладателю.

Радуйся, непостижимыя славы святых созерцателю.

Радуйся, преподобне чудотворче Александре, пустынный жителю.

Буря безмерная лукавых духов многоразличне тщашеся препяти твоему, преподобне Александре, трудолюбному житию, но ты мужественне молитвою вооружася, прогнал еси вся их бесовская полчища, не бояся козней их, но зовый Богу: Аллилуиа.

Слышаще твое терпеливодушное в безмолвии житие, мнози от окрестных стран стекахуся к тебе пользы ради, инии же хотяще с тобою жити и наставлятися на путь спасения, сего ради похваляем тя глаголюще:

Радуйся, целомудрия столпе, имже бесовская шатания искоренишася.

Радуйся, светилниче многосветлый.

Радуйся, яко увядил еси плотская мудрования.

Радуйся, в духовнем мужестве с древними пустынножители сравненный.

Радуйся, молитвами твоими дивная сотворивый.

Радуйся, господствию духа плоть покоривый.

Радуйся, миром небесным приосененный.

Радуйся, долготерпения искус стяжавый.

Радуйся, земная мудрования презревый.

Радуйся, Единаго Бога вседушне поискавый.

Радуйся, сохранивый всечестне целомудрие.

Радуйся, яко раб пред Господем по вся дни благочестно шествовавый.

Радуйся, преподобне чудотворче Александре, пустынный жителю.

Яко боготочная звезда, явился еси, всеблаженне, в стране Вологодсте, на путь спасительный к вечному небесному отечествию ведущий. Егда примером, верных душы назидая, научил еси благодарно пети: Аллилуиа.

Видевше княгиня Мариа и инии российстии сынове пречудное по Бозе житие твое, Александре преподобне, яко аще и последи леты в новопросвещенней стране Российстей возрасл еси, но древних преподобных отец чести сподобился еси, дарования чудес достойно прием от Бога, того ради научишася пети тебе сице:

Радуйся, образе кротости духовныя.

Радуйся, умертвивый плоть твою постом и бдением.

Радуйся, заградивый уста твоя на глаголание тщеты.

Радуйся, замкнувый уши на слышание душевредства.

Радуйся, умертививый руце на творение зла.

Радуйся, истощивый чрево строгим воздержанием.

Радуйся, мертва соделавый чресла твоя трудами на нечистоту.

Радуйся, умертвивый нозе к течению на совет нечестивых.

Радуйся, на камени Христовы веры утвержденный.

Радуйся, Божиим свидетелством возвышенный.

Радуйся, преподобне чудотворче Александре, пустынный жителю.

Проповедник немолчный явился еси всем зрящым тя премудрости евангельския, всегдашния чистоты и мужественнаго терпения исполнена, преподобне, аще и в безмолвии хранил еси в серды твоем сокровище веры, надежды и любве, воспевая Богу: Аллилуиа.

Возсия в богохранимей души твоей истинный боговедения свет, егда начал еси помышляти о создании новыя обители при реце Куште, мы же видевше твое, преподобне, не точию о себе, а паче о спасении близких попечение, воспеваем ти сице:

Радуйся, сродники по плоти Христа ради оставивый.

Радуйся, всю надежду на Него возложивый.

Радуйся, любве нелицемерныя хранителю.

Радуйся, служителю Божий, о вверенных ти умоляяй.

Радуйся, наставниче грешных, к небесным направляяй.

Радуйся, не словом, а житием поучаяй.

Радуйся, нетления вечности искателю.

Радуйся, непостижимыя славы святых в Небеснем Царствии обладателю.

Радуйся, струе, напаяющая благочестием Церковь.

Радуйся, свещниче, непрестанным благочестием сияяй.

Радуйся, светилниче, любовию к Богу и ближним светяй.

Радуйся, преподобне чудотворче Александре, пустынный жителю.

Хотя обещание Богу исполнити, преподобне, приял еси путь ко епископу града Ростова и от него благословение приим, возвратился еси в путь свой, и достиг места к сооружению обители на брезе Кушты реки, водрузил еси крест Богу с радостными слезами воспевая: Аллилуиа.

Новыя слезы радости и благодарения Богу излиял еси преподобне отче, поставив кущу пребывания своего ради и водрузив крест на месте сооружения храма, егда с коленопреклонением и слезами моляся, рекл еси: благословен Бог, Иже показа место, идеже вселюся в век века. Сего ради вопием ти:

Радуйся, древним общежития начальником уподобивыйся.

Радуйся, истинный Богу поклонниче.

Радуйся, великий Его угодниче.

Радуйся, делателю винограда Христова неленостный.

Радуйся, благий и верный Его рабе.

Радуйся, данный ти благочестия талант возрастивый.

Радуйся, вмале быв верен, над многими ныне поставленный.

Радуйся, горлице пустыннолюбивая.

Радуйся, древо при исходищих вод насажденное.

Радуйся, грядущая, яко настоящая предрекий.

Радуйся, душевныма очима выну Господа созерцавый.

Радуйся, преподобне чудотворче Александре, пустынный жителю.

Странно бе видети, како убогий старец един обитает в непроходимей пустыни, презирая видимыя и невидимыя враги и обитель воздати тщится. Мы же очима нашима вся по воли Бога совершаемая зряще, благодарственно Ему вопием: Аллилуиа.

Весь, пречудне Александре, телом и душею посвятился еси Богу, пребывая в непрестанных трудех и молитвах, постех и бдениих, имея по Бозе велию веру и любовь к заступнице рода христианскаго, Пречистей Деве Богородице, и во имя славнаго Оныя успения помыслив создати церковь, абие потекл еси ко епископу града Ростова Дионисию. Мы же столь далекий путь зряще, сретаем тя сице:

Радуйся, совершенный в добродетелех человече.

Радуйся, ленивыя подвигнувый твоими нравы.

Радуйся, кротости навыкнувый от Агнца, вземшаго мира грехи.

Радуйся, за подвиги получивый вечная благая.

Радуйся, щитом веры стрелы лукаваго разжженныя угасивый.

Радуйся, онем главу сокрушивый.

Радуйся, предводителю добрый в пути спасения.

Радуйся, всем преподобным уравнивыйся труды.

Радуйся, умерщвлением страстей миру умерый.

Радуйся, возделыванием добродетели живый Богови.

Радуйся, себе самаго, яко агнца в жертву Богу посвятивый.

Радуйся, светилниче, елеем благодати кипяй.

Радуйся, преподобне чудотворче Александре, пустынный жителю.

Всякое естество ангелское удивися твоим подвигом, яко столь далекий путь прошед, вшел еси ко епископу Дионисию и от него благословение и вся потребная на устроение пустынное получил еси. Мы же прославльшемуся чрез тя Богу взываем: Аллилуиа.

Ветийство человеческое твое о Христе мужество всеблаженне, изрещи не может, яко по устроении обители час от часу преуспевая в трудех, бдениих же и пощениих, тайно обнажая себе до персей, и тако снедию комаров бывая, от них же неизреченныя претерпевая болезни, плоть твою духови поработил еси. Сего ради вопием ти:

Радуйся, алкаяй и жаждаяй правды, яко ныне насыщаешися.

Радуйся, во всецелое послушание Богу себе предавый.

Радуйся, нищетою твоею Богу Сыну подражавый.

Радуйся, чистоту твою Богу Духу Святому сохранивый.

Радуйся, во плоти ангелски поживый.

Радуйся, воине Христов непобедимый.

Радуйся, куплями житейскими не обязавыйся, да воеводе угоден будуши.

Радуйся, не восхотевый двема господинома работати.

Радуйся, от юности на плоть, мир и дивола вооруживыйся.

Радуйся, сих врагов славно победивый.

Радуйся, отец по духу чадолюбивый.

Радуйся, обитель насадивый.

Радуйся, преподобне чудотворче Александре, пустынный жителю.

Спасти хотя душу твою, славы мирския всемерно бегал еси, и егда окрестнии народи начаша тя, яко велия подвижника почитати, удалился еси от них в пустыню, идеже Богу, яко в тимпане, во умерщвлении телесе непрестанно воспевал еси: Аллилуиа.

Стена, ограждающая от всех прилогов диавольских, был еси братии, наставляя их, како избегати козней вражиих и како получити Небесное Царствие. Мы же, зряще твое отеческое неусыпное попечение, благодарне вопием ти:

Радуйся, душу свою за человеки положивый.

Радуйся, от обители земныя, в небесную водворивыйся.

Радуйся, душею тамо, телом зде, духом же всюду призывающыя тя посещаяй.

Радуйся, в великих подвизех течение совершивый.

Радуйся, розго, мног плод о Христе сотворша.

Радуйся, грозде духовнаго винограда, питаяй и веселяяй нас.

Радуйся, омраченныя просветивый.

Радуйся, просвещенныя утвердивый.

Радуйся, отрадо к тебе прибегающих.

Радуйся, России на сопротивныя побараяй.

Радуйся, всех правоверных прошения исполняяй.

Радуйся, преподобне чудотворче Александре, пустынный жителю.

Пение всякое побеждается звездочисленными твоими труды, всеблаженне Александре. Кто бо от земнородных прославит жестокое твое житие? Кто возвеличит священныя подвиги твоя, безмолвие совершенное, смирение нелицемерное, пост протяженный, молитву непрестанную, чистоту по внутреннему и внешнему человеку, за няже сподобился еси со всеми без порока последовавшими Ангцу Божию и благоугодно подвизавшимися пети Ему: Аллилуиа.

Светозарный светилник явился еси, источая многоцелебное миро, всю страну Вологодскую облагоухающее. Сего ради от всех стран чада Церкве, стекающеся, благодарственная приносяще Богу, воспевают ти:

Радуйся, преисполненный всякия благостыни.

Радуйся, милости всякия сокровище.

Радуйся, промышления о людех приятелище.

Радуйся, крине райскаго селения.

Радуйся, миро Христова благоухания.

Радуйся, древо чудотворное рая Иисусова.

Радуйся, чаше, изливающая токи милосердия Божия.

Радуйся, чудес пучино, свыше излиянная.

Радуйся, иноков удобрение.

Радуйся, всея России укрепление.

Радуйся, смиренномудрствующих славо.

Радуйся, наставниче нашего спасения.

Радуйся, преподобне чудотворче Александре, пустынный жителю.

Благость цельбы стяжавшаго, преподобнаго Александра, почтим сердцем и усты. И во еже вящшую воздати почесть святыни его, потщимся всемерно подражати вере Его, всегда вопиюще, прославляющему святых своих Богу: Аллилуиа.

Поюще твое, святе Александре, о призывающих тя теплое предстателство и от врагов видимых и невидимых, скорое заступление, умильно молим тя: не возгнушайся нас грешных, но услыши вопиющих тебе:

Радуйся, яко всякий недуг душевный и телесный врачуеши.

Радуйся, в невечернем дни Царствия Божия почиваеши.

Радуйся, злых помыслов прогонителю.

Радуйся, беснуемых скорый целителю.

Радуйся, во гресех закосневших исправление.

Радуйся, немолчный наставниче.

Радуйся, слепым прозрение даруяй.

Радуйся, хромым и разслабленным хождение исправляяй.

Радуйся, в Бозе нам потребная созерцаяй.

Радуйся, многих прошения предваряяй.

Радуйся, преподобне чудотворче Александре, пустынный жителю.

О великий чудотворче Александре! Моление сие наше прием, умоли подвигоположника Иисуса, да избавит царствующий град и всякий град и страну христианскую от нахождения иноплеменных, от ересей и расколов, и от всякия напасти, да даст с тобою в селениих праведных сподобитися нам пети Триипостасному Богу: Аллилуиа.

О священная главо, преподобне отче авво, Александре великий! Не забуди нищих твоих до конца, поминай нас всегда во святых твоих благоприятных молитвах к Богу. Помяни стадо твое, еже сам паствил еси и не забуди посещати чад твоих. Моли за нас, отче священный, дети твоя духовная, яко имеяй дерзновение к Небесному Царю. Не премолчи за нас ко Господу и не презри нас, верою и любовию чтущих тя. Поминай нас, недостойных, у Престола Вседержителева, и не престай молитися за нас. Не мним бо тя мертва суща, аще телом преставился еси от нас, но и по смерти убо жив пребываеши неотступно от нас духом, сохраняя и соблюдая нас от стрел вражиих и от всякия прелести бесовския и козней диавольских, пастырю наш добрый, се бо икона твоя святая пред очима нашима видима есть всегда, но святая твоя душа с небесными силами у Престола Вседержителева стоящи, достойно веселится. Тебе припадаем и тебе молимся вси и милися деем, еже молитися о нас всесильному Богу о пользе душевней: испроси время на покаяние и невозбранное прехождение от земли на небо, мытарства горьких бесов, воздушных князей, и вечныя муки избавление, и Небеснаго Царствия наследование со всеми праведными, от века угодившими Господу нашему Иисусу Христу. Емуже подобает всякая слава, честь и поклонение, со безначальным Его Отцем и Пресвятым, и Благим, и Животворящим Его Духом, ныне и присно, и во веки веков. Аминь.

Иже плотским дебельством Богови работати изволи, в пустыню вселився, в нейже многими поты и труды безтелеснаго равноангельнаго пребывания возможе достигнута, таже от Бога узрен быв, сподобися великих чудес в жизни и по преставлении, на нечистыя духи силу восприим, изгониши от приходящих к тебе с верою, темже, отче Александре, за вся ны моли, спастися душам нашим.

Ангельский нрав имел еси, отче преподобне Александре, и, яко бесплотный, непорочное житие совершил еси на земли, дивный образ совершенства духовного нам оставив, да подражаем добродетелям твоим и зовем:

Радуйся, родителей благочестивых плод благославный.

Радуйся, рождением твоим радость им сотворивый.

Радуйся, от юности Бога всем сердцем возлюбивый.

Радуйся, любовь в сердце своем к Господу укоренивый.

Радуйся, преподобный Александре, светильниче всесветлый и вселюбимый!

Видя Господь душу твою, от юности к исканию Единого Господа потекшую, благодатного дарования исполнь, да в веселии зовем Ему: Аллилуиа!

Разумом Богопросвещенным постигл еси суету мира сего, тем же вечных нетленных благ возжелал еси, отче преподобне, подвизая и нас звати тебе:

Радуйся, пустынного безмолвия любителю.

Радуйся, смирения рачителю.

Радуйся, державы вражия низложителю.

Радуйся, Господа верный служителю.

Радуйся, преподобный Александре, светильниче всесветлый и вселюбимый!

Силою Всевышняго осененный, непобедимым оружием Креста вооружился еси, побеждал еси всякую гордыню, непрестанно вопия: Аллилуиа!

Имел еси слез источник изобильный, угодниче Божий, от преизбытка желания Божественного и любве ко Господу, тем же мы ублажаем тя, зовуще:

Радуйся, крепости и мужества тезоименитый подвижниче.

Радуйся, ангелоподобный человече.

Радуйся, молитвенниче неусыпный.

Радуйся, наставниче изрядный.

Радуйся, преподобный Александре, светильниче всесветлый и вселюбимый!

Бурею искушений невозможно поколебати храмину души твоея, основана бо бе на твердом камене веры и непреткновенно восходил к совершенству духовному поя Богу: Аллилуиа!

Слышав похваляема себе от человек, убоялся еси превозношения суетнаго, отче Богомудре, и, яко истинный смирения образ, мирно и невозбранно Богу работал еси, тем же зовем:

Радуйся, смирившегося Господа благий последователю.

Радуйся, заповедей Его исполнителю.

Радуйся, украсивыйся дарами благодати Божия.

Радуйся, трудолюбче истинный.

Радуйся, преподобный Александре, светильниче всесветлый и вселюбимый!

Светозарный луч, просиявший в местах пустынных, был еси преподобне Александре, пламенеющим сердцем пел Господу песнь: Аллилуиа!

Видеша Ангельския чины равноангельное житие твое, отче богоблаженне, ревности духа твоего удивишася и прославиша Бога, укрепляющего немощное естество человеческое, мы же ублажаем тя и поем:

Радуйся, иноков дивное украшение.

Радуйся, крине пустынного жития.

Радуйся, древо небесного насаждения.

Радуйся, преподобием и правдою одеянный.

Радуйся, преподобный Александре, светильниче всесветлый и вселюбимый!

Проповедники подвигов твоих явишася иноцы обители Куштския, видя тя во плоти Ангела, знамение благодатного зрения на лице своем носящаго, во умилении сердца возопиша Богу: Аллилуиа!

Возсиял еси, яко светило Богосветлое в земли северней, на стезю спасения наставив души человеческия, тем же тя, яко сотворившего и научившего, похвалами ублажаем сими:

Радуйся, источниче Боговдохновенных учений.

Радуйся, хранилище преизобильное умилений.

Радуйся, одушевленная скрижаль закона Господня.

Радуйся, неумолчный проповедниче Евангелия Христова.

Радуйся, преподобный Александре, светильниче всесветлый и вселюбимый!

Хотя Человеколюбец Господь прославити место подвигов твоих, посла Ангела благовестити тебе, яко на том месте обитель иноком будет во спасение, ты же, явлением бесплотного просвещен, с радостным трепетом взывал: Аллилуиа!

Новое знамение благоволения Божия даровася тебе, отче преподобие, яко и в нощи свет великий блиста тебе, дивяся сему, зовем ти радостно:

Радуйся, собеседниче сил небесных.

Радуйся, монахов множества наставниче.

Радуйся, созерцателю Божественных видений.

Радуйся, причастниче небесных озарений.

Радуйся, преподобный Александре, светильниче всесветлый и вселюбимый!

Странно и дивно, како, преподобне отче, вся Божиим поспешением в обители устроив, со ученики твоими неумолчно возносил хвалу Господу: Аллилуиа!

Всего себе предал еси воле Господней, священства благодати не уклонился восприятия, аще и ужасался дух твой высоты сия, но послушание явил еси отцу твоему духовному, подвизая всех согласно звати тебе:

Радуйся, Бескровныя Жертвы достойный совершителю.

Радуйся, Алтаря Господня благоговейный служителю.

Радуйся, преподобнии руце твои ко Господу со многим дерзновением возносивый.

Радуйся, свеще, в молитве Богу возженная.

Радуйся, вождю благоискусный духовный.

Радуйся, преподобный Александре, светильниче всесветлый и вселюбимый!

Вси иноцы обители твоея в радостный трепет приидоша, егда молитвою твоею и подвигом трудов твоих обитель их благоукрасися, вся духовная чада твоя всеумиленно возгласиша Зиждителю Богу: Аллилуиа!

Витийство человеческое не возможет изрещи обилие радости духовныя, еяже преисполнился еси, отче Богоносне Александре, тем же мы радостне приносим ти глаголы сия:

Радуйся, благоволением Божия Матери осененный.

Радуйся, Христом Богом утешенный.

Радуйся, даром чудес облагодатствованный.

Радуйся, будущее, яко настоящее провидевый.

Радуйся, преподобный Александре, светильниче всесветлый и вселюбимый!

Спасти хотя души ученик твоих, отечески назидал еси их, Богомудре, с любовию увещевал преуспевати в благочестии и Богу воспевати: Аллилуиа!

Стена крепка молитвы твоея, отче преподобне Александре, всем с верою к тебе притекающим во всякой скорби душевной и телесной, тем же зовем ти:

Радуйся, печальных утешение.

Радуйся, бедствующим помоще.

Радуйся, в темнице сидящим избавление.

Радуйся, больных исцеление.

Радуйся, преподобный Александре, светильниче всесветлый и вселюбимый!

Пение всеумиленное принесл еси Господу во время кончины твоея; молитве сущей во устех твоих, предал еси душу свою в руце Живаго Бога, Его же от юности возлюбил еси и до старости маститой Ему работал еси, тем же и радостно пришел еси во обитель небесную, идеже со Ангельскими лики поеши Триипостасному Богу: Аллилуиа!

Мирную кончину твою видевше ученицы твои, угодниче Божий, скорбь разлучения с тобою утешением благодатным раствориша в уповании всесильного предстательства твоего у Престола Божия, идеже слышиши с любовию зовущих тебе:

Радуйся, венец безсмертныя жизни от руки Вседержителя приявый.

Радуйся, в Чертоге Небеснем ликовствуяй.

Радуйся, Небеснаго Сиона жителю.

Радуйся, лучами Божественного Света сияющий.

Радуйся, преподобный Александре, светильниче всесветлый и вселюбимый!

Благодати причастник был еси, чудотворче святый Александре, тя бо и по мнозех летех яви нам Господь заступника, всяк недуг врачующего, и исцеление источающего силою Господа, Ему же воспеваем: Аллилуиа!

Поюще песнь, радостную хвалу и благодарение Человеколюбцу Господу, прославльшему тя в стране Российстей, молим тя, преподобие отче, буди ходатай к Нему и молитвенник о нас, зовущих ти:

Радуйся, цвете, облагоуханный святою Церковью.

Радуйся, заре бессмертия, нам воссиявшая.

Радуйся, о душах наших предстателю.

Радуйся, телес наших врачевателю.

Радуйся, преподобный Александре, светильниче всесветлый и вселюбимый!

О, преславный угодниче Божий, отче наш Александре, милостиво прияв от нас сие малое благодарственное пение, молитвами твоими сохрани нас от всяких недугов душевных и телесных и от грядущих мук избави, да вкупе с тобою в Царствии Небеснем поем Богу: Аллилуиа!