Акафист преподобному Анатолию Оптинскому (младшему)
Изрядный утешителю народа Божия, оптинскаго старчества тихая похвало, монахов и мирян учителю любезнейший, отче Анатолие преподобне, похвальное пение приими тебе любовию зовущих:
Радуйся, Анатолие, народа Божия утешение.
Зарею благочестия просиял еси в мире издетска, Бога возлюбил еси преподобне всем сердцем твоим и даже до старости огнь любве не угасил еси. Сего ради лучами твоего попечения просветившеся сице тебе зовем:
Радуйся, лучу тихия радости.
Радуйся, лице имеяй исполненное светлости.
Радуйся, звездо прекрасная на тверди Церковней.
Радуйся, духа Утешителя хладе тонкий.
Радуйся, чистая реко Божественных поучений.
Радуйся, бездонная глубино Христова милосердия.
Радуйся, подражателю человеколюбия Божия.
Радуйся, непостижимая широто Божественнаго долготерпения.
Радуйся, Анатолие, народа Божия утешение.
Мир оставил еси отче Анатолие, матере твоея благословение исполнив и свободу от житейских попечений улучив, Богу посвятил еси живот твой, благодарно поя: Аллилуия.
Испил еси от источника премудрости старческия, при Амвросии послушание проходя, послежде при старце Иосифе сладкую воду учения святоотеческаго с наслаждением пия. Сего ради зной страстей наших прохлаждаеши, вопиющих тебе сия:
Радуйся, струе слезнаго умиления.
Радуйся, езеро кротости невозмутимое.
Радуйся, волно небурная воздыханий святых.
Радуйся, тихая пристань сладчайших молитв.
Радуйся, яко на кораблице послушания преплыл еси море страстей.
Радуйся, яко во глубине безмолвия обрел еси бисер добродетелей.
Радуйся, Амвросиево воспитание.
Радуйся, Иосифово благодерзновение.
Радуйся, Анатолие, народа Божия утешение.
Молитвою и постом отразил еси стрелы вражия, добродетелию же послушания страстей совлеклся еси, и в мужа возраста духовнаго достигл еси молитвами старцев твоих, отче Анатолие, благодарно взываяй Богу: Аллилуия.
Яко камень честный ограненный послушанием явился еси, отче Анатолие, всякое искушение отразивый непоколебимою твоею верою, сего ради вставлен был еси в венец златый собора старцев оптинских. Нас же колеблемых искушеньми утверди на камени веры вопиющих тебе:
Радуйся, Церкве честное украшение.
Радуйся, добродетелей изящное изваяние.
Радуйся, непоколебимое утверждение старчества.
Радуйся, благоотишное пристанище гонимых за Христа.
Радуйся, кристалловидная чистото сердечная.
Радуйся, златоблистающее горение любве.
Радуйся, тихосветлое сияние собора оптинскаго.
Радуйся, просвещение нашея темноты.
Радуйся, Анатолие, народа Божия утешение.
Исполнил еси утешением духовным обитель Оптинскую, отче Анатолие, яко духа Утешителя всебогатно стяжал еси, Егоже действием всякия слезы от очей верных отерл еси, в радости поющим Утешителю: Аллилуия.
Заповедьми евангельскими снабдивый душу твою, словом Божиим яко мечем обоюдоострым искоренивый страсти греховныя, и скорби грех ради наших находящия отсекл еси, отче Анатолие, людем к тебе приходящим. Сего ради в радости духовней от скорбей избавльшиися тебе вопияху:
Радуйся, утешения духовнаго подателю.
Радуйся, страстей греховных искоренителю.
Радуйся, скорби претворяяй в радости.
Радуйся, слез изсушаяй источники.
Радуйся, крылами Параклита осененный.
Радуйся, Егоже действием в небо вознесенный.
Радуйся, радостотворнаго плача наставниче.
Радуйся, смиренномудрых поучений источниче.
Радуйся, Анатолие, народа Божия утешение.
Утешительное твое человеколюбие многое, подражателя Бога тя яви, отче Анатолие, яко сердце твое широтою любве Божия распространил еси и всякому приходящему сострадалец был еси и наставник богомудрый, прелагающий скорби в благодарную песнь Христу: Аллилуия.
Сострадательная твоя любы, отче Анатолие, в дом Пресвятыя Богородицы тя всели, еже бысть в монастыре церковь больничная, и тамо страждущия и обремененныя грехами деннонощно приимал и утешал еси. Сего ради от многия любве нашея приими сия похвалы:
Радуйся, целителю недугов телесных.
Радуйся, утешителю скорбей душевных.
Радуйся, добродетели безсребренников подражателю.
Радуйся, таинства елеосвящения благоговейный совершителю.
Радуйся, яко Церковь Богоматере в дом милосердия претворил еси.
Радуйся, яко тамо мощми твоими почил еси.
Радуйся, благолепное украшение храма Божия.
Радуйся, благовонное утешение Духа Святаго.
Радуйся, Анатолие, народа Божия утешение.
Трудами пастырскаго твоего окормления многия овцы Христовы на пажити церковней воспитал еси, и поученьми твоими яко тихою песнию свирели пастушеския, ко источником благодати привлекл еси. Сего ради Пастыреначальника Христа прославляем, даровавшаго нам таковаго пастыря, благодарно поем: Аллилуия.
Заветныя твоя глаголы, отче Анатолие, яко светильник во тьме светящий прияхом, имиже учил еси в скорбех ко Христу Подвигоположнику прибегати, в заповедех Его непорочно ходити, немощи же смирением, самоукорением и покаянием исправляти и вся в житии молитвою благоуправляти. Таковому богоугодному жительству от тебе научении, благодарно тебе вопием:
Радуйся, пастырю богомудрый.
Радуйся, учителю вселюбезный.
Радуйся, слакоречивыя уста имевый.
Радуйся, молитву сердобольную стяжавый.
Радуйся, свиреле благозвучная Христовых учений.
Радуйся, жезле прогоняяй богопротивныя учения.
Радуйся, смиренномудрия кладезю глубочайший.
Радуйся, полезных советов светильник ярчайший.
Радуйся, Анатолие, народа Божия утешение.
Мудрость неземную и кротость голубиную стяжал еси, отче, по слову евангельскому, еже наставляти ко спасению приходящия люди к тебе. Сего ради под крылами утешений твоих мирствуют чада твоя, питаемыя благодатию от евангельскаго слова, в радости поюще Христу: Аллилуия.
Истинною любовию ко Христу распалаемь, злобу демонов всю испепелили еси, и обидящим тя и гонящим тя благость и милосердие явил еси. Сего ради богоподражательное твое житие прославляюще, сице тебе вопием:
Радуйся, утешения любвеобильный источниче.
Радуйся, умиления приснотекущий поточе.
Радуйся, сияние добродетельнаго пламене.
Радуйся, демонов разрушаяй огнепалящая стреляния.
Радуйся, чада покрываяй любовию.
Радуйся, враги побеждаяй благостию.
Радуйся, яко тобою тихомирствуем с ближними.
Радуйся, яко тобою враждующии примиряются.
Радуйся, Анатолие, народа Божия утешение.
Якоже солнце испустил еси лучи милости твоея, отче Анатолие, и вся приходящия к тебе утешил еси и болящия исцелил еси и малодушныя утвердил еси в вере стояти непоколебимо, и за вся приключшееся Богу возсылати благодарную песнь: Аллилуия.
Главу добродетелей стяжал еси, отче Анатолие, неотпадающую имеяй в сердце любовь, слово же деятельное пророческою солию приправленное, от гнилости избавляющее страстей, и всем вся был еси по апостольскому слову, да спасеши и ко Христу приведеши вопиющих тебе сицевая:
Радуйся, благоухание Христовыя любве.
Радуйся, соль пророческаго словесе.
Радуйся, мед от камене трудов подвижнических искапаяй.
Радуйся, сладость церковную от непрестанных молитв источаяй.
Радуйся, разсуждения мерило известное.
Радуйся, глубино премудрости старческия.
Радуйся, язвы греховныя прижигаяй словом обличения.
Радуйся, к добродетельной жизни привлекаяй словом похваления.
Радуйся, Анатолие, народа Божия утешение.
Ловца человеком сотвори тя Господь, якоже и апостола Петра, мрежу бо любве твоея распростерл еси и уловил еси множество скорбящих, чающих Христова утешения, егоже изобильно подал еси и миром Христовым одарил еси скорбящих и сотворил еси их в радости пети Богу: Аллилуия.
Утешение народу страждущему явился еси отче Анатолие, слава и похвала обители оптинския, радостию Воскресения Христова всех облистал еси, якоже саровский подвижник Серафим. Темже унывающия вся приободрил еси Господеви со тщанием работати, нас же сподоби радости вкусити воскрешения души вопиющих тебе с любовию:
Радуйся, зиму скорбей прогоняяй.
Радуйся, весну покаяния приносяй.
Радуйся, серафимову радость о Бозе стяжавый.
Радуйся, светом Воскресения всех облиставый.
Радуйся, в печалех утешителю наискорейший.
Радуйся, в страданиих помощник вернейший.
Радуйся, яко уныние тобою прогнася.
Радуйся, яко сердце тобою взыграся.
Радуйся, Анатолие, народа Божия утешение.
Благодать Утешителя в тя вселившаяся, печальника земли русския тя яви. Сего ради скорбьми обуреваемии и бедами сокрушаемии люди российстии благодатию Духа Святаго утешал и укреплял еси. Мы же утешителеву благодать в тя вселившуюся ведуще, Утишителю всех бурь житейских вопием: Аллилуия.
Изсушил еси слезы страждущих, отче Анатолие, лучами божественныя твоея любве и великое благочестия училище показал еси, происходящее от терпения скорбей. Яко по словеси апостольскому скорбь терпение соделовает, а надежда не постыжает, но Духом Святым утешает верных сердца. Темже по лествице сицевой восходяще сице тебе вопием:
Радуйся, терпеливое несение скорбей.
Радуйся, многотрудное попечение о пастве.
Радуйся, каменосердечнаго устроения разрушение.
Радуйся, благоумиленнаго сокрушения созидание.
Радуйся, яко лествицу деятельнаго восхождения показал еси.
Радуйся, яко смиренномудрием вход в клеть сердечную явил еси.
Радуйся, плач по Бозе подаваяй.
Радуйся, слезы страждущих изсушаяй.
Радуйся, Анатолие, народа Божия утешение.
Насадил еси в вертограде оптинстем цветы твоих добропобедных подвигов, от нихже исцеления почерпают входящия вонь и прославляют житие твое исповедническое, отче Анатолие, егоже яко сладчайший плод старческаго служения принесл еси Христу, вопия: Аллилуия.
Напрасно безбожники тя в темницу заключити восхотеша, уже и оковы уготоваша тебе, обаче день пождати испросил еси у них, отче богомудре, воньже честную кончину от Господа приял еси. Темже победу совершил еси без крове и венцем новомученическим увязлся еси. Сего ради таковому твоему дерзновению чудящеся, сице тебе вопием:
Радуйся, благоухание Христово.
Радуйся, безбожным воння в смерть.
Радуйся, яко положил еси душу свою за паству твою.
Радуйся, яко привел еси паству твою ко Христу.
Радуйся, преподобноисповедников российских светоче премудрый.
Радуйся, преподобномученицы Елисаветы наставниче предобрый.
Радуйся, яко смерть послушна бысть тебе.
Радуйся, яко Воскресителя всех стяжал еси в себе.
Радуйся, Анатолие, народа Божия утешение.
Антихриста богомерзкаго близгрядущее пришествие провидел еси, отче Анатолие, темже чадам твоим молитву составил еси, да от обольщения его укроет Господь в сокровенней пустыне спасения люди православныя, и крепость и мужество и твердое исповедание да подаст чтущим ю и в покаянии поющим Богу: Аллилуия.
Гибель державы российския провидел еси отче Анатолие, темже и пророчества от устен богоприятных источил еси: яко корабль державы российския бурею будет разбит, обаче созиждет его Кормчий вселенныя Господь, и паки поплывет по пути богоначертанному. Мы же сбытие словес твоих зряще, сице тебе вопием:
Радуйся, Христов пророче досточудный.
Радуйся, таинниче Параклитов богоприятный.
Радуйся, запечатленная книго таин Божиих.
Радуйся, отверстое сердце молитв дерзновенных.
Радуйся, судеб российских тайнозрителю.
Радуйся, велений Господних сказателю.
Радуйся, яко пророчества твоя зримо сбываются.
Радуйся, яко предстательством твоим чада твоя утешаются.
Радуйся, Анатолие, народа Божия утешение.
О, богоносне отче Анатолие, Духа Святаго честное обиталище, яко дерзновение стяжавый к Параклиту непостыдное, испроси нам у Него утешения отверсти сладкия источники, да Божественною тихостию насладившеся вся греховная яже в мире омерзим, благодарно поюще Богу: Аллилуия.
О, пречестная главо и Утешителя богоприятное селение, богомудре отче наш Анатолие. Ты Господеви поработал еси со страхом и заповеди Его исполнил еси неленостно. Сего ради дарованьми различными исполни твою душу Христос, наипаче же излия на тя дар Божественного утешения. Имже многия люди обременныя горем, страданьми и бедами, яко отец милосердый утешил и ободрил еси, и многия души в годину гонений на Церковь Русскую спасл еси от искушений и заблуждений. Темже ведуще тя и по смерти жива, и мы обуреваемии многоразличными бедами и скорбями еще же и страстями, к тебе припадаем и милостивно просим: посети стадо твое еже умножи Христос твоими молитвами и сущим в тебе дарованием утешения, устави бурю негодования Божия яже грехов ради наших на ны движимую, утеши озлобленныя люди, даждь ослабу изнемогшим от искушений злохитроснаго змия и от непомерных соблазнов спаси нас погибающих.
Наипаче же моли Господа Вседержителя да избавит нас от обольщения богомерзкаго и злаго антихриста близгрядущаго, и укрыет нас от сетей его в сокровенной пустыни своего спасения. Да подаст нам крепость и мужество твердаго исповедания имене Его святаго, да не отступим страха ради диавольскаго и не отречемся от Спасителя и Искупителя нашего и от святыя Его Церкве. Но да подаст нам день и нощь плач и слезы о гресех наших еже помиловатися нам на Страшнем Суде Его, по твоим богоугодным отче молитвам. Аминь.