Акафист преподобному Авраамию Смоленскому
Избранный угодниче Христов и чудотворче предивный, в житии твоем освящен от утробы матерни наставляти люди на путь Христова смирения, и ныне со ангелы предстояй Престолу Божию, сподоби нас восхвалити тя песнми с любовию, да молитвами твоими от всяких бед и скорбей избавлени зовем ти:
Радуйся, преподобне отче Авраамие, Смоленский чудотворче.
Ангелов сожитель и человеков заступник воистинну явился еси, преподобне отче Авраамие, благоволением всех Творца Христа Бога, Егоже возлюбил еси от юности и за Негоже претерпел еси клеветы вражыя. Темже приими от нас сия хваления:
Радуйся, звездо пресветлая благочестия.
Радуйся, светило, во тме нечестия преславно возсиявшее.
Радуйся, клеветников обличителю.
Радуйся, Христовы веры небоязненный проповедниче.
Радуйся, Евангельскаго учения доблий последователю.
Радуйся, закона Господня теплейший хранителю.
Радуйся, жизнь временную пременивый на сокровище вечное небесное.
Радуйся, учения Христова бисер многоценный стяжавый.
Радуйся, Христовым учением душу твою просветивый.
Радуйся, удостоивыйся благодатнаго осенения свыше.
Радуйся, явивыйся добродетелей жилище чистотою преукрашенное.
Радуйся, Духа Святаго обитель прекрасная.
Радуйся, преподобне отче Авраамие, Смоленский чудотворче.
Видя Христос Господь душу твою к приятию благодати чистотою и милостынею предуготованную, светом познания Своего просвети тя от юности и показа тя проповедника благочестия преизрядна, и твоя добродетели помянув любомилосердно, спасаемых части сотвори тя общника в Небеснем Царствии, идеже со ангелы поеши: Аллилуиа.
Разум богопросвещенный даровася тебе, святе Авраамие, имже ясно проразумел еси тщету душепагубную жития привременнаго и онаго уклонитися, Христа же взыскати потщался еси. Вседушно темже взываем ти:
Радуйся, блаженный последователю Христов.
Радуйся, любителю заповедей Его приискренний.
Радуйся, крине благоуханный рая превышняго.
Радуйся, цвете прекрасный вертограда Иисусова.
Радуйся, богатство земное ни во что же вменивый.
Радуйся, стяжания тленная презревый.
Радуйся, храмы Божия и нищыя удовлявый.
Радуйся, руками убогих сокровища твоя Горе предпославый.
Радуйся, яко не уклонился еси в сеть любостяжания.
Радуйся, яко неуловим пребыл еси мрежею сребролюбия.
Радуйся, мудрый купче Царствия Небеснаго.
Радуйся, верный рабе, данный тебе талант усугубивый.
Радуйся, преподобне отче Авраамие, Смоленский чудотворче.
Сила Вышняго укрепи тя на подвиг проповеднический, блаженне Авраамие: не терпя бо видети пагубу душ человеческих, ревностию разжеглся еси о Бозе Живе поучая приходящих к тебе благочестно проводити житие и не отступати от заповедей Христа и звати Ему: Аллилуиа.
Имуще духом злобы помраченный ум, не восхотеша людие Смоленстии приникнути в разум словес твоих духоносных, но клеветы на тя воздвигше, призваша тя на судище. Мы же, ублажающе терпение твое, глаголем:
Радуйся, Христа вседушно возлюбивый.
Радуйся, к Нему любовь во исповедании явивый.
Радуйся, апостолом поревновавый.
Радуйся, орган Святаго Духа бывый.
Радуйся, благовестия Евангельскаго уста богоглаголивыя.
Радуйся, словеса жизни вечныя провещавый.
Радуйся, поношение за Пресладкаго ти Иисуса веселяся претерпевый.
Радуйся, поругание и досаждение за Него благодушно со смирением восприявый.
Радуйся, яко во исповедании Христове непоколебим пребыл еси.
Радуйся, наветы вражия яко паучину потребивый.
Радуйся, святче Божий, в мужестве неодоленный.
Радуйся, добропобедниче в терпении непреклонный.
Радуйся, преподобне отче Авраамие, Смоленский чудотворче.
Бурею злобы дышаще, не терпяще твоего обличения, людие Смоленстии всечасно терзаху тя, яко агнца незлобива зверие дивии, покушающеся отвратити жаждущих твоея проповеди Евангельския, но ничтоже успеша омраченнии: силою бо свыше укрепляемь, посрамил еси оных ухищрение, немолчно проповедуя Христа и Единаго Творца Бога и вопия Ему: Аллилуиа.
Слышавше увещательныя твоя глаголы к людем Смоленским, Авраамие святе, гонители твои беззаконнии прещаху стражею жаждущым словес твоих послушати. Мы же дивящеся величеству проповедания твоего, зовем ти:
Радуйся, учителю благочестия.
Радуйся, посрамителю нечестия.
Радуйся, словесы благодати, яко утвариею многоценною Церковь украсивый.
Радуйся, ни во что же злоречие вменивый.
Радуйся, твоею твердостию гонители сокрушивый.
Радуйся, за Прелюбезнаго ти Иисуса вся вражия ухищрения разрушивый.
Радуйся, исповеданием на суде сочетавыйся Христу распяту.
Радуйся, ликовствуяй в чертозе небеснаго Домовладыки.
Радуйся, у Престола Божия предстояй с горними силами.
Радуйся, откровенным лицем созерцаяй славу Трисияннаго Божества.
Радуйся, от райских высот приникаяй благосердием твоим к нам земнородным.
Радуйся, спасаяй от бед веру и любовь к тебе имущих.
Радуйся, преподобне отче Авраамие, Смоленский чудотворче.
Богомудрым проповедником апостолом подражал еси, Авраамие, вопия: Христа чту, Единаго же Его люблю и проповедати людем приискренне желаю, сердцем и усты воспевая Ему: Аллилуиа.
Видяще тя непреклонна и непобедима проповедника Христова Евангелиа, устоявша противу козни вражия и доблестно претерпевша прещения святителя, внегда удалился еси во обитель Богородицы, вопием:
Радуйся, исповедниче Христов непобедимый.
Радуйся, адаманте терпения крепчайший.
Радуйся, новый проповедниче благочестия.
Радуйся, древним подражателю равночестный.
Радуйся, чудотворения благодатию от Господа обогащенный.
Радуйся, целеб подателю всеблагий.
Радуйся, во благоухании святыни почиваяй.
Радуйся, ароматы райскими облагоухаяй душы верных.
Радуйся, источниче даров многоразличных.
Радуйся, реко приснотекущая чудес.
Радуйся, милосердия к страждущым сокровище неистощимое.
Радуйся, болящих врачевство неоскудное.
Радуйся, преподобне отче Авраамие, Смоленский чудотворче.
Неизреченная премудрость Божия! Ихже Бог предустави, тех и призва, сих и оправда, ихже оправда, сих и прослави: на тебе, святче Божий, сбысться сие слово Апостола. Видя Господь, яко избран еси сосуд и Сына Божия Христа проповедал еси, претерпел за него клеветы, сотвори тя славна чудесы, яже показуеши всем чтущым любовию память твою и вопиющым Богу: Аллилуиа.
Возсиял еси преславно чудотворения лучами, умолив Господа, яко древний Илиа, напоити дождем жаждущую землю Смоленскую, и по явлении мощей твоих, святе Авраамие, во граде Смоленсте, показуя людем свое неизреченное милосердие, прибегающым к твоей многоцелебной раце и святей иконе, юже обстояще, вопием ти:
Радуйся, града нашего похвало и утверждение.
Радуйся, обители Спасовы, в нейже почил еси, присное заступление.
Радуйся, подвизающымся в ней благодатное вспоможение.
Радуйся, оных покрове и защищение.
Радуйся, недугующих скорый целебниче.
Радуйся, унывающих благонадежное возбуждение.
Радуйся, скорбящих утешение.
Радуйся, нищих богатство.
Радуйся, болящих исцеление.
Радуйся, изнемогающих укрепление.
Радуйся, ревнующих о благочестии помощниче.
Радуйся, пребывающих в посте и молитве споспешниче.
Радуйся, преподобне отче Авраамие, Смоленский чудотворче.
Хотя Человеколюбец Господь явити обилие щедрот своих стране Смоленстей, дарова нам тебе угодника и молитвенника богоприятнаго, чудес благодать источающа и недужных безмездно врачующа: темже благодарим тобою благодеющаго нам Господа, и светло празднуем память твою, с любовию к раце мощей твоих припадающе и Христу зовуще: Аллилуиа.
Новаго тя Христова исповедника и чудотворца славнаго любовию ублажаем и радующеся глаголем:
Радуйся, деннице лучезарная земли Смоленския.
Радуйся, луче немерцающий Солнца Правды Христа.
Радуйся, угодниче Господень, предивный в чудесех.
Радуйся, праведниче, прославленный на Небеси и на земли.
Радуйся, нетлением мощей твоих в истине воскресения мертвых уверяяй.
Радуйся, образ безсмертия в смертнем телеси показуяй.
Радуйся, яко тебе дана бысть благодать за ны молитися и возбуждати нас ко благим делом.
Радуйся, яко по преставлении твоем благодеяния просящым подаваеши.
Радуйся, от смертоносных язв и болезней притекающыя к тебе сохраняяй.
Радуйся, бедствующым и обидимым помогаяй.
Радуйся, боголюбивых душ непостыдное упование.
Радуйся, любящих тя присное утешение.
Радуйся, преподобне отче Авраамие, Смоленский чудотворче.
Странно есть видети мертвенное тело, жизнь присносущную являющее, во гробе лежащее и недуги врачующее: но веруем несумненно, угодниче Христов Авраамие, яко мощьми твоими святыми, аще и сокровенными, почиваяй зде и духом твоим не отлучаешися от нас недостойных, честную память твою с любовию почитающих и пред святою твоею иконою Христу благодарне зовущих: Аллилуиа.
Весь в вышних еси, святче Божий Авраамие, во светлости святых торжествуеши и наслаждаешися неизреченных благ небесных: вемы же, яко и нас земных и перстных не забываеши, но и от горних высот милостивно к нам приникаеши, подвизая нас чествовати тя сими похвалами:
Радуйся, благочестия утверждение.
Радуйся, Православия похвало.
Радуйся, земли Российския благодатное осенение.
Радуйся, града Смоленска светлое радование.
Радуйся, многоплодная розго винограда Христова.
Радуйся, гражданине горняго града Иерусалима Небеснаго.
Радуйся, в преславнем лице преподобных пребываяй.
Радуйся, рая жителю всеблаженный.
Радуйся, Царствия Христова наследниче.
Радуйся, вечныя блаженныя жизни сопричастниче.
Радуйся, прибежище наше и защищение.
Радуйся, скорое и безмездное недугов врачевание.
Радуйся, преподобне отче Авраамие, Смоленский чудотворче.
Вси Ангели Небеснии радостно восприяша тя во обители райския, богомудре отче Авраамие, идеже святая твоя душа почесть победную восприят от Христа Спасителя, Праведнаго Мздовоздаятеля подвизающихся за имя святое Его на земли: прославляя бо их на Небеси с горними лики, сподобляет предстояния у Престола Своего, да поют Ему немолчно: Аллилуиа.
Витийством злочестивым и прельщением лукавым неуловлен пребыл еси, отче Авраамие, егда предстал еси на суд святительский земли Смоленския, темже яко добляго исповедника Христова ублажаем тя и зовем:
Радуйся, просвещенный зарею Пресвятаго Духа.
Радуйся, яко страх малодушный пред судищем от себе отрясл еси.
Радуйся, яко щитом веры оградился еси.
Радуйся, неумолкающий благовестниче силы Божия.
Радуйся, неутомимый исповедниче Евангельския истины.
Радуйся, истинный поклонниче, духом и истиною кланяяйся Творцу.
Радуйся, мужу желаний духовных.
Радуйся, взыскавый Христа, отринув мирскую прелесть.
Радуйся, странники и нищыя питавый от трудов своих праведных.
Радуйся, елеем милости умащенная главо.
Радуйся, горо добродетелей.
Радуйся, преподобне отче Авраамие, Смоленский чудотворче.
Спастися нам приискренне желая, молишися за нас Горе у Престола Божия, угодниче Христов Авраамие, и твоими молитвами пособствуеши нам в странствии многотруднем земнаго жития, еже в покаянии и благочестии скончати, да сподобимся и с тобою воспевати Христу и Богу отцу со Святым Духом: Аллилуиа.
Стену защищения имуще твоя святыя молитвы, Авраамие чудне, радуемся грешнии и чтем любовию память твою зовуще:
Радуйся, небожителю богопросвещенный.
Радуйся, чудотворче дивный и милостивый.
Радуйся, благий послушателю сущих в скорбех.
Радуйся, предваряя призывающых тя в бедах.
Радуйся, приводящий грешныя ко исправлению.
Радуйся, миро врачебное недугом многоразличным.
Радуйся, не токмо телесных, но и душевных болезней целителю.
Радуйся, духов нечистых от человеков прогонителю.
Радуйся, даров благодатных независтный подателю.
Радуйся, благоуханием святыни твоея услаждаяй душы наша.
Радуйся, чудесы твоими утверждаяй нас во истине святыя православныя веры.
Радуйся, преподобне отче Авраамие, Смоленский чудотворче.
Пение молебное и похвалу сию смиренную не презри, отче Авраамие, се бо верою и любовию к тебе подвизаеми, соборне обстояще образ твой святый, ублажаем тя заступника нашего, и слезно просим: молися за ны ко Господу, к Немуже имаши невозбранное дерзновение и твоих молитв благодатное действо, да благодарне зовем Ему дивному во святых: Аллилуиа.
Светоносным Троическим сиянием горе озаренный, Авраамие святе, просвети и наша сердца, тмою греховною покровенная, да елеем благих дел возжегше угасшыя наша светильники, сподобимся брачнаго Христова чертога, идеже ты вселяешися со святыми и слышиши от нас сия благохваления:
Радуйся, от Бога данный покровителю нам.
Радуйся, ангелоподобный человече.
Радуйся, устроителю обители нашея.
Радуйся, проповедниче неутомимый.
Радуйся, яко рука твоя изобильно помогаше обители твоей скудной.
Радуйся, яко мудре расточал еси богатство тленное, текущее к тебе.
Радуйся, пременивый оное на нетленная блага небесная.
Радуйся, наслаждаяйся блаженства милостивых.
Радуйся, предстояй Агнцу в лице преподобных.
Радуйся, ликовствуяй в селении праведных.
Радуйся, в житии твоем мудрость чудную явивый.
Радуйся, иноков обители своея добре управивый.
Радуйся, преподобне отче Авраамие, Смоленский чудотворче.
Благодать и милость испроси нам у Христа и Спасителя нашего, святе и славне отче Авраамие, веруем бо несумненно, яко еже просиши, дарует ти Всеблагий Владыка: темже и о нас грешных не престай умоляти Его благосердие и испроси нам дар коемуждо благопотребен, да зовем всех благих Виновнику и Подателю Богу: Аллилуиа.
Поем твоя апостольския труды, величаем твое ангельское терпение и незлобие, славим от сокровенных мощей твоих токи чудес, ихже источаеши непрестанно, подвизая нас звати тебе:
Радуйся, архангелов и ангелов сослужителю.
Радуйся, патриархов и пророков сослужителю.
Радуйся, апостолов единоревнителю.
Радуйся, подвижников красото.
Радуйся, святителей и преподобных собеседниче.
Радуйся, праведных и всех святых сожителю.
Радуйся, яко свыше чудес действом украсился еси.
Радуйся, в честных и многоцелебных мощех своих с нами пребываяй.
Радуйся, и духом твоим николиже от нас разлучаяйся.
Радуйся, отрадо наша и в скорбех утешение.
Радуйся, недугующих исцеление.
Радуйся, согрешающих исправление.
Радуйся, преподобне отче Авраамие, Смоленский чудотворче.
Преславный угодниче Христов и чудотворче Смоленския земли Авраамие, милостивно прием сие малое моление наше, тебе приносимое, умоли Царя царствующих и Господа господствующих Христа Бога нашего, избавити нас от всякия скорби и нужды в жизни сей и мучений вечных по кончине нашей, да сподобимся в Царствии Небеснем вкупе с тобою пети Богу: Аллилуиа.
О великий отче Авраамие, доблий подвижниче Христов, в скорбех и напастех преславный наш помощниче и защитниче! Ничтоже возможе отлучити тя от любве ко Господу Иисусу: ни гонения, ни клеветы, ни прещения врагов твоих. Ты яко лев, исшел еси на брань противу волков мысленных, духов злобы, подвигших на тя, ради добраго твоего исповедания и проповедания, единоплеменный тебе народ Смоленский; и яко огненная стрела поразил еси твоих гонителей силою благодати Святаго Духа и крепкия любве твоея к Богу; и яко орел воспарил еси в горния обители Отца Небеснаго, наследовав тамо вечную жизнь, славу и блаженство неизреченное. Веруем, святче Божий, яко предстоя со ангелы и всеми святыми престолу славы Триипостаснаго Бога, усердныя и богоприятныя возносиши молитвы не токмо о святей обители сей, тобою устроенной, и о граде нашем Смоленсте, но и о всей святей Христовой Церкви, и молим тя молися Господеви: страждущую страну Российскую от лютых безбожников и власти их да свободит, и да возставит православных правителей; верных рабов твоих, в скорби и печали день и нощь вопиющых к тебе, многоболезный вопль да услышит, и да изведет от погибели живот наш. Веруем, преславный чудотворче, яко ты силою Всемогущаго Господа Иисуса Христа, еще жыв сый, умолил еси напоити жаждущую за грехи людей землю Смоленскую обильным дождем, и по успении своем источаеши обильныя дары благодатныя помощи во спасение всем с верою к тебе прибегающым и молящымся тебе, наипаче же испрашиваеши кончину с покаянием почитающым тебе, да вси от мала до велика, единодушно прославляем неисповедимое величие благости Божией. Темже с верою и любовию припадающе и благоговейно лобызающе святую икону твою, умоляем тя, добрый на небеси наш молитвенниче и заступниче, помогай нам, грешным и смиренным, твоими молитвами во всех скорбех, нуждах и обстояниих наших, сохраняй нас и святую обитель твою и град сей Смоленск (и весь сию и храмы сия) и вся православныя христианы Российския страны от всякаго зла и всякия напасти, наипачеже споспешествуй вечному нашему спасению и всех просящих твоея помощи и заступления. Угодниче Божий, преподобне отче Авраамие, моли Христа Спасителя нашего, да даст той мир и тишину всем православным христианом и да отвратит от нас всякий гнев, на ны движимый, и да избавит нас от сетей вражиих, томления во узах греха и мучений адских, и да сподобит нас недостойных и грешных стати одесную Его на суде Его праведном и внити в вечный покой святых Его, идеже празднующих глас непрестанный и неизреченная сладость зрящих доброту лица Его; и тако возможем с тобою и всеми святыми безконечно славити Троицу Единосущную и Нераздельную во веки веков. Аминь.