Акафист преподобному Феодору Санаксарскому

Избранный угодниче и добрый воине Царя Небеснаго, заповедей Евангельских изрядный делателю, всех, прибегающих к тебе, ко спасению наставниче, смирением велие дерзновение стяжавый ко Господу, выну моли о нас, недостойных чадех твоих, да зовем ти:

Радуйся, преподобне Феодоре, стада Христова пастырю богомудрый.

Ангельское житие твое провидя и многих ко спасению привести имущаго, от юности избрав тя Христос в жилище Себе, дарами многими почтил еси; мы же, прославляя тя прославльшаго, бренными устнами вопием ти:

Радуйся, в разум истины пришедый,

Радуйся, яко врага и все страсти одолел еси;

Радуйся, яко звание учительства от Господа приял еси,

Радуйся, яко научил еси нас спасения пути;

Радуйся, все злострадания кротко претерпевый

Радуйся, яко данный тебе талант сторицею преумножил еси;

Радуйся, преподобне Феодоре, стада Христова пастырю богомудрый.

Видев печальный конец плотскаго жития, и безчинныя утехи мирския в смертоносный яд вменив, вразумившему тя Господу, взывал еси: Аллилуия.

Разум божественный желая стяжати, вся земная во уметы вменил еси, да бесценный бисер - Христа приобрящеши. Тем же пустынное житие избрал еси, сего ради вопием ти:

Радуйся, человеческия пристрастия отринувый,

Радуйся, безстрастия возжелевый;

Радуйся, своеволие оставивый,

Радуйся, плотоугодие возненавидевый;

Радуйся, яко немощную плоть духом побеждал еси,

Радуйся яко вместо земнаго веселия небесное стяжал еси;

Радуйся, преподобне Феодоре, стада Христова пастырю богомудрый.

Силою Божиею укрепляемь, велия подвиги подъял еси; покаяние началом положив, плоть непрестанно озлоблял еси, и все упование на Господа возложив, вопиял еси Ему: Аллилуия.

Имея нрав незлобивый и сердце милующее, неразумным гонителям твоим вся обиды прощал еси, наипаче умолял еси от возлюбленной тя пустыни не отлучати, тем же видяще таковое твое во юности преуспеяние, восхваляем тя:

Радуйся, кроткий пустынножителю,

Радуйся, от юности непрелестный подвижниче;

Радуйся, от демонов ненавидимый,

Радуйся, за Христа поношения претерпевый;

Радуйся, все упование на Господа возложивый,

Радуйся, в вере своей не посрамивыйся;

Радуйся, преподобне Феодоре, стада Христова пастырю богомудрый.

Буря безбожия и противных ветров воста тогда на Русь святую, не бе места во обителех истинным рабом Христовым, сего ради и ты странствия и скитания подъял еси, обаче на всяком месте возлюбленному Богу вопиял: Аллилуия.

Слышав повеление Спасителево, не отвратился еси воздати кесарево кесарю, и представ на суд міра сего, вспять не обратился еси, тем же ублажаем твердость твою, взывающе:

Радуйся, любовь к міру до конца умертвивый,

Радуйся, яко вся земная презрел еси;

Радуйся, вышняго Царя паче земнаго убоявыйся,

Радуйся, славы суетной не восхотевый;

Радуйся, несмущенною твердостию царицу удививый,

Радуйся, верою крепкою суд на милость преложивый;

Радуйся, преподобне Феодоре, стада Христова пастырю богомудрый.

Боготечною звездою возсиял еси в столице северной, темный запад унылаго жития благочестием своим озарив, и научая собою Просветителю душ вопити: Аллилуия.

Видя себе ко Ангельскому чину причтена, Бога восхвалял еси, вся благая желания исполняющаго; чада спасения же в тебе истиннаго отца и пастыря обретоша, с ними же и мы поем таковая:

Радуйся, чистым житием к себе души привлекавый,

Радуйся, постничеством всех удивлявый;

Радуйся, яко обеты иноческия строго соблюл еси,

Радуйся, яко непрестанную молитву возделал еси;

Радуйся, в разсуждении Златоусту подобник быв,

Радуйся, яко свыше дар врачевания душ приял еси;

Радуйся, преподобне Феодоре, стада Христова пастырю богомудрый.

Проповедника боговещаннаго тя видя, и стадо овец Христовых окрест тебе умножающееся, паки воста на тя завистник древний, злобу и клевету во уста недостойныя вложив; ты же, провидя козни его, Подателю благосердия пел еси: Аллилуия.

Возсия свет радости в души твоей, егда место гневу дав, псаломски в пустыне Саровстей водворился еси, обаче и паству твою на тучныя пажити монашеского жительства привел еси, с нею же ликующе, и мы рцем:

Радуйся, гонителям мщения не давый,

Радуйся, смирением их победивый;

Радуйся, яко словопрений удалялся еси,

Радуйся, среди житейския молвы пустыннаго духа не угасивый;

Радуйся, шумом міра тяготивыйся,

Радуйся, яко горлицей пустыннолюбной из него воспарил еси;

Радуйся, преподобне Феодоре, стада Христова пастырю богомудрый.

Хотя Человеколюбец Господь воинство иноков преумножити, и чрез тя сие ко спасению привести, из славнаго Сарова в тишину Санаксара пресели тя, и тамо, яко светильник горяй и светяй, на свещнице тя постави, со чады поющаго: Аллилуия.

Новое и дивное явление зрим на месте сем, видяще тя, яко единаго от древних, лучами святости сияющаго, среди дремучих лесов обитель святую, яко град велик, воздвизающаго; тем же зело удивляеми, благодарно воспеваем ти:

Радуйся, воли Божией усердный исполнителю,

Радуйся, всякое послушание от Него радостно приемлющий;

Радуйся, великаго труда не убоявыйся,

Радуйся, всю надежду на Щедродавца возложивый;

Радуйся, место сие молитвами своими освятивый,

Радуйся, потом и слезами сие удобривый;

Радуйся, преподобне Феодоре, стада Христова пастырю богомудрый.

Странное чудо и боголепное зрится, яко в немногих летех храм велик во славу Пречистыя созидается, и обитель иночествующих, древним подобная, твоими трудами укрепляется, в ней же монаси мнози Строителю спасения единым гласом вопиют: Аллилуия.

Весь закон, яже по Бозе жития, явлен тебе имея, наставник искусный и предивный был еси, вражия коварства и хитрости мглу, яко луч солнечный, разсеял еси, тем же по достоянию слышиши:

Радуйся, бесов прогонителю,

Радуйся, страстей искоренителю;

Радуйся, иноческого общежития устроителю,

Радуйся, церковнаго благолепия ревнителю;

Радуйся, исцелявый прощением,

Радуйся, врачевавый терпением;

Радуйся, преподобне Феодоре, стада Христова пастырю богомудрый.

Всякую неправость в себе искоренивый, тщался еси и ближнему сие благо доставити, сего ради неустанно трудился еси, наставляя, обличая и запрещая; льстивое же чадо твое, не терпя отеческих прещений, оклевета тя пред сильными міра сего, не ведуще пети: Аллилуия.

Витийства сугубаго недостанет, во еже сказати терпение твое скорбей многих, егда в заточении многолетнем во обители Соловецтей пребывал еси; мы же ныне, яко же и чада твоя тогда, со слезами взываем:

Радуйся, яко человекоугодие презрел еси,

Радуйся, яко безчинных строгостию исправлял еси;

Радуйся, Давидски гонения терпевый,

Радуйся, скорби в небесный дар вменявый;

Радуйся, выну к Богу духом горевый,

Радуйся, яко и Бог с тобою пребыл еси;

Радуйся, преподобне Феодоре, стада Христова пастырю богомудрый.

Спасти хотя верных множества, Великий Началопастырь многими дарами обогати тя, егда, яко злато, огнём страданий очищена паки в родную обитель возврати, яже узрет тя, светом ангелоподобнаго лика твоего озарися, радостно воспевает Праведному Воздаятелю: Аллилуия.

Стеною несокрушимою православным явился еси, пламенными молитвами лукавыя духи попаляя, трезвыми советами от заблуждения ограждая, божественною любовию сердца согревая; всем быв вся, многих спасл еси, сего ради приими хвалы сия:

Радуйся, на крест радостно восшедый,

Радуйся, на кресте не роптавый;

Радуйся, распятием сим до конца ветхая в себе умертвивый,

Радуйся, яко в страдании ум к Богу возводил еси;

Радуйся, яко непрестанно горе` сердце имел еси,

Радуйся, земный ангеле и небесный человече;

Радуйся, преподобне Феодоре, стада Христова пастырю богомудрый.

Пение всякое побеждается, егда восхощет воспети многочисленныя подвиги твои: всенощные бдения, непрестанная пощения, слез излияния, болезней и теснот благодушное терпение, яже во все время жития твоего, яко дар должный Всевышнему приносил еси, тем же и сподобился от Него со Ангелы пети: Аллилуия.

Светозарный светильник старчества благодатнаго явился еси во времена мрачныя забвения, и благоуханное цветение его провозвестил еси житием своим, да не увянет цвет духовный в Российстей земли; ныне же на небесех живяй от земных приими песнь сию:

Радуйся, умнаго делания подвижниче,

Радуйся, любве чистыя приятелище;

Радуйся, Евангельской мудрости вместилище,

Радуйся, яко паче своея, пользы ближних искал еси;

Радуйся, яко добрым виноградарем явился еси,

Радуйся, яко ни едину же розгу презрел еси;

Радуйся, преподобне Феодоре, стада Христова пастырю богомудрый.

Благодать Божия яви нам, недостойным, в последняя времена мощи твоя святыя, ими же обитель твою от конечнаго разорения сохранил еси, наипаче же к новей жизни возродил еси, тем же и ныне умоли за ны, чада твоя, да не явимся неблагодарни за толикую милость к нам, и нерадению да не предадимся, обаче да усердно воспеваем Богу: Аллилуия.

Поюще равноангельное и многоскорбное твое житие, восхваляюще благость Божию, до конца нас не оставившую и за грехи не презревшую, зрим убо наше убожество и скудоумие во еже воспети тя по достоянию, обаче не отвратися пения сего:

Радуйся, оставляяй согрешающему,

Радуйся, небрежное житие обличавый;

Радуйся, в Боге утешение имевый,

Радуйся, яко о міролюбцах рыдал еси;

Радуйся, монашества крепость необоримая,

Радуйся, священства украшение;

Радуйся, преподобне Феодоре, стада Христова пастырю богомудрый.

О, священная главо! Богоносне отче наш Феодоре, славу преподобных и венец исповедников стяжавый, и в незаходимей сияющий славе! Яко же прежде, тако и ныне не забуди стадо твое, но управи е к вечному спасению, зовущее о тебе Богу: Аллилуия.

О, радосте наша! Пастырю наш, преподобне отче Феодоре! Воздыхаем из глубины сердца нашего и со слезами вопием ти: видиши наше неможение, во мраке страстей пребывание, сил душевных разслабление, своеволием обдержание, плотоугодием пленение и от всякия добродетели обнищание! Виждь плач и недоумение наше! Вразуми ны и настави на спасения стези, испроси нам у Великодаровитаго Бога нищеты нашея познание, слезное покаяние, нелицемерное смирение и в молитве непрестанное терпение, да сими благость Его к себе приклоним ко прощению грехов, и сподобимся с тобою вечно пребывати во Царствии Небеснем, поя и благословя Всесвятую Троицу: Отца, и Сына, и Святаго Духа, ныне и присно, и во веки веков. Аминь.