Акафист преподобному Савве Крыпецкому

Кондак 1

Возбранный чудотворче и угодниче Христов, преподобне отче наш Савво, похвальныя приносим ти, молитвенницы твоя, творящии, всечестную память твою, ты же яко имеяй велие дерзновение ко Господу, от всяких нас бед и скорбей свободи, зовущих:

Радуйся преподобне Савво, отче преблаженнейший.

Икос 1

Ангелов Господь, провидев твое, преподобне, равноангельское житие, приведе тя от чуждыя страны и просвети тобою пределы наши. Сего ради и мы сретаем тя глаголюще:

Радуйся, сродники и дом отеческий оставивый;

Радуйся, всю красоту мирскую презревый.

Радуйся, отче от Святыя горы Афона к нам пришедый;

Радуйся, образ и правило жития иноческаго нам показавый.

Радуйся, человече не от чуждыя страны, но от Бога к нам пришедый;

Радуйся, нашу полунощную страну своим пришествием озаривый.

Радуйся, звездо, от востока нам возсиявшая;

Радуйся, заре, нас в темной стране пребывающих осветившая.

Радуйся, преподобне Савво, отче преблаженнейший.

Кондак 2

Видя в себе призвание от Бога, пустынное житие проводити, потщился еси Ему угодная творити, в пустыни Богу взывая: Аллилуиа.

Икос 2

Разум Божественный настави тя, Савво, отче наш, егда оставив Отечество свое, во град Псков пришел еси, и во обители Рождества Пресвятыя Богородицы водворился еси, и в ней подвигом добрым подвизался еси. Сего ради восхваляем тя сице:

Радуйся, свеще Божественнаго пламене;

Радуйся, ум Христов имевый.

Радуйся, заповеди Божии свято соблюдавый;

Радуйся, иноческаго правила исполнителю.

Радуйся, подвигом добрым подвизавыйся;

Радуйся, молитвами яко крилами возлетаяй к Богу.

Радуйся, уготовивый в себе жилище Духу Святому;

Радуйся, сияние чистоты.

Радуйся, преподобне Савво, отче преблаженнейший.

Кондак 3

Сила смирения твоего отведе тя, преподобне, от тщетных похвал человеческих к преподобному Евфросину, с ним же возжелал еси пети Богу: Аллилуиа.

Икос 3

Имея послушание крепкое во обители преподобнаго Евфросина вся повеленная тебе исполнил еси благопокорно. Сего ради тебе вопием ти таковая:

Радуйся, иноче ревностный;

Радуйся, труды ко трудам приложивый.

Радуйся, повиновение к наставнику твоему сохранивый;

Радуйся, в послушании твоем смирение возрастивый.

Радуйся, возревновавый Евфросина шествовати неуклонно;

Радуйся, на многия труды себе покоривый.

Радуйся, ревнителю послушания в младости;

Радуйся, украшенный добродетельми в старости.

Радуйся, преподобне Савво, отче преблаженнейший.

Кондак 4

Бурею жития мирскаго отягчаеми, удивляемся егда дерзаем уразумети, како непроходимую пустыню соделал еси яко крин цветущую и в ней сладостно пел: Аллилуиа.

Икос 4

Слышав от учеников преподобнаго Евфросина и от окрестных жителей, яко на пятьнадесять поприщ есть место безлюдное, Крыпец именуемое, восхотел еси в месте том особь во уединении поработати Богу. Сего ради приемли от нас похвалы такова:

Радуйся, пустынный Христов учениче;

Радуйся, избранниче Божий.

Радуйся, в подвизе твоем от Господа помощь приявый;

Радуйся, благодати Божия вместилище.

Радуйся, пустыннаго жития насаждение;

Радуйся, пустыню соделавый в храм Богу.

Радуйся, возлюбивый уединения сладость;

Радуйся, вместо житейския молвы молитву избравый.

Радуйся, преподобне Савво, отче преблаженнейший.

Кондак 5

Благосветлый светильник явился еси во тьме, сияющий в пустыни крыпецстей, егда сокрылся тамо ради Бога, Тому ангельски служити, Тому всецело работати с песнию: Аллилуиа.

Икос 5

Виде учитель твой, преподобный Евфросин, яко совершеннаго послушания исполнился еси, отче Савво, сего ради слышав желание твое пред Господем одиночествовати в пустыни, уразуме в желании твоем Духа Святаго внушение, и благословив тя на новый подвиг рече: иди с миром; темже и мы ти сице вопием:

Радуйся, единаго Бога служителю;

Радуйся, бесов из пустыни прогонителю.

Радуйся, послушания нелицемернаго хранителю;

Радуйся, наставника твоего благословения блюстителю.

Радуйся, громе на диявола возгремевый;

Радуйся, искушения его отразивый.

Радуйся, пустынническими подвиги себе возвеличивый;

Радуйся, уединенным молением твоим обильную благодать стяжавый.

Радуйся, преподобне Савво, отче преблаженнейший.

Кондак 6

Проповедник Божия слова был еси егда прихождаху к тебе окрестнии жители, послушати душеполезнаго учения твоего, ихже поучал еси отчуждатися всех мирских сладостей, в чистоте и целомудрии проводити время жития взывая к Богу: Аллилуиа.

Икос 6

Возсиявый в пустыни свет веры твоея, многие боголюбцы привлече идти к тебе на иноческое сожительство ихже ты с любовию принимал еси к себе. Тогда же и храм во славу Христа Бога и возлюбленнаго ученика Его Иоанна Богослова воздвизал еси и наставление иночествующим преподал еси. Тебе убо, яко богомудрому наставнику иноков возглашаем сице:

Радуйся, притекающих к тебе с любовию принимавый;

Радуйся, оставивых мир сей Христа ради, яко птицы под кров свой собираяй.

Радуйся, ничтоже свое, но вся обще имети повелевый;

Радуйся, любовь нелицемерну между собою всем заповедавый имети.

Радуйся, в житии сем великое смирение имети наказуяй;

Радуйся, от нечистоты греховныя воздержатися повелевый.

Радуйся, кротости и смирения Христова истинный подражателю;

Радуйся, Христовым путем, жизнь твою прошедый.

Радуйся, преподобне Савво, отче преблаженнейший.

Кондак 7

Хотя приложити доброе тщание об устроении братства подвижников создал еси храм во имя возлюбленного ученика Христова и явился еси благий отец и наставник всех собравшихся к тебе христолюбцев и с ними вкупе пел еси: Аллилуиа.

Икос 7

Новые твои подвиги зряще начаша к тебе блаженому отцу приходити христолюбивии псковстии людие, на сооружение обители милостыню многу подавающе. Ты же поставив во игумена обители твоея инока Кассиана, пребывал еси свободен от дел правления, поучая приходящих к тебе слову Божию, сего ради ублажаем тя сице:

Радуйся, светильниче всесветлый;

Радуйся, наставниче монахов.

Радуйся, чистоты селение;

Радуйся, Христово благоухание.

Радуйся, тобою собранным инокам Отческое завещание оставивый;

Радуйся, отгнавый заблуждение от овец твоих.

Радуйся, от труда рук твоих питавый алчущия;

Радуйся, во обители твоей дом призрения бедных учинивый.

Радуйся, преподобне Савво, отче преблаженнейший.

Кондак 8

Странное чудо видим на тебе преподобне, како прослави тя Бог еще на земли, небесною славою, зане работал еси Ему со страхом и трепетом. Темже благодарственно вопием Ему: Аллилуиа.

Икос 8

Весь был еси в вышних преподобне Савво, и содержал еси твердо уставы обители твоея. Сего ради возбранил еси болящей княгине Псковстей внити в монастырь твой, приняв мужа ея, самой преподал еси благословение и исцелил ю вне врат монастырских. Темже прославляюще Господа, даровавшего тебе дар таковых чудес, приносим ти похвалы сицевая:

Радуйся, силою Божией исцеления подаваяй;

Радуйся, дар чудотворений от Христа приемый.

Радуйся, болезней целителю;

Радуйся, подаваяй нам исцеление в недугах наших.

Радуйся, с любовию сретавый мужей, приходящих во обитель твою;

Радуйся, и князя супружницы в болезни сущей, вход во обитель возбранивый.

Радуйся, твердый уставов обители твоей хранителю;

Радуйся, не воззревый на лице сильных земли.

Радуйся, преподобне Савво, отче преблаженнейший.

Кондак 9

Всякая верных душа удивися богатству благодати, данным тебе от Бога Вседержителя, и силу чудес твоих благоговейно прослави ты бо во плоти сый, возымел еси власть над духи нечистыми. Сего ради чудодеющему во всех Богу вопием: Аллилуиа.

Икос 9

Ветийство человеческое не может изрещи силы Божия, Его промышление о тебе, како прослави тя яко светоносителя света Христова в земли нашей. Мы же святость твою верою почитающе святче Божий вопием ти сице:

Радуйся, заре солнца правды, пределы града Пскова озаряющая;

Радуйся, многих грешников ко спасению наставивый.

Радуйся, море, всякое нечестие потопляющее;

Радуйся, благочестием сердца верных напояяй.

Радуйся, жестокою стезю мира сего к небесным вратам прошедый;

Радуйся, за подвиги твоя возмездие небесных благ получивый.

Радуйся, воине Небеснаго Царя против невидимых враг;

Радуйся, благоуханный крине в небесных вертоградех процветший.

Радуйся, преподобне Савво, отче преблаженнейший.

Кондак 10

Спасти хотя душ человеческих, учил еси покаянию люди мирския. Такожде и по преставлении твоем не оставляеши вразумляти их яко же и от гроба твоего слышати нам глас твой учительный, да в чистоте сердца нашего поем Христу: Аллилуиа.

Икос 10

Стена был еси обители твоей, Савво, отче наш, темже пришедших разбойников, дерзнувших разорити обитель твою, устрашил еси явлением жезла твоего, послежде на покаяние тех наставил еси, поющих ти сице:

Радуйся, о людех грешных пекущийся;

Радуйся, от греха к покаянию обращаяй.

Радуйся, в покаянии к тебе приходящих милуяй;

Радуйся, подражателю милосердия Отца Небеснаго.

Радуйся, присный предстателю у престола Божия;

Радуйся, обитель твою добре хранящий.

Радуйся, сокровище милосердия и любве;

Радуйся, истинный пастырю душ человеческих.

Радуйся, преподобне Савво, отче преблаженнейший.

Кондак 11

Пение Благодарственное воспеваем о истиннем твоем о душах людских попечении, яко помиловал еси люди, забывшая Бога и привел еси их вкупе с тобою, Савво отче, пети песнь: Аллилуиа.

Икос 11

Светоподательница светильника под спудом сокрываема шестьдесят лет, яви тя Бог учеником твоим, иже при строении храма обретоша мощи твоя. Мы же, мощем твоим честным поклоняющиеся, с благодарением и радостию взываем сице:

Радуйся, класы многоплодныя хлеба жизни возрастивый;

Радуйся, мощи твоя нам оставивый яко драгоценную святыню.

Радуйся, от мощей твоих токи исцеления испущаяй;

Радуйся, человека хотяща умрети язвою, молитвами твоими исцеливый.

Радуйся, болезни зубныя, трясавицы и беснования врачуяй;

Радуйся, смертоносную язву прикосновением к твоему гробу и перстию от него исцеливый.

Радуйся, к людем немощным сострадательно приникаяй;

Радуйся, преподобне Савво, отче преблаженнейший.

Кондак 12

Благодать изобильную и велие дерзновение ко Христа Богу стяжал еси Савво отче, сего ради не остави нас, творящих всечестную память твою и не забуди нас грешных в жизни сей и в будущем веце, поющих Богу: Аллилуиа.

Икос 12

Поюще святую и подвижническую память твою, преподобне отче, просим тя мы, достойные всякого осуждения и муки, да не воздаст нам праведный Судия по делом нашим, но да явит нам свое человеколюбие, сего ради вопием к тебе таковая:

Радуйся, отче, во Христе вечно пребываяй;

Радуйся, чистоты небесныя сияние.

Радуйся, слава граду нашему Пскову;

Радуйся, каменю веры несокрушимый.

Радуйся, столпе терпения в бедах незыблемый;

Радуйся, пустыни твоея великое украшение.

Радуйся, звездо, сияющая во мраце жития мирскаго;

Радуйся, молитвами твоими нас от лукавого избавляяй.

Радуйся, преподобне Савво, отче преблаженнейший.

Кондак 13

О, преподобне отче наш Савво, приими от нас сие моление наше и вознеси е на жертвенник Божий, да простит нам вся наша согрешения и да сподобит нас спасения вечнаго, вопиющих Ему: Аллилуиа.

Молитва преподобному Савве Крыпецкому

Преподобне отче Савво, пустынный подвижниче, в телеси ангеле, воине Христов доблественне, веры правило, церкве утверждение, благочестия образе, добродетелей светило, трудов, поста, воздержания, чистоты и целомудрия предводителю, помощниче всем нуждающимся, странствующим вождю, плавающим кормчию, обуреваемым пристанище, ослабевающим помоще, обидимым заступление, печальным утешение, вдовицам и сирым покрове, алчущим питание, нагим одеяние, плачущим утешение, болящим исцеление, ненадеющимся надеяние, христиан всех ходатайство и защищение; призри милостивно на ны, припадающия к святым мощем твоим, внемли молитвам нашим и подаждь коемуждо от нас благопотребная, просимая от тебе. Вемы, святче Божий, яко имаше дерзновение ко Владыце Христу Богу, и елика аще воспросиши у Него дастся нам. Аще же и недостойни есмы благодати Его, обаче твоя молитва да сотворит ны ея достойны, много бо может прилежная молитва праведного якоже рече апостол. Сам убо ты воздвигни нас из глубины греховныя, неверныя просвети, еретики обрати, заблуждшия в нас от православия к познанию истинныя веры настави, всей же церкви исходатайствуй мир и святыню, едимомыслие в вере, умов благопостояние, соревнование в благочестии, единодушие в братолюбии, верность к отечеству, преданность предержащей власти, начальствующим кротость и человеколюбие, рабом же нестроптивость, родителем благопопечение о чадех, чадом же страх и послушание, девствующим чистоту и целомудрие, брачным же верность и непорочность ложа, всем же грешным покаяние, кающимся прошение, в злоключениих же терпение и упование, в надежде же спасение даруй. Избави же всех нас от глада, губительства, от труса и потопа, от огня и меча, от нахождения иноплеменных и междоусобныя брани, и от нападения вражия, и от тлетворных ветр, и от смертоносныя язвы, и от напрасныя смерти, и от всякаго зла, да тако вси тобою просвещаеми, наставляеми, утешаеми, утверждаеми и сохраняеми, славим прославившаго тя Бога, Отца и Сына и Святаго Духа и твое предстательство, всегда, ныне и присно и во веки веков. Аминь.