Акафист преподобномученику Адриану Пошехонскому
Возбранный от Царя сил Господа Иисуса, воеводо воинов духовных, и крепкий победителю врагов невидимых, Адриане преподобне, пострадавый неповинно и стяжавый дерзновение ко Господу, от всяких нас бед свободи благоприятными твоими молитвами, да славяще тя заступника нашего, хвалебно тебе зовем:
Радуйся, Адриане преподобномучениче и чудотворче предивный.
Ангела земнаго и человека небеснаго являеши нам в житии твоем преподобне отче. Темже ангельскими глаголы подобаше восхваляти тя по достоянию, но мы любовию к тебе подвизаеми, аще человеческими гласы со усердием сице тебе взываем:
Радуйся, родителей благочестивых чадо благое.
Радуйся, великаго Ростова прозябание святое.
Радуйся, Богу Отцу усыновленный в святем крещении.
Радуйся, Богу Сыну соединивыйся во святем причащении.
Радуйся, Бога Духа Святаго дары приемый в святем миропомазании.
Радуйся, от пелен Богу освященный божественных таинств благодатию.
Радуйся, пещь страстей юностных угасивый воздержанием.
Радуйся, плоть томящую сокрушивый постом и бдением.
Радуйся, иго Христово и бремя Его легкое возлюбивый паче всех мирских красот.
Радуйся, горняя блага взыскати возжелевый паче всех земных доброт.
Радуйся, земная и мимотекущая в уметы вменивый.
Радуйся, восхождения небесная в сердце твоем совершивый.
Радуйся, Адриане преподобномучениче и чудотворче предивный.
Видев суету мира сего привременнаго, преподобне отче, отечество твое и дом родителей твоих оставил еси, и во град Киев пришед, ко обители Киево-печерстей во иночество пострижен был еси, подвизався тамо с преподобными, научился еси от них благоприятно пети Богу: Аллилуиа.
Разум небесный тебе даровася преподобне отче, и жительствуя в обители Киево-печерстей, добродетели преподобных отец Антониа и Феодосия стяжати поревновал еси, яко быти тебе воистинну наследнику преподобных, достойному похвал таковых:
Радуйся, треволнения моря житейскаго безбедно избежавый.
Радуйся, во обители Киево-печерстей пристанище спасения стяжавый.
Радуйся, иноче боголюбезный, отвергийся воли своея всецело.
Радуйся, послушниче совершенный, веления старцев исполнением их предварявый.
Радуйся, постниче неизнемогающий, хлебом сухим питавыйся.
Радуйся, трудолюбче благословенный, праздность душевредную возненавидевый.
Радуйся, во смирении преуспевый.
Радуйся, в молитвах и псалмопениих неутомимо пребывый.
Радуйся, худость ризную возлюбивый.
Радуйся, нищету вольную себе усвоивый.
Радуйся, преподобных печерских духовный учениче.
Радуйся, добродетелей их преемниче.
Радуйся, Адриане преподобномучениче и чудотворче предивный.
Силою Божиею осененный, отче преблаженне, стужив молвою человеческою в обители Киево-печерстей, возжелал еси безмолствовати в обители пустынней, и сего ради отшел еси в обитель Комельскую преподобнаго Корнилиа, и тамо водворился еси, зовый в безмолвии духа Христу, Царю и Богу: Аллилуиа.
Имый едино попечение, преподобне отче, еже како спастися и благоугодити Христу Богу, зело возрадовался еси, видев обитель Комельскую, в пустыни вне молвы человеческия стоявшую, и уставы пустынножительныя преподобнаго Корнилиа верно соблюдавшую, темже сице обрадованному и мы сия радостная приносим песноглашения:
Радуйся, мудрый странниче, иский отечества горняго.
Радуйся, Божий избранниче, от юга на север преселивыйся во спасение.
Радуйся, жестокою стезею шествовавый подвижничества совершеннаго.
Радуйся, неослабно трудивыйся во бдениих, пениих и пощениих.
Радуйся, плоть духу всецело покоривый.
Радуйся, страсти в души твоей искоренивый.
Радуйся, словом Божиим питавыйся, паче неже брашном гиблющим.
Радуйся, слезами молитвенными питие твое растворявый.
Радуйся, молитвенниче неусыпающий и благоумиленный.
Радуйся, подвижниче благодатию Божиею приосененный.
Радуйся, безмолвниче чуждый попечений житейских.
Радуйся, безстрастия достигнувый, и молчаливая уста имевый.
Радуйся, Адриане преподобномучениче и чудотворче предивный.
Бурное страстей море преплыл еси, преподобне, и веянием Духа Божия в пристань безстрастия благодатнаго достигл еси, еже видев Комельския обители благоговейный игумен Лаврентий, во диакона тя избра, да служиши олтарю Господню и молитвы соборныя возносиши за люди, зовый Богу: Аллилуиа.
Слышав себе похваляема от человек во обители Комельстей, смутился еси духом, преподобне отче, и тайно помышлял еси, еже безмолвствовати совершенно в пустыни, по примеру древних преподобных отец, и тамо избежати превозношения человеческаго. Таковому смиренномудрию твоему мы дивящеся, сице тебе вопием:
Радуйся, смирения высото недосягаемая мира сего суетою.
Радуйся, пустыни красото веселящая боголюбивыя души.
Радуйся, наследниче святых, нравы их подражавый.
Радуйся, подобниче ангелов, чистотою душевною просиявый.
Радуйся, Духа Святаго обителе прекрасная.
Радуйся, таиниче Пресвятыя Троицы.
Радуйся, имже побеждаемии рыдаху дуси тьмы.
Радуйся, крепкий низложителю всех их искушений и привидений.
Радуйся, мужественный победителю немощныя их силы.
Радуйся, благодатию Божию преисполненный.
Радуйся, Адриане преподобномучениче и чудотворче предивный.
Боготечно шествовал еси, преподобне отче, ангелом Божиим руководимый от обители Комельския в пустыню, Богом тебе назначенную ради подвигов духовных, и егда пришел еси, тамо ангел, во образе старца тебе сопутствовавый, внезапу невидим бысть, и познав еси, яко спутник твой не человек, но безплотный бысть, темже со трепетом воспел еси, ангелов и человеков Творцу песнь: Аллилуиа.
Видев красоту пустыни, Богом тебе дарованныя, преподобне отче, возрадовался еси духом, и образ Пресвятыя Богородицы тамо на древе поставив, во имя Ея освятил еси место то, да будет Она ему покровительницею и попечительницею навсегда, о сем похваляюще тя сице тебе зовем:
Радуйся, усердный почитателю Пресвятыя Богородицы.
Радуйся, присно славителю имене Ея преблагословеннаго.
Радуйся, приемый от Нея извещение хлебом и рыбою, пред иконою Ея обретенными, яко благоволит Она к твоему начинанию.
Радуйся, о сем преисполненный радости духовныя.
Радуйся, обитель иноческую во имя Богоматере в пустыни твоей основавый.
Радуйся, иноков пустыннолюбивых в оную собравый.
Радуйся, добрый пастырю овец словесных.
Радуйся, посту и бдению их учивый.
Радуйся, велий нареченный во Царствии Небеснем.
Радуйся, к нему бодренно руководивый твоя ученики.
Радуйся, назидавый их во спасение словом и житием твоим.
Радуйся, трудивыйся неленостно во славу Божию и во спасение душ человеческих.
Радуйся, Адриане преподобномучениче и чудотворче предивный.
Проповедник чудес Божиих явился еси, преподобне отче, пришед от пустыни твоея в царствующий град Москву, идеже от первосвятителя Макариа с любовию восприятый, во иереа от него освящен был еси и игуменом обители твоея поставленный, со многою милостынею в ню возвратился еси, благодарственно взывая ко Господу: Аллилуиа.
Возсиял еси, преподобне отче, ближним и дальным, яко солнце пресветлое, лучами добродетелей сияющее, душы и сердца верных духовно просвещающее. Темже прихождаху к тебе христолюбивии людие, наставления и благословения от тебе ищуще, зовуще и глаголюще:
Радуйся, Евангелия Христова благовестниче.
Радуйся, апостольских преданий хранителю.
Радуйся, Православия наставниче.
Радуйся, благочестия учителю.
Радуйся, грешников обличителю.
Радуйся, кающихся с Богом примирителю.
Радуйся, пресладкий увещателю.
Радуйся, прекроткий наказателю.
Радуйся, олтаря Господня непорочный служителю.
Радуйся, таинств Божиих достойный совершителю.
Радуйся, молитвеннеи руце горе со дерзновением воздевавый.
Радуйся, молитвы теплейшыя Господеви возновивый.
Радуйся, Адриане преподобномучениче и чудотворче предивный.
Хотение имел еси усердное, преподобне отче, храм Божий во имя Пресвятыя Богородицы честнаго и славнаго Ея успения в обители твоей построити, егоже соорудив и освятив, безкровную жертву приносил еси в нем Богу, достойно и праведно воспевая Ему ангельскую песнь: Аллилуиа.
Новый преподобномученик в земли Российстей явился еси преподобне отче, неповинно пострадав от злобных разбойник, на обитель твою нападших и тя мученически истязавших, ножами бо тело твое изранивше, огнем раны твоя опаляху, таже к конем тя привязавше, по земли влачиша и горцей смерти тя предаша, еже мы воспоминающе, сице тебе вопием:
Радуйся, многотерпеливый страстотерпче.
Радуйся, мужественный страдальче.
Радуйся, кротко и незлобиво мучение лютое претерпевый.
Радуйся, за мучивших тя Бога моливый.
Радуйся, ножами уязвляемый и огнем опаляемый не возстенавый.
Радуйся, молитвенно о помощи к Богу вопиявый.
Радуйся, мученическую смерть мирно восприявый.
Радуйся, святую душу твою, конми по земли влачимый, Господеви предавый.
Радуйся, житие земное доблественне скончавый.
Радуйся, венец нетленный от Господа получивый.
Радуйся, яко прочее не коснется тебе ни болезнь, ни мука.
Радуйся, яко вечно радуешися со святыми.
Радуйся, Адриане преподобномучениче и чудотворче предивный.
Странное и преславное чудо яви Господь над мощами твоими, преподобне отче, разбойники из обители твоея увезенными и в пустыни безвестне в земли сокровенными, древо чудотворное над ними возрасте, егоже ветви и плоды исцеляху всякия болезни в людех, иже молящеся славляху Бога и вопияху Ему: Аллилуиа.
Весь народ недоумеваше, откуду древу бездушному таковая благодать целебная дадеся, дондеже по смотрению Божию открыся, яко у корней сего древа святыя мощи твоя почиваху, многострадальный угодниче Божий, ублажаемый от верных звании таковыми:
Радуйся, чудес пучино Богом излиянная.
Радуйся, целебниче благий недугов человеческих.
Радуйся, древо сладкоплодовитое, имже напиташася вернии.
Радуйся, древо благосеннолиственное, имже покрываются мнози.
Радуйся, искавшым тя неявленный.
Радуйся, неведавшым тя открытый.
Радуйся, сокровище драгое в пустыни сокровенное.
Радуйся, бисере многоценный от недр земных возсиявый.
Радуйся, обретением мощей твоих обитель твою духовне возвеселивый.
Радуйся, сиротство ея утешивый.
Радуйся, лишение ея благодатно восполнивый.
Радуйся, ближним и дальним милость твою целебную всещедро даровавый.
Радуйся, Адриане преподобномучениче и чудотворче предивный.
Вси иноцы обители твоея преподобне отче, возвеселишася радостию святою егда честныя мощи твоя от пустыни со славою и псалмопением во оную принесошася, и во храме Богоматере благолепно положишася, ихже пренесение светло празднующе, хвалебно вопияху ко Господу: Аллилуиа.
Ветийство наше песненное не довлеет к достойному прославлению твоих многих чудес, преподобномучениче Адриане приснопамятне: обаче ты яко благ и милосерд не возгнушайся наших недовлеющих похвал, но милостивно услыши с любовию тебе зовущих:
Радуйся, новый российский целебниче.
Радуйся, всех преподобных российских сподвижниче.
Радуйся, Антониа Печерскаго подражателю.
Радуйся, Феодосиа Печерскаго соревнователю.
Радуйся, Сергию Радонежскому равночестне.
Радуйся, Варлааму Хутынскому единоправне.
Радуйся, подобне Аврамию Ростовскому невидимаго Велеса сокрушивый.
Радуйся, подобне Корнилию Комельскому пустыню духовне уплодоносивый.
Радуйся, Макариа Желтоводскаго великодушие стяжавый.
Радуйся, Димитриа Прилуцкаго благодатныя дары получивый.
Радуйся, Зосиме Соловецкому нравом пустыннолюбным соравнивыйся.
Радуйся, Савватию Соловецкому упованием на Бога уподобивыйся.
Радуйся, Адриане преподобномучениче и чудотворче предивный.
Спасение вечное унаследовал еси, угодниче Божий, и за страдания временная получил еси блаженство вечное, обитаеши бо со ангелы и всеми святыми во славе невечерней, и сладце поеши во гласе радования и веселия победную песнь Христу Богу: Аллилуиа.
Стена еси защищения верным, чудотворче святый, и всем с любовию совершающым память твою заступник и покровитель бываеши, недужныя исцеляеши, скорбящыя утешаеши, и всех подвизаеши звати тебе:
Радуйся, светилниче пресветлый, мрак страстей прогоняющий.
Радуйся, источниче многоводный исцелений благодатных.
Радуйся, реко приснотекущая чудес.
Радуйся, цвете нетления, святую российскую церковь облагоухавый.
Радуйся, милования и врачевания подателю всещедрый.
Радуйся, любве и сострадания проявителю всебогатый.
Радуйся, земнородным заступниче небесный.
Радуйся, православным предстателю нелестный.
Радуйся, пустыни прекрасное прозябение.
Радуйся, обители твоея присное радование.
Радуйся, столпе православия непоколебимый.
Радуйся, покрове, не крыющийся от нашего притекания.
Радуйся, Адриане преподобномучениче и чудотворче предивный.
Пение хвалебное тебе приносим, угодниче Божий, предивный в чудесех, и с любовию совершаем пресветлое торжество твоего мученическаго убиения и преславнаго мощей твоих обретения и пренесения, радующеся о твоем прославлении в лице святых и зовуще Богу дивно в тебе прославльшемуся: Аллилуиа.
Светоподательный светилник Божией благодати являешися нам, преподобномучениче преблаженне, во мнозех и предивных твоих чудесех, яже удостоверяют нас в твоей святости и близости ко Господу, Емуже помолися за ны грешныя, усердием сице тебе зовущыя:
Радуйся, алавастре многоцелебный на всяк недуг врачевство содержащий.
Радуйся, маслино благоплодная, елей Божией благодати обильно нам источающая.
Радуйся, благоуханный кипарисе, зной страстей нам прохлаждающий.
Радуйся, крине пустынный, духовне нас увеселяющий.
Радуйся, соле земли Российския, яко никогдаже обуяет.
Радуйся, светлое зерцало добродетелей.
Радуйся, правило иноческаго богоугодаго жития.
Радуйся, образе терпения и незлобия.
Радуйся, кроткий Христов последователю.
Радуйся, приискренний Иисусов любителю.
Радуйся, сыне благословенный Отца Небеснаго.
Радуйся, друже святых, присный Богу.
Радуйся, Адриане преподобномучениче и чудотворче предивный.
Благодати причастная рака святых и многоцелебных мощей твоих, Адриане преблаженне, яко новая купель Силоамская нам является, к нейже приходяще недужнии здрави возвращаются, и всяким болезнем исцеление от нея подается твоими молитвами ко Господу, чудотворче святый, Емуже поем о тебе хвалебную песнь: Аллилуиа.
Поюще многая и преславная чудотворения твоя, Адриане преподобне, хвалим, славим и величаем прославльшаго тя и дивнаго во святых своих Бога нашего, Иже дарова нам тебе целебника благодатнаго и заступника милостиваго, тебе же от любве сердечныя сице вопием:
Радуйся, Пресвятыя Троицы верный угодниче.
Радуйся, Пресвятыя Богородицы изрядный слуго.
Радуйся, ангельских воинств собеседниче.
Радуйся, предтечи пустыннолюбивый подражателю.
Радуйся, пророков Божиих единоревнителю.
Радуйся, апостолов Христовых последователю.
Радуйся, мученических полков украшение.
Радуйся, велий в лице преподобных.
Радуйся, праведных сонаследниче.
Радуйся, всех святых сожителю.
Радуйся, телеса наша безмездне врачуяй.
Радуйся, душы нашя молитвами твоими спасаяй.
Радуйся, Адриане преподобномучениче и чудотворче предивный.
О великий угодниче Божий преподобномучениче и чудотворче Адриане! Нынешнее наше моление милостивно приемь, моли Триединаго Бога избавити нас от бед временных и вечных, да избавльшеся мучений адских молитвами твоими блаженство райское унаследуем и со святыми воспоем Ему песнь хвалы и благодарения: Аллилуиа.
О священная и многострадальная главо, земный ангеле и небесный человече, преподобномучениче и чудотворче Адриане! Припадаем к тебе с верою и любовию и молим ти ся прилежно, яви нам смиренным и грешным святое твое заступление; се бо грех ради наших не имамы свободы чад Божиих, просити о потребах наших Господа и Владыку нашего, но тебе молитвенника благоприятнаго к Нему предлагаем и просим тя со усердием многим: исроси нам у благости Его благопотребныя дары душам и телесем нашым: веру праву, надежду спасения несумненну, любовь ко всем нелицемерну, в искушениих мужество, в злостраданиих терпение, в молитвах постоянство, душ и телес здравие, земли плодоносие, воздуха благорастворение, житейских потреб довольство, мирное и безмятежное житие, благую христианскую кончину, и добрый ответ на Страшнем Суде Христове. Испроси, угодниче Божий, у Царя небесе и земли, страждущую страну Российскую от лютых безбожник и власти их да свободит, и да возставит престол православных царей; верных рабов Его, в скорби и печали день и нощь вопиющих к Нему, многоболезный вопль да услышит и да изведет от погибели живот наш. Не забуди, святче Божий, и обитель твою, тобою созданную и присно тя чтущую, но соблюди ю и вся живущыя и подвизающыяся в ней и на поклонение в ню приходящыя невредимы от искушений диавольских и всякаго зла. Ей, преподобномучениче святый! Не лиши нас помощи твоея небесныя, но молитвами твоими всех нас приведи в пристанище спасения, и наследники яви нас всесветлаго царствия Христова, да поем и славим неизреченныя щедроты человеколюбца Бога Отца и Сына и Святаго Духа, и твое святое заступление, во веки веков. Аминь.
Преподобне отче преблаженне Адриане, первейший пустыни сея просветителю и монашескаго жития в ней основателю, пришедый в ню со ангелом Господним, и освятивый ю Пресвятыя Богородицы чудотворною иконою и благодатию, в нейже и явился еси подвиги твоими пресветлое целомудрия зерцало, прекрасный смиренномудрия образе, одушевленный терпения столпе, известное воздержания правило и нищеты любителю, и всесовершенный Христов угодниче, се мы грешнии, смиренно припадающе молим тя: приими моления наша и вознеси я на жертвенник благоутробия Божия. Испроси нам предстателством твоим у всемилостиваго Бога нашего: мир миру, Церкви святей утверждение, согласие в вере, преспеяние во благочестии и добродетелех христианских, да достойни явимся щедрот и милостей благосерднаго Бога: паству твою духовную и обитель твою святую, непрестанно управляти жезлом мудрости духовныя: подвизающымся помози, разслабленныя укрепи, падающыя возстави, споспеши всем нам иго Христово в терпении и благодушии понести, и всех нас управи в мире и в покаянии скончати живот наш и со упованием спасения преселитися в блаженная недра Авраамова, идеже ты радостно по трудех земных опочиваеши, прославляя со всеми святыми Триипостаснаго Бога, Отца и Сына, и Святаго Духа, в безконечныя веки веков. Аминь.
О великий угодниче Божий преподобномучениче и чудотворче Адриане! Призри на нас грешных, к честней раце святых и многоцелебных мощей твоих припадающих и просящих твоего заступления и помощи, скорбь нас обдержит и не имамы помощи и утешения в мире сем скоротечнем, но к тебе прибегаем, многострадальный угодниче Божий, яко сострадати нам могущему и велие дерзновение стяжавшему ко Христу Богу, к Немуже многомощен предстатель еси о всех с верою к тебе прибегающих и твоего заступления и помощи просящих. Моли убо человеколюбца Господа, яко да простив нам безчисленная наша прегрешения, не отвратит милость свою от нас, но, яко благ и милосерд, да явит нам безконечное свое человеколюбие, и в бедах и напастех всесильную свою помощь нам да подаст. Ей, угодниче Божий, воздвигни преподобнеи руце твои и моли Христа Бога, Емуже верно послужил еси, да не отринет молений наших недостоинства ради нашего, но да явит нам благовременне помощь и милость свою, да славим Его щедроты и твое святое предстательство ныне, и присно, и во веки веков. Аминь.