Канон о единой усопшей

Молитвами святых отец наших, Господи Иисусе Христе Боже наш, помилуй нас. Аминь.

Святый Боже, Святый крепкий, Святый безсмертный, помилуй нас. (Читается трижды, с крестным знамением и поясным поклоном.)

Слава Отцу и Сыну и Святому Духу, и ныне и присно и во веки веков. Аминь.

Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.

Господи, помилуй (трижды).

Слава Отцу и Сыну и Святому Духу, и ныне и присно и во веки веков. Аминь.

Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.

Господи Иисусе Христе, Сыне Божий, помилуй нас. Аминь.

Господи, помилуй (12 раз).

Слава Отцу и Сыну и Святому Духу, и ныне и присно и во веки веков. Аминь.

Приидите, поклонимся Цареви нашему Богу (поклон).

Приидите, поклонимся и припадем Христу, Цареви нашему Богу (поклон).

Приидите, поклонимся и припадем Самому Христу, Цареви и Богу нашему (поклон).

Живый в помощи Вышняго, в крове Бога небеснаго водворится. Речет Господеви: заступник мой еси и прибежище мое, Бог мой, и уповаю на Него. Яко Той избавит тя от сети ловчи, и от словесе мятежна, плещма Своима осенит тя, и под криле Его надеешися, оружием обыдет тя истина Его. Не убоишися от страха нощнаго, от стрелы летящия во дни, от вещи во тьме преходящия, от сряща и беса полуденнаго. Падет от страны твоея тысяща, и тьма одесную тебе, к тебе же не приближится, обаче очима твоима смотриши и воздаяние грешников узриши. Яко Ты, Господи, упование мое; Вышняго положил еси прибежище твое. Не приидет к тебе зло, и рана не приближится телеси твоему, яко Ангелом Своим заповесть о тебе, сохранити тя во всех путех твоих. На руках возмут тя, да не когда преткнеши о камень ногу твою; на аспида и василиска наступиши, и попереши льва и змия. Яко на Мя упова, и избавлю и: покрыю и, яко позна имя Мое. Воззовет ко Мне, и услышу его, с ним есмь в скорби, изму его и прославлю его, долготою дней исполню его и явлю ему спасение Мое.

Слава Отцу и Сыну и Святому Духу, и ныне и присно и во веки веков. Аминь.

Аллилуия, аллилуия, аллилуия, слава Тебе, Боже (трижды).

Господи, помилуй (трижды).

Глубиною мудрости человеколюбно вся строяй и полезная всем подаваяй, Едине Содетелю, упокой, Господи, душу рабы Твоея, на Тя бо упование возложи, Творца и Зиждителя и Бога нашего.

Слава, и ныне: Богородичен: Тебе и стену, и пристанище имамы, и молитвенницу благоприятну к Богу, Егоже родила еси, Богородице Безневестная, верных спасение.

Помилуй мя, Боже, по велицей милости Твоей, и по множеству щедрот Твоих очисти беззаконие мое. Наипаче омый мя от беззакония моего, и от греха моего очисти мя. Яко беззаконие мое аз знаю, и грех мой предо мною есть выну. Тебе единому согреших и лукавое пред Тобою сотворих, яко да оправдишися во словесех Твоих и победиши, внегда судити Ти. Се бо, в беззакониих зачат есмь, и во гресех роди мя мати моя. Се бо, истину возлюбил еси, безвестная и тайная премудрости Твоея явил ми еси. Окропиши мя иссопом, и очищуся, омыеши мя, и паче снега убелюся. Слуху моему даси радость и веселие, возрадуются кости смиренныя. Отврати лице Твое от грех моих, и вся беззакония моя очисти. Сердце чисто созижди во мне, Боже, и дух прав обнови во утробе моей. Не отвержи мене от лица Твоего, и Духа Твоего Святаго не отыми от мене. Воздаждь ми радость спасения Твоего и Духом владычним утверди мя. Научу беззаконныя путем Твоим, и нечестивии к Тебе обратятся. Избави мя от кровей, Боже, Боже спасения моего, возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо, всесожжения не благоволиши. Жертва Богу дух сокрушен, сердце сокрушенно и смиренно Бог не уничижит. Ублажи, Господи, благоволением Твоим Сиона, и да созиждутся стены Иерусалимския. Тогда благоволиши жертву правды, возношение и всесожегаемая, тогда возложат на олтарь Твой тельцы.

Ирмос: Воду прошед, яко сушу, и египетскаго зла избежав, израильтянин вопияше: Избавителю и Богу нашему поим.

Припев: Покой, Господи, душу усопшия рабы Твоея.

Отверз уста моя, Спасе, слово ми подаждь молитися, Милосерде, о преставленней рабе Твоей, (имярек), да покоиши душу ея, Владыко.

Покой, Господи, душу усопшия рабы Твоея.

Мертв быв плотию, Спасе, и во гробе положен с мертвыми, душу рабы Твоея покой в месте злачне, яко Милосерд.

Слава: Молебный глас мой услыши, Боже Триипостасне, и учини душу преставленныя в недрех Авраамлих, Избавителю.

И ныне: Ты, Пречистая Богородице, Егоже без искуса мужеска заченши родила еси, моли Сына Твоего подати покой рабе Твоей преставленней, (имярек).

Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний краю, верных утверждение, Едине Человеколюбче.

Покой, Господи, душу усопшия рабы Твоея.

В месте злачне, в месте покойне, идеже лицы святых веселятся, душу рабы Твоея преставленныя покой, Христе, Едине Милостиве.

Покой, Господи, душу усопшия рабы Твоея.

Идеже лицы святых, тамо вчини, Владыко, послужившую Тебе всем сердцем и воздвигшую иго Твое на рамо свое, яко Един Владыка живота и смерти.

Слава: Небесный Отче Вседержителю, и Сыне Единородный, и Душе Святый Исходный, презри умершия согрешения, и в Церкви первенец всели ю, славити Тя со всеми угождшими Тебе.

И ныне: Яко Мати Святая Пресвятаго Бога, Владычице всяческих, Марие Богородице, со всеми святыми Сего моли душу покоити рабы Твоея, (имярек), в небесных селениих.

Господи, помилуй (Трижды).

Покой, Спасе наш, с праведными рабу Твою, и сию всели во дворы Твоя, якоже есть писано, презирая, яко благ, прегрешения ея вольная и невольная, и вся яже в ведении и не в ведении, Человеколюбче.

Слава, и ныне, Богородичен: От Девы возсиявый миру, Христе Боже, сыны света Тою показавый, помилуй нас.

Ирмос: Услышах, Господи, смотрения Твоего таинство, разумех дела Твоя и прославих Твое Божество.

Покой, Господи, душу усопшия рабы Твоея.

Сошедый в преисподняя, Христе, совоздвигл еси умершия вся, и преставльшуюся от нас покой, Спасе, яко щедр.

Покой, Господи, душу усопшия рабы Твоея.

Никтоже без греха есть, токмо Ты Един, Владыко, сего ради преставленней и грехи остави, и в рай тую всели.

Слава: Услыши, Троице Святая, гласы молебныя, приносимыя Тебе в церкви о усопшей, и Богоначальным Твоим светом озари душу, омраченную суетными привержении.

И ныне: Родила еси, Пречистая, без мужеска семене, Бога совершенна и Человека совершенна, вземлющаго грехи наша, Дево. Того моли, Госпоже, преставльшейся рабе Твоей подати покой.

Ирмос: Просвети нас повелении Твоими, Господи, и мышцею Твоею высокою Твой мир подаждь нам, Человеколюбче.

Покой, Господи, душу усопшия рабы Твоея.

Имый живота и смерти власть, преставленную от нас покой, Христе Боже, Ты бо еси всех, Спасе, покой и живот.

Покой, Господи, душу усопшия рабы Твоея.

На Тя, Спасе, надежду возложь, умершая отыде от нас; Ты же, Господи, ущедри ю, яко Бог многомилостив.

Слава: Просвети нас, Трисвяте, воспеваемый Владыко, молящихся Тебе, мир небесный прияти, и в мирных селех душу вчини, отшедшую от временных в надежде безконечныя жизни.

И ныне: Шуйяго стояния, Пречистая, избавити преставленную умоли Сына Твоего, Дево Госпоже, яко Спаса и Бога нашего Мати сущая.

Ирмос: Молитву пролию ко Господу, и Тому возвещу печали моя, яко зол душа моя исполнися и живот мой аду приближися, и молюся, яко Иона: от тли, Боже, возведи мя.

Покой, Господи, душу усопшия рабы Твоея.

Ада испроверг, Владыко, воскресил еси умершия от века: и ныне преставленную от нас, в недро Авраамле Ты, Боже, всели, прегрешения вся отпустив, яко Милосерд.

Покой, Господи, душу усопшия рабы Твоея.

Заповедь, юже ми дал еси, Боже, преступих и смертен бых, но Ты, Боже, сошедый во гроб и души яже от века воскресивый, не возстави мене, Владыко, на мучение, но на покой, преставленная вопиет

Тебе с нами, Многомилостиве.

Слава: Молим Тя, безначальне Отче и Сыне и Душе Святый, злобою душезлобнаго мира озлобленную и к Тебе, Зиждителю, прешедшую душу во адово дно не отрини, Боже Спасе мой.

И ныне: С небесе Христос Бог наш, яко дождь на руно, Пречистая, сниде на Тя, напаяя весь мир и изсушая вся безбожныя потоки, наводняяй всю землю разумом Своим, Приснодево; Того моли дати покой преставленней рабе Твоей, (имярек).

Господи, помилуй (Трижды). Слава и ныне:

Со святыми упокой, Христе, душу рабы Твоея, идеже несть болезнь, ни печаль, ни воздыхание, но жизнь безконечная.

Сам един еси Безсмертный, сотворивый и создавый человека; земнии убо от земли создахомся и в землю туюжде пойдем, якоже повелел еси, Создавый мя и рекий ми: яко земля еси и в землю отыдеши, аможе вси человецы пойдем, надгробное рыдание творяще песнь: аллилуия, аллилуия, аллилуия.

Ирмос: От Иудеи дошедше отроцы, в Вавилоне иногда, верою Троическою пламень пещный попраша, поюще: отцев Боже, благословен еси.

Покой, Господи, душу усопшия рабы Твоея.

Владыко Христе Боже, егда хощеши судити миру, пощади душу рабы Твоея, егоже от нас приял еси, вопиющаго: отец наших Боже, благословен еси.

Покой, Господи, душу усопшия рабы Твоея.

В пищи райстей, идеже праведных души веселятся, послуживших Тебе, причти с ними, Христе, душу рабы Твоея, воспевшия: отец наших Боже, благословен еси.

Слава: Иудейския три отроки спасый во огни, в Триех Лицех воспетый, избави огня вечнаго усопшую, воспевшую Ти верно: отец наших Боже, благословен еси.

И ныне: Владыку Христа рождшая, всех Бога, власти темныя воздушнаго князя избави, Дево, душу преставльшияся в вере и воспевшия: отец наших Боже, благословен еси.

Ирмос: Седмерицею пещь халдейский мучитель богочестивым неистовно разжже, силою же лучшею спасены сия видев, Творцу и Избавителю вопияше: отроцы благословите, священницы воспойте, людие превозносите во вся веки.

Покой, Господи, душу усопшия рабы Твоея.

Скончав течение и к Тебе прибегох, Господи, преставленная вопиет ныне, прегрешения остави, Христе Боже, и не осуди мене, егда хощеши судити всем, верно бо Тебе взывах: вся дела Господня, Господа пойте и превозносите Его во веки.

Покой, Господи, душу усопшия рабы Твоея.

Понесшую, Владыко, иго Твое на раме своем, и бремя Твое легкое, аще и не всегда, обаче в месте преподобных Твоих всели душу ея, воспевшия Тебе, Христе Спасе: отроцы благословите, священницы воспойте, людие превозносите Его во веки.

Благословим Отца и Сына и Святаго Духа, Господа.

Безначальная Троице Святая, Боже Отче и Сыне и Душе Святый, в лице святых причти душу преставленныя рабы Твоея и огня вечнаго избави, да Тя хвалит, воспевая во веки: отроцы благословите, священницы воспойте, людие превозносите Его во веки.

И ныне: Тя, Дево, пророчестии лицы прорекоша, прозряще бо Тя прозорливыма очима: ов убо жезл нарече Тя, ин же дверь восточную, ов же гору человеки несекомую. Мы же исповедуем Тя воистинну Богородицу, Бога всяческих рождшую, Егоже моли упокоити преставленную во веки вся.

Ирмос: Ужасеся о сем небо, и земли удивишася концы, яко Бог явися человеком плотски, и чрево Твое бысть пространнейшее небес. Тем Тя, Богородицу, Ангелов и человек чиноначалия величают.

Покой, Господи, душу усопшия рабы Твоея.

Иисусе Боже мой, Спасе, Адамле Ты взял еси преступление и смерти вкусил еси, да человеки от нея свободиши, Милосерде. Темже молим Тя, Милостиве: преставленную покой, яко благ, во дворех святых Твоих, яко Един всеблагий и милосердый.

Покой, Господи, душу усопшия рабы Твоея.

Несть никтоже, Милосерде, иже не согреши в человецех, токмо Ты един, Иисусе Христе, вземляй грехи всего мира. Темже, очистив рабу Твою от прегрешений, вчини во святых Твоих дворех, Ты бо живота еси и покой, и свет, и веселие всех, Тебе благоугодивших.

Слава: Удивися все естество человеческое, како безначальнаго Отца Сын сый единородный, плоть от Девы действом Святаго Духа приял еси, и пострадал еси яко человек, да умершия оживиши. Тем и преставленную ныне от нас, прилежно молим Тя, во стране живых, яко Благ, всели.

И ныне: Невесту Тя нарицаем, Пречистая, Отца невидимаго, и Матерь Сына, из Тебе Духом Святым воплощеннаго, и молебницу Тя о усопшей рабе Твоей, (имярек), предлагаем: Тебе бо помощницу имамы, земнии, и любовию поюще Тя величаем.

Достойно есть яко воистинну блажити Тя, Богородицу, присноблаженную и пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу, Тя величаем (поклон).
 

Святый Боже, Святый крепкий, Святый безсмертный, помилуй нас (трижды).

Слава Отцу и Сыну и Святому Духу, и ныне и присно и во веки веков. Аминь.

Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.

Господи, помилуй (трижды).

Слава Отцу и Сыну и Святому Духу, и ныне и присно и во веки веков. Аминь.

Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.

Господи Иисусе Христе, Сыне Божий, помилуй нас. Аминь.

Со духи праведных скончавшихся душу рабы Твоея, Спасе, упокой, сохраняя ю во блаженней жизни, яже у Тебе, Человеколюбче.

В покоищи Твоем, Господи, идеже вси святии Твои упокоеваются, упокой и душу рабы Твоея, яко един еси человеколюбец.

Слава: Ты еси Бог, сошедый во ад и узы окованных разрешивый, Сам и душу рабы Твоея упокой.

И ныне: Едина чистая и непорочная Дево, Бога без семене рождшая, моли спастися души ея.

Господи, помилуй (40 раз).

Помяни, Господи Боже наш, в вере и надежди живота вечнаго усопшую рабу Твою, (имярек), и яко благ и человеколюбец, отпущаяй грехи и потребляяй неправды, ослаби, остави и прости вся вольная ея согрешения и невольная, возставляя ю во святое второе пришествие Твое в причастие вечных Твоих благ, ихже ради в Тя Единаго верова, истиннаго Бога и Человеколюбца. Яко Ты еси воскресение и живот, и покой рабе Твоей, (имярек), Христе Боже наш. И Тебе славу возсылаем, со безначальным Твоим Отцем и с Пресвятым Духом, ныне и присно и во веки веков, аминь.

Честнейшую Херувим и Славнейшую без сравнения Серафим, без истления Бога Слова рождшую, сущую Богородицу (поклон).

Слава Отцу и Сыну и Святому Духу (поклон), и ныне и присно и во веки веков. Аминь (поклон).

Господи, помилуй (трижды).

Господи, благослови (поклон).

Господи Иисусе Христе, Сыне Божий, молитвами Пречистыя Твоея Матере, преподобных и богоносных отец наших и всех святых помилуй и упокой душу рабы Твоея, (имярек), в безконечныя веки, яко благ и человеколюбец, аминь,

Рабе Божии, (имярек), усопшей вечная память, вечная память, вечная память.

И читаем трижды тропарь с поклонами:

Покой, Господи, душу усопшия рабы Твоея, (имярек) (поклон), и елико в житии сем яко человек согреши, Ты же, яко человеколюбец Бог, прости ю и помилуй (поклон), вечныя муки избави (поклон), Небесному Царствию причастницу учини (поклон) и душам нашим полезная сотвори (поклон).

скачать канон