Канон об усопших — Глас второй

Ирмос: Непроходимое волнящееся море Божиим Своим велением изсушившему и пешешествовати сквозе е израильтеския люди наставльшему, Господеви поим, славно бо прославися.

Припев: Дивен Бог во святых Своих, Бог Израилев (поклон).

Смертию Твоею поправ смерть, Божественныя жизни источил еси присносущие, еже подаждь, Блаже, душам усопших, мученик Твоих мольбами, оставление прегрешений даруя.

Покой, Господи, души усопших раб Твоих (поклон) .

Иже богатую милость присно источая, благочестно присно приемлющим Тя, в дому Твоем, Христе, в дивной Твоей скинии, место ослабления подаждь, Владыко, рабом Твоим, яко благоутробен.

Слава: Крепчайший на смерть был еси, Христе: темже ту связав, нас избавил еси, и ныне избави от сея тления усопшия, яко Благ, и Твоего сияния причастие даруй.

И ныне: Утверждши колеблемый ум мой, Мати Божия, укрепи Божественными повеленьми, Рождшагося из Твоего освященнаго чрева и упразднившаго, Владычице, адово мрачное царство.

Ирмос: На камени мя веры утвердив, разширил еси уста моя на враги моя, возвесели бо ся дух мой, внегда пети: несть свят, якоже Бог наш, и несть праведен, паче Тебе, Господи.

Дивен Бог во святых Своих, Бог Израилев.

Твоея красоты сиянием озаритися в вере усопшим благоволи с мученики Твоими, Иже богатый в милости, Ты бо еси Бог наш, и несть праведен паче Тебе, Господи.

Покой, Господи, души усопших раб Твоих.

На месте прохлаждения, в недрех Авраамовых, избраннаго Твоего, сподоби водворятися рабом Твоим, яко щедр, Тебе вопиющим: Ты бо еси Бог наш, и несть праведен паче Тебе, Господи.

Слава: В чертозех небесных водворятися с мудрыми девами совшедшими, Владыко, приими рабы Твоя свещеносцы, ихже преставил еси Твоею волею от временных, Едине Человеколюбче.

И ныне: Умерщвлена мя и к земли возвращена воздвигнула еси, рождши Жизнодавца, и возвела еси мя из ада преисподнейшаго, Богородицу Тя верою славящаго, и почитающаго, Пречистая, Тебе, всепетую.

Господи, помилуй (трижды).

Воистинну суета всяческая, житие же сень и соние, ибо всуе мятется всяк земнородный, якоже рече Писание: егда мир приобрящем, тогда во гроб вселимся, идеже вкупе царие и нищии. Темже, Христе Боже, преставльшихся упокой, яко человеколюбец.

Слава и ныне, Богородичен: Всесвятая Богородице, во время живота моего не остави мене, человеческому предстательству не ввери мя, но Сама заступи и помилуй мя.

Ирмос: Пою Тя, слухом бо, Господи, услышах и ужасохся: до мене бо идеши, мене ища, заблуждшаго. Тем многое Твое снизхождение, еже на мя, прославляю, Многомилостиве.

Дивен Бог во святых Своих, Бог Израилев.

Упованием и любовию пожившия, и умом православным, яже паче ума славы Твоея сподоби рабы Твоя, Христе, многим Твоим человеколюбием и избранных мученик мольбами.

Покой, Господи, души усопших раб Твоих.

Яко имый сладости приснотекущий поток, присно напаяеши избранныя, Господи: с нимиже и ныне преставленныя, Христе, к Тебе, неизреченным Твоим милосердием питаеши при водах оставления.

Слава: Ты живыми господствуеши, Владыко, и мертвыми владееши. Ты в земли персть сущую силою Твоею воскресиши. Темже к Тебе прешедшия во дворех Твоих, Спасе, всели.

И ныне: Исцелила еси Евино сокрушение , и древнее окаянство , Зиждителя бо родила еси, могущаго исправити нас, прегрешеньми поверженных, Богородительнице едина Мати Дева.

Ирмос: Света подателю и веков Творче, Господи, во свете Твоих повелений настави нас: разве бо Тебе, иного бога не знаем.

Дивен Бог во святых Своих, Бог Израилев.

Умерщвленных нас, и положенных во тли, возвел еси от мрачных адовых сокровищ , и восхитил еси, Блаже, и сочетав святых Ангел воинством.

Покой, Господи, души усопших раб Твоих.

За еже спасти нас яко пришел еси, Христе, приими ныне иже благочестно к Тебе преставленныя, яко един благ, на лонех Авраама, и с Лазарем тех всели.

Слава: Разрешил еси, Владыко, летную мою и долгую брань, Тебе прежде ходатаю и молитвеннику примирения бывшу; и ныне Твоя рабы, ущедрив, упокой.

И ныне: Под кровом Твоим, Мати Божия, иже надеющиеся на Тя спасаются: Жизнодавца бо родила еси нам, животворящаго вся волею.

Ирмос: В бездне греховной валяяся, неизследную милосердия Твоего призываю бездну: от тли, Боже, мя возведи.

Дивен Бог во святых Своих, Бог Израилев.

Неизреченныя и Божественныя светлости, идеже мученичестии лицы, сподоби яже от земли преставил еси, вседетельную Твоею волею, Человеколюбче.

Покой, Господи, души усопших раб Твоих.

Иже создавый, Жизнодавче Христе, человека от земли, ихже от нас преставил еси, упокой, оставление подая им злых, яко милосерд и человеколюбец.

Слава: Озаритися добротою славы Твоея сподоби, оставльшия житие, и к свету Твоему неизреченному, Владыко, прешедшия упокой.

И ныне: Избавляющи усердно явися призывающия Тя, Пресвятая Владычице, яже Бога рождшая, животом и смертию обладающа.

Господи, помилуй (трижды). Слава и ныне.

Со святыми упокой, Христе, души раб Твоих, идеже несть болезнь, ни печаль, ни воздыхание, но жизнь бесконечная.

Сам един еси Безсмертный, сотворивый и создавый человека; земнии убо от земли создахомся и в землю туюжде пойдем, якоже повелел еси создавый мя и рекий ми: яко земля еси и в землю отыдеши, аможе вси человецы пойдем, надгробное рыдание творяще песнь: аллилуия, аллилуия, аллилуия.

Ирмос: Богопротивное веление беззаконнующаго мучителя высок пламень вознесло есть. Христос же простре богочестивым отроком росу духовную, Сый благословен и препрославлен.

Дивен Бог во святых Своих, Бог Израилев.

Иже везде сый, низшел еси, Господи, еже спасти иже древле прельщаемый человечь род . Темже Тя мученицы молят: сих, яже преставил еси от земли, в земли кротких, Спасе, упокой.

Покой, Господи, души усопших раб Твоих.

Мертвости умерщвление отрясл еси, в мертвых свободь быв, Сам един, Христе; и ныне умерщвления греховнаго, Владыко, избави рабы Твоя, являя их наследники Царствия Твоего.

Слава: Многим Твоим и неизреченным милосердием и неизмерною бездною человеколюбия Твоего, Христе, прегрешений убо оставление преставленным даждь, и благодатию Твоею очищенны сих яви.

И ныне: Светильник яко была еси Божественныя славы, сияние носящи, Дево, духом, и плотию нам явльшагося, и адову мглу светлостию Божества Своего потребльша, Богорадованная.

Ирмос: Пещь иногда огненная в Вавилоне действа разделяще, Божиим велением халдеи опаляющая, верныя же орошающая, поющия: благословите, вся дела Господня, Господа.

Дивен Бог во святых Своих, Бог Израилев.

Показал еси нам врагов смерть схождением Твоим, яко безсмертен; Божественною же силою Твоею входы явил еси живота, Безсмертне, егоже мученицы Твои ныне достойно получиша.

Покой, Господи, души усопших раб Твоих.

Доброты умныя Твоея насладитися преставленным сподоби, студ греха злообразнаго очищая, яко человеколюбец: един бо Ты, Владыко, явился еси греха отчужден.

Слава: Исправил еси нас, Христе, падшия в персть смертную, смертию Твоею живот даруя, и пищу безконечную, и радость присносущную, еяже ныне преставленныя сподоби, яко милостив.

И ныне: Велия и страшна есть тайна, Богомати, Твоего рождества: Бога бо родила еси, Егоже смерть не претерпе и гроб не растли: темже Тя, Пречистая, вси языцы славим.

Ирмос: Яже прежде солнца светильника Бога возсиявшаго, плотски к нам пришедшего из боку Девичу, неизреченно воплотившая, Благословенная Всечистая, Тя, Богородице, величаем.

Дивен Бог во святых Своих, Бог Израилев.

Имеяй власть живыми и мертвыми, живота Начальниче, от земли к Тебе прешедшим, наследие небесное подаждь, Владыко, и светлость святых и преславных страстотерпцев Твоих.

Покой, Господи, души усопших раб Твоих.

Слово сый, Еже древле быти ми подая живоначальнейшее и еже добре быти паки даруя, в недрех желанных Авраама праотца, преставльшияся рабы Твоя, яко милостив, всели.

Слава: Весь еси, Спасе мой, сладость световиднейшая, весь еси желание ненасыщаемое, потоки Твоея пищи и водою оставления усопшия напой, непрестанно Тебе славящия.

И ныне: Тя, Богородице, достойно вернии ныне ублажаем, Богодохновенным словесем Твоим последующе, Ты бо едина земным Бога родила еси, смерти разоршаго силу, Мати Дево.

Достойно есть яко воистинну блажити Тя, Богородицу, присноблаженную и пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу, Тя величаем (поклон).

скачать канон