Пред иконой Пресвятой Богородицы Знамение Курская Коренная
Яко необоримую стену и источник чудес стяжавше Тя раби Твои, Богородице пречистая, сопротивных ополчения низлагаем. Темже молим Тя: мир граду Твоему даруй и душам нашим велию милость.
Честнаго образа Твоего знамение празднующе людие Твои, Богородительнице, имже дивную победу на сопротивныя граду Твоему даровала еси. Темже Тебе верою взываем: радуйся, Дево, христиан похвало.
Достойно есть блажити Тя, Богородице Дево, честнейшую Херувим и славнейшую без сравнения Серафим.
Величаем Тя, Пресвятая Дево, и чтим образ Твой честный, имже показала еси преславное знамение.
Царице наша Преблагая, надеждо наша, Богородице, Приятелище сирых и странных Предстательнице, скорбящих Радосте, обидимых Покровительнице, зриши нашу беду, зриши нашу скорбь; помози нам, яко немощным, окорми нас, яко странных, обиду нашу веси, разреши ту, яко волиши, избави отечество наше, страждущую землю Российскую, от лютаго безбожников обстояния, спаси и сохрани рабы Твоя
О Царица Небесная! Кто изочтет великое множество чудес Твоих, кто исчислит вопли молитвенных прошений, токи умиленных слез, благодарных воздыханий, пролитых пред иконою Твоею.
Овеяна убо вся она скорбию народной, плачем угнетенных и радостною хвалою утешенных.
Припадаху к ней людие, понесшие агарянское иго, плакаху Москва в смутное время, взываше Курск в нашествие вражеское. Вопияше вся область во дни смертоносных болезней и бед, и вся скорби на радость прелагала еси. Темже и ныне благослови землю Русскую. Спаси от греха, погибели и соблазнов страну нашу. Излей благодать на труд земледельческий и на всякое благое начинание общественное.
Помяни, Пресвятая Дево, по имени всех предстоящих и молящихся и вся люди, требующая Твоего утешения, помощи и милосердия. Ты убо веси тайная сердец наших. Темже всем по потребе их прошения исполни. Изрядне же заблудших обрати к покаянию, нас же всех умудри светом Евангельския любви и добрых дел.
Архипастыри и пастыри и вся верныя в православии до смерти тверды покажи, в царство небесное управи и со Христом жити сотвори во веки веков. Аминь.