Молитвы преподобному Адриану, игумену Пошехонскому
Аще и смертию нуждною умерл еси, аще и смертная сень внезапу найде на тя, обаче, яко деву мудрую душу твою обрете Христос и в чертог Свой Небесный введе, и со святыми всели, чудесы возвеличив имя твое, Адриане мучениче преподобне, Емуже молитву о нас сотвори, память твою почитающих.
Христову мученику тезоименитый, многа труды, преподобне, подъял еси терпением твоим, и убиением от окрестных нуждную смерть претерпел еси, и ныне, о преподобный мучениче отче Адриане, моли душевныя и телесныя наша страсти обязати, иже верою и любовию почитающих обретение честных мощей твоих и всечестную память твою.
Христову мученику тезоименит быв, преподобне, многая труды подъял еси в жизни временней, обитель иноческую созидая в пустыни, идеже от злых разбойников даже до крове пострадал еси и мученическую смерть от них приял еси, Адриане славне. Чудес благодатию обогатився, днесь предстоиши всех Царю, Христу Богу, Егоже моли спастися душам нашим.
Христа ради, доблественне, претерпел еси и венец от Него восприял еси страдания твоего, приходящим же к тебе с верою от честнаго гроба подаеши цельбы, о преподобне мучениче Адриане приснопамятне, молитвенниче о душах наших.
Житейския молвы избежав, преподобне, в пустыню вселился еси, и, тамо обитель иноков возградив, последи от разбойник мученически пострадал еси, и ныне сияеши нетлением и чудесы, Адриане многострадальне, молитвенниче о душах наших.
Ублажаем тя, преподобномучениче Адриане, и чтим святую память твою, наставниче монахов и собеседниче ангелов.
О священная и многострадальная главо, земный ангеле и небесный человече, преподобномучениче и чудотворче Адриане! Припадаем к тебе с верою и любовию и молим ти ся прилежно, яви нам смиренным и грешным святое твое заступление: се бо грех ради наших не имамы свободы чад Божиих, просити о потребах наших Господа и Владыку нашего, но тебе молитвенника благоприятнаго к нему предлагаем и просим тя со усердием многим: испроси нам у благости его благопотребныя дары душам и телесем нашим: веру праву, надежду спасения несомненну, любовь ко всем нелицемерну, во искушениих мужество, в злостраданиих терпиние, в молитвах постоянство, душ и телес здравие, земли плодоносие, воздуха благорастворение, житейских потреб довольство, мирное и безмятежное житие, благую христианскую кончину, и добрый ответ на страшнем суде Христове. Не забуди, святче Божий, и обитель твою святую, тобою созданную и присно тя чтущую, но соблюди ю и всех живущих и подвизающих в ней и на поклонение в ню приходящих невредимыми от искушений диавольских и всякого зла. Ей, преподобномучениче святый! не лиши нас помощи твоея небесныя, но молитвами твоими всех нас приведи в пристанище спасения, и наследники яви нас быти всесветлаго царствия Христова, да поем и славим неизреченныя щедроты Человеколюбца Бога Отца и Сына и Святого Духа, и твое святое заступление во веки веков. Аминь.
Преподобне отче преблаженне Адриане, первейший пустыни сея просветителю и монашескаго жития основателю, пришедый в ню со ангелом Господним, и осветивый ю пресвятыя Богородицы чудотворною иконою и благодатию, в нейже и явился еси подвиги твоими пресветлое целомудрия зерцало, прекрасный смиренномудрия образе, одушевленный терпения столпе, известное воздержания правило, истинный нестяжания и нищеты любителю и всесовершенный Христов угодниче, се мы грешнии, смиренно припадая, молим тя. Приими моления наша и вознеси я на жертвенник благоутробия Божия. Испроси нам предстательством твоим у всемилостиваго Бога нашего: мир миру, церкви святей утверждение, согласие в вере, преуспеяние во благочестии и добродетелех христианских, да достойны явимся щедрот и милостей благосердаго Бога: паству твою духовную, и обитель твою святую, непрестанно управляти жезлом мудрости духовныя: подвизающимся помози, разслабленныя укрепи, падающия возстави, споспеши всем нам иго Христово в терпении и благодушии понести, и всех нас управи в мире и покаянии скончати живот наш и со упованием спасения преселится в блаженныя недра Авраамова, идеже ты радостно по трудех земных опочиваеши, прославляя со всеми святыми Триипостаснаго Бога, Отца и Сына, и Святаго Духа в безконечныя веки веков. Аминь.
О великий угодниче Божий преподобномучениче и чудотворче Адриане, призри на нас грешных, к честней раце святых и многоцелебных мощей твоих припадающих и просящих твоего заступления и помощи, скорбь нас одержит и не имамы помощи и утешения в мире семь скоротечном, но к тебе прибегаем, многострадальный угодниче Божий, яко сострадати нам могущему и велие дерзновение стяжавшему ко Христу Богу, к Немуже многомощен предстатель еси о всех с верою к тебе прибегающих и твоего заступления и помощи просящих. Моли убо человеколюбца Господа яко да простив нам безчисленная наша прегрешения, не отвратит милость свою от нас, но, яко благ и милосерд, явит нам безконечное свое человеколюбие и в бедах и напастех всесильную свою помощь нам подаст. Ей угодниче Божий, воздвигни преподобныя руце твои и моли Христа Бога, емуже верно послужил еси, да не отринет моления нашего недостойнства, но явит нам благовременне помощь и милость свою, да славим его щедроты и твое святое предстательство ныне, и присно, и во веки веков. Аминь.