Молитвы преподобному Феодосию, игумену Печерскому
Возвысився на добродетель, измлада возлюбив монашеское житие, к желанию доблественне достиг, вселился еси в пещеру, и украсив житие твое пощением и светлостию, в молитвах яко безплотен пребывал еси, в Российстей земли яко светлое светило просияв, отче Феодосие: моли Христа Бога, спастися душам нашим.
Православия наставниче, благочестия учителю и чистоты, вселенныя светильниче, архиереев Богодухновенное удобрение, Феодосие премудре, ученьми твоими вся просветил еси, цевнице духовная; моли Христа Бога спастися душам нашим.
Наследник отцев быв, преподобне, тех последуя житию и учению, нраву и воздержанию, молитве же и предстоянию. Тем, яко имея дерзновение ко Господу, прощение прегрешений и спасение испроси вопиющим ти: радуйся, отче Феодосие.
Звезду Российскую днесь почтим, от востока возсиявшую, и на запад пришедшую, всю бо страну сию чудесы и добротою обогатившую, и вся ны содеянием и благодатию монашескаго устава, блаженнаго Феодосия.
Ублажаем тя, преподобне отче Феодосие, и чтим святую память твою, наставниче монахов и собеседниче ангелов.
О священная главо, Ангеле земный и человече небесный, преподобне и богоносне отче наш Феодосие, изрядный слуго Пресвятыя Богородицы, во имя Ея святое обитель пречудну на горах Печерских соорудивый, и в ней чудес множеством просиявый! Молим тя со усердием миогим: молися за нас ко Господу Богу, и испроси нам от него великия и богатыя милости: веру праву, надежду спасения несомненну, любовь ко всем нелицемерну, благочестие непоколебимое, душ и телес здравие, житейских потреб довольство, и да не во зло обратим благая, даруемая нам шедродательныя Его десницы, но в славу имени Его святаго, и во спасение наше. Соблюди, преподобне чудотворче, Отечествие твое земное, страну православно-русскую, все грады и веси ея, град твой, и Лавру твою невредимыми от всякаго зла, и вся люди притекающия на поклонение честному твоему гробу, и пребывающия во святей обители твоей, осени небесным твоим благословением, и от всяких зол и бед милостиво избави. Наипаче же в час кончины нашея покажи нам многомощное твое покровительство: да избавимся, молитвами твоими ко Господу, власти лютаго миродержца, и сподобимся наследити Царство Небесное. Яви нам, отче, благосердие твое, и не остави нас сирых и безпомощных; да выну славословим Дивнаго со святых Своих Бога, Отца, и Сына, и Святаго Духа, и твое святое заступление, во веки веков. Аминь.
О священная главо, святителю Феодосие! Услыши нас призывающих тя и припадающих ко святей иконе твоей. Поминай нас, раб Божиих (имена), у престола Вседержителева и не престай моляся о нас ко Христу Богу: тебе бо дадеся благодать молитися за ны. Испроси предстательством твоим у Всемилостиваго Бога нашего нам здравие душевное и телесное, тихое и богоугодное житие, благую христианскую кончину и добрый ответ на Страшнем суде Христове и Царствия Небеснаго наследники быти покажи, да прославим имя Отца и Сына и Святаго Духа, во веки веков.