Молитвы преподобному Галактиону Вологодскому
Днесь град Вологда тобою всемирне хвалится, возсиял бо еси пресветло яко солнце и чудесы твоими град и веси, преподобне Галактионе, озарил еси. И ныне молися Господеви избавитися душам нашим от прелести вражия и спастися граду нашему от поганскаго и всех противных наития, и испроси у Христа Бога любовию чтущим тя прегрешений прощения и просящим твоея помощи от всякия скорби избавление, и вопиющим к тебе: Бог наш с нами, прославивый угодника Своего, якоже благоволи.
Днесь град наш тобою хвалится, преподобне, возсиял бо еси пресветло яко солнце, озаряя чудесы твоими грады и веси; и ныне, преподобномучениче Галактионе, молися Господеви избавитися граду нашему от нахождения сопротивных, и испроси у Христа Бога прегрешений оставление и от всякия скорби избавление любовию чтущих тя и вопиющих верно: Бог наш с нами, прославивый угодника Своего, якоже благоволи.
Благочестно на земли пожив и мучения венец приял еси, пречестне, древом во главу от нашедших градоразорителев убиен еси, добрый ученик Спаса Христа, оставив отечественный свой град и други странствовати любве ради Христовы евангельски изволил еси. Сего ради тя почитаем, песньми вопиюще: от бед избави нас присно молитвами твоими, угодниче Божий Галактионе, отче наш.
О, преподобне и Богоблаженне отче наш Галактионе, крепкое страны нашея ограждение, христиан православных поборниче и теплый за нас грешных ко Всемилостивому Богу нашему Иисусу Христу и Пречистей Матери Его, Владычице нашей Богородице и Приснодеве Марии молитвенниче! Умиленно молимся тебе, преподобне, не забуди нас грешных и недостойных рабов Твоих, но яко заступник и ходатай усердный, призри милостивно на немощь нашу и испроси молитвами твоими у Христа Бога нашего, да освятит благодатию Своею души и телеса наша, ум наш просветит светом благоразумия, совесть нашу очистит от мертвых дел, от греховных помышлений и губительнаго уныния, и дарует нам искреннее покаяние, сердцу сокрушение, слезы и умиление, воздержание и трезвость, смиренномудрие и кротость, чистоту душевную и телесную, нищелюбие и страннолюбие друг ко другу нелицемерную любовь. О, всеблаженне отче Галактионе, сподоби нас шествовати путем спасения, да твоими молитвами Преблагий Христос Бог наш покажет на нас грешных благодать и милость Свою, и от всяческих зол и будущаго мучения нас свободит, и сподобит наследником быти Царствия Своего Небеснаго, славящих и величающих Его купно со Безначальным Его Отцем, и Пресвятым и Благим и Животворящим Его Духом, ныне и присно и во веки веков. Аминь.
Преподобне отче наш Галактионе, светильниче страны нашей, подвигоположников удобрение, Вологды града заступниче теплый и неусыпный, за ны грешныя ко Всемилостивому Богу нашему Иисусу Христу и ко Святей Пречистей Матери Его, Владычице нашей Богородице, Приснодеве Марии молитвенниче, молим твою честную святыню мы, недостойнии рабы твои, зря на святочудотворный образ твой духовными взоры, не забуди нас, сирых, но яко отец чадолюбивый посети духом душ наших немощь и испроси молитвами твоими у Христа Бога нашего, да освятит души наши и ум наш просветит, и вразумит, и совести наша от всякия скверны очистит, и от нечистых помышлений, и вредных разумений, и губительнаго уныния, избавит нас от бесовских наветов, и дневных и нощных озлоблений, и дарует нам искреннее покаяние, сердцу сокрушение, слезы и умиление, воздержание и трезвость, смиренномудрие и кротость, чистоту душевную и телесную, нищелюбие же и страннолюбие, и друг ко другу нелицемерную любовь, и милосердие, и всякое благоволение. О, всеблаженне отче наш Галактионе, сподоби ны последовати по силе пути спасенному, яко да твоими молитвами Преблагий Христос, Бог наш, покажет нам, грешным, благодать и милость Свою, и всяких зол и будущаго мучения нас свободит, и сподобит наследником быти Царствия Своего Небеснаго, славящих Его и величающих купно со Безначальным Его Отцем и Пресвятым и Благим и Животворящим Его Духом, ныне и присно и во веки веков. Аминь.