Молитвы преподобному Лаврентию Черниговскому
От юности Христа возлюбил еси, и Тому тесным путем последуя, сосуд избран Духа Святаго быв, дар чудотворения и прозрения восприим: сего ради в невечернем свете Пресвятыя Троицы присно радуяся, поминай чад твоих, Лаврентие преподобне, отче наш.
Днесь светло красуется град Чернигов, и торжествует обитель Пресвятыя Троицы, в ней бо молитвою и постом пребывая, иночествующим и верным людям велий наставниче и скорый помощниче, и избранник пречудный Царицы Небесныя явился еси, яко звезда лучезарная в стране Российстей, преподобне отче наш Лаврентие, моли Человеколюбца Бога спасти души наша.
Мир оставив, чистоту ангельскую стяжав и мирови любовию послужив, отче наш Лаврентие, помощь благодатную с верою приходящим обильно являя: темже и в премирная селения достойно вселився, телом нетленным с нами пребываеши, утверждая нас в православной вере отцев наших, душею светозарною Подателю мира молишися даровати нам мир и велию милость.
Возсиял еси, яко светильник лучезарный услыша глас Царицы Небесныя, и последовав невозвратно зову Ея. Пришел в обитель Пресвятыя Троицы, идеже Владычицы Богородицы чудотворная икона, целомудренно собрав стадо словесных овец. Не забуди и нас, последовавших ти, и да избавит Господь геенны вечныя, совершающих святую память твою, преподобне отче наш Лаврентие.
О всехвальный отче Лаврентие, приими сие малое моление, от нас грешных тебе приносимое, и призри милостивно с высот небесных на нас, просящих твоего ходатайства у Престола Пресвятыя Троицы, да подаст твоими молитвами мир и благоденствие стране нашей, пастырем силу в молитве, иноком подкрепление на пути совершенства в подвизех смирения и послушания, вдовицам и сиротам заступление, немощным подкрепление, недугующим духом и душею от бесов избавление, больным исцеление, путешествующим Ангела Хранителя. Всем чтущим с любовию память твою, веру искреннюю и непоколебимую. И по преставлении в жизнь вечную приведи нас ко Христу твоими молитвами, да с тобою прославляем Святую Троицу: Отца и Сына и Святаго Духа, всегда, ныне и присно, и во веки веков. Аминь.
О преподобне и богоблаженне, пречестная священная главо, отче наш Лаврентие, богомудре наставниче и преславный чудотворче, молитвою, верою и любовию к Богу, в чистоте и надежде воскресения, еже на земли во обитель пресвятыя Троицы душу твою устроивый, ангельскаго общения и Царицы Небесныя посещения, беседы пророка Илии и праведнаго Еноха сподобивыйся. Припадающе раце святых и честных мощей твоих, любовию целуем и молим тя, освященне: проси Пресвятую Троицу Животворящую, Единаго Бога, Господа господствующих и Царя царствующих, проливая теплыя твоя прошения о богохранимей Святей Руси и о воскресении ея, святых церквей и честных обителей возобновлении и строении, благоверным крепкий и нерушимый мир, благочиние, просвещение умов и сердец, земли плодоносие и изобилие, болящим исцеление, печальным утешение, скорбящим радование, слепым прозрение, хромым хождение, глухим слышание. Услыши, святче Божий, молящихся тебе и призывающих в помощь скорое предстательство и милостивое заступление твое. Виждь ны грешныя, в толицех обстояниих сущих: виждь ны немощныя, отвсюду уловляемых, и всякаго блага лишенных, и умом от малодушия помраченных. Потщися, угодниче Божий, и не остави ны в греховнем плену пребывати, да не умрем в лукавых деяниих наших. Моли, богоносне, не убоятися нам злохитраго и богомерзскаго антихриста и богоотступных нечестивых слуг его вкупе со всею силою ада и не убоятися никоегоже зла: да подаст Христос Бог молитвами Пречистыя Приснодевы Марии мирное жительство, оставление грехов, и душам нашим спасение и велию милость. Посещай, чудотворче святый, святую обитель твою, сохрани и соблюди ю молитвами твоими во век века. Избави от душепагубных учений и безверия, от льстивых и наглых нападений видимых и невидимых врагов нашего спасения, от прелести бесовския и козней диавольских. Даруй, отче милостиве, пастырем святыню, пастве о спасении ревность, старцем крепость и благое напутствие в живот вечный, средним лучшим быти, юныя уцеломудри и послушанию со смирением научи, нам же всем плоды покаяния принести и вселитися в небесныя обители вечныя. Устраши, преподобне отче, вся враги востающия на правоверие, благочестие и чистоту, Едину Святую Соборную и Апостольскую Церковь и Святую Русь, да распространяется непрестанно и укрепляется Вера Православная, и да истребится богоненавистное заблуждение лжеименнаго ума, зловредное нечестие и вся ереси и расколы душепагубнии, да везде славится всесвятое имя Господа нашего Иисуса Христа, со Безначальным Его Отцем, и Пресвятым и Благим и Животворящим Его Духом, во веки веков. Аминь.