Молитвы преподобному Михаилу Клопскому
Иже на земли Христа ради волею в буйство преложився, мира сего красоты отнюд возненавидел еси и, плотская играния увядив постом и жаждею и на земли леганием, от зноя же и студени, от дождя и снега и от прочия воздушныя тягости никогда же уклонился еси, душу же очистил еси добродетельми, яко злато в горниле, отче преподобне Богоносне Михаиле, и ныне на Небесех предстоиши престолу Пресвятыя Троицы. Но яко имея дерзновение многое, моли Христа Бога спастися душам нашим.
Духа Святаго силою уподобился еси Богоглаголивым древним пророком, сказав безвестная и тайная и еже годе судьбам Божиим в сбытие, и ина многа чудеса о Христе сотворив, и люди удивив, торжествовати устроил еси вопиющия: слава Богу, прославляющему святыя Своя.
О преподобне и преблаженне отче наш Михаиле, ты, возжелав усердно шествовати во след Господа нашего Иисуса Христа, вся плотская мудрования отринул еси: ты отечество свое, род и временное благородство и земнаго царствия наследие оставив, монашества и юродства путь ко спасению и к наследию Царствия Небеснаго предызбрал еси; пришед же дйвне во обитель Пресвятыя Троицы, в ней трудолюбно и богоугодно подвизался, по премногу ко устроению ея споспешествовал еси и, от всех бед, от глада, вражияго нахождения, и огненнаго запаления, и всякаго зла оную сохраняя и защищая живущих в ней и к ней притекающих, пути Господню поучал еси; ты и ныне, Пресвятей Троице со всеми святыми предстоя и непрестанно насыщался зрения Божества Трисветлаго, поминай, молим тя, чтущих святую память твою, не премолчй, угодниче Христов, ко Господу моляся, да Он, благодатию Своею приосеняя притекающих к тебе и мощи твоя устами и сердцем лобызающих, здравы и невредимы сохранит и от всякия напасти свободит, подая путешествующим в пути благоспешество, болящим здравие, печальным утешение, сирым, вдовицам и всем напаствуемым скорое заступление и вспоможение и от вражиих наветов твердое ограждение и защищение. Не престай же моляся и о Богохранймей стране нашей, яко да, твоим предстательством и молитвами сохраняемы, вси возможем подвиг течения неблазненно совершити, славяще Святую Троицу, Отца и Сына и Святаго Духа, и твое заступление, ныне и присно и во веки веков. Аминь.