Молитвы преподобным Сергию и Герману Валаамским
Евангелия Христова истиннии послушницы явистеся, преподобнии, мир и вся, яже в нем, яко не сущая, преобидевше любве ради Христовы, и в морский остров вселистеся, и трудолюбно в нем противу козней невидимых врагов подвизастеся, постом, бдением же и всенощным стоянием/ плоти своя духу мудре повинули есте. Сего ради от Вседержительныя десницы достойныя венцы прияли есте, и ныне Пресвятей Троице предстояще, молитеся, всеблаженнии отцы Сергие и Германе, сохранитися в мире отечеству нашему и спастися душам нашим.
От мирскаго жития изшедше, отвержением мира Христу последовасте, и достигосте великаго Нева езера, и, в нем на острове Валааме всельшеся, равноангельное житие пожили есте, отонудуже веселящеся прешли есте к Небесным чертогом. И ныне со Ангелы Владычню Престолу предстояще, поминайте нас, чад своих, яже собрали есте, богомудрии, да радостно от души вопием: радуйтеся, Сергие и Германе, отцы преблаженнии.
О велиции отцы наши, христовы угодницы и теплии предстатели ко Спасу о душах наших, Сергие и Германе: вы бо в недузех целители явистеся, по морю плавающим кормчии, и утопающим благонадежное избавление, и от всякаго смертоноснаго нашествия хранители, паче же от духов нечистых свобождение и от всяких наветов, противу нас наводимых, защищение и помощь. О, преблаженнии отцы и чудотворцы преславнии, Сергие и Германе, молитеся ко Владыце Христу о нас грешных (имена): яко да вашими молитвами сподобимся в День Судный деснаго предстояния и наслаждения во Царствии Божии во веки веков. Аминь.
О преподобнии, Богоноснии, преблаженнии отцы наши Сергие и Германе, зрителие славы Божия в Небеснем Царствии! Не презрите нас грешных в нуждах и скорбех наших, но ускорите в помощь к вам прибегающим: приимите воздыхание и слезы, и вонмите смиренному молению нашему. Предстояще же Небесному Царю, о преблаженнии, молите благость Его, еже ущедрити место селения вашего и всякому граду и стране низпослати обилие благ земных: Благочестивейшей Великой Государыне нашей Великой княгине Марии Владимировне на враги победу и одоление даровати и Дом ЕЯ в мире и тишине сохранити: нас же всех в вере и добродетели утвердити, избавляти же присно от вожделений греховных и от нападения видимых и невидимых врагов: обидимыя защитити, болящия уврачевати, от томительства злых духов свободити, на мори плавающия сохраняти, путешествующим спутешествовати, и всякому верному в нуждах способствовати: яко Того вси есмы творение, и того есть Царство, и сила, и слава во веки веков. Аминь.
О преподобнии и Богоноснии отцы наши Сергие и Германе, земнии Ангели и небеснии человецы, молитвеницы теплии и ходатаи за мир непрестаннии, Валааму покрове и похвало и всем верным всегда готовое прибежище и заступление! С верою и любовию припадающе к раце честных мощей ваших, умиленно молим вас: не забудите чад своих, яже от молвы житейския в пустыни сей собрали есте: не отступите николиже от нас, но неусыпным предстательством вашим оградите нас от злых козней вражиих: утолите возстание страстей: укрепите немощь нашу в духовных бранех и подвизех, предлежащих нам: отжените всякое уныние и печаль греховную от сердец наших, и Небесное утешение низпослите нам во трудех и скорбех наших. Сохраните, о преподобнии, святую обитель вашу от всякаго оскудения, от огня и меча, от смертоносныя язвы и от всякаго обстояния. Молитеся, преблаженнии, усердно молим вас, за Благоверную Великую княгиню нашу, за весь Царственный Дом, за Христолюбивое воинство и за всю Державу Российскую: да сохранит их Господь в мире, здравии, во всех благих преспеянии: да дарует им на враги победу и во всякой добродетели да укрепит. Помяните в молитвах ваших, угодницы Божии, и окрестную страну сию Карельскую, иже светом Христовым просветили есте: да утвердится в ней Вера Православная, и да ничтоже успеют вси возстающие на малое стадо сие и от Церкве Святыя отторгнути е тщащиися. Услышите, милосерднии отцы наши, и всякаго человека, с верою приходящаго к вам и благодатныя помощи вашея требующаго: будите сирым и обидимым заступницы, скорбящим утешение, болящим цетители, изнемогающим укрепление, сущим в пути хранители, в мори плавающим управители и пристанище небурное. В страшный же час смертный предстаните всем нам, якоже блазии ходатаи и темных зраков демонских дерзновеннии прогонителие: да в мире и покаянии скончавше земное поприще наше, достигнем и вечных благ наслаждения, и купно с вами да воспоем и прославим Всесвятое Имя Отца и Сына и Святаго Духа ныне и присно и во веки веков. Аминь.