Молитвы святителям Феодору и Иоанну, епископам Ростовским и Суздальским
Яко апостолом единонравных учителей Суждальския страны, и целителей душ и телес премудрых, и служителей Богу благоприятных, к ракам честных мощей ваших притекающе, ублажаем вас, святителие Богоблаженнии, Феодоре и Иоанне, в песнех же и пениих, радующеся, славим Христа, даровавшаго вам благодать исцелений и граду нашему Суждалю великое в вас утверждение.
Яко апостолом единонравнии, и учителие Судальстей стране, и целителие душам и телесем предобрии, и служителие Божий благоприятный, к ракам честных мощей ваших притекающе, святителю великий Иоанне и Феодоре Богоблаженнии, сошедшеся днесь, любовию память вашу светло празднуем в песнех и пениих, радующеся и Христа славяще, Иже таковую благодать даровавшаго исцелений и граду Суждалю великое утверждение.
Яко добродетелей учители, молитвами вашими подаете чтущим вас любовию добродетелей исправление и соблазнов избавление.
Божественных и пречестных святителей Христовых и чудотворцев Иоанна и Феодора, вернии, поюще, да ублажим, яко днесь, в память их притекающе к ракам мощей их, молим многообразных нас обстояний избавити, да вопием вам: Радуйтеся, граду нашему и Церкви Христовей великое утверждение.
Величаем вас святителие велиции, и чтем святую память вашу: вы бо молите за нас Христа Бога нашего.
О велицыи угодницы Христови и чудотворцы, святителие Феодоре и Иоанне! Се мы недостойнии и грешнии скорбьми многими угнетаемии, к вам усердно прибегаем, и с упованием крепким молимся: отцы богомилостивии и благопослушливии, милостивно услышите ныне глас наш молебный, и потщитеся на помощь нашу, и яко при жизни вашей всем скорбящым и озлобленным помощницы и утешителие бысте, тако и ныне любовь вашу к нам явите, благодатным действом благоприятных молитв ваших, претворяюще скорбь нашу в радость, печаль же на утешение: вся бо можете о укрепляющем вас Христе, Егоже вернии служители бысте; от Негоже приявше вся обетования благая, низпошлите и нам великую и богатую милость Господню, да воспоем и прославим дивнаго во святых Своих Бога, Отца и Сына и Святаго Духа, ныне и присно и во веки веков. Аминь.