Молитвы святителю Герману, архиепископу Казанскому и Свияжскому

Молитвы святителю Герману, архиепископу Казанскому и Свияжскому
Тропарь святителю Герману, архиепископу Казанскому, глас 4-й

От юности иго Христово усердно восприим, бденными подвиги поста и молитвы, прославился еси. Отонудуже призывающу тя Богу на служение Церкви в новопросвещеннем царстве Казанстем, вкупе со святителем Гурием воззван был еси, идеже, яко первоначальник созданной тобою в граде Свияжске обители, и достойный первосвятителю преемник явился еси. Духом предстоя Престолу Владычню, молися, святителю Германе, со святителем Гурием, православней пастве во благочестии преспевати, и тьме иноверия светом веры разгнатися.

Ин тропарь святителю Герману, архиепископу Казанскому, глас 4-й

Яко великим пастырем единонравна и учителем вселенныя единомысленна, Церкве Божия служителя усердна и строителя таин Христовых благоговейна, стекшеся благовернни людие Свияжския обители богомудраго основателя и Казанския новопросвещенныя паствы святителя Германа песньми и пении восхвалим, глаголюще: не престай присещати молитвами твоими на всю паству твою, и в вере и благочестии блюди невредимо.

Кондак святителю Герману, архиепископу Казанскому, глас 4-й

Доблестями преподобия и правды врученное тебе словесное стадо озаряя, и на злачных Слова Христова пажитях питая, на правый путь заповедей Господних силою духа твоего наставлял еси е. Темже и ныне осеняемое цельбоносными чудотворении твоими, в святую память твою, зовем тебе: не престай, святителю, предстательствовати пред Пастыреначальником о стаде твоем, яко паствы твоея утверждение, и сущим по тебе святителем удобрение.

Ин кондак святителю Герману, архиепископу Казанскому, глас 4-й

Бодрствуя в молитвах, послушания добрый рачитель быв, в терпении стяжал еси душу твою, делы смиренномудрия и кротости изрядствуя, престол святительства благоверием и благочестием украсил еси, отче священноначальниче Германе, моли Христа Бога о всем стаде твоем, яко паствы твоей утверждение и сущим по тебе святителем светлое украшение.

Величание святителю Герману, архиепископу Казанскому

Величаем тя, святителю отче Германе, и чтим святую память твою, ты бо молиши за нас Христа Бога нашего.

Молитва первая святителю Герману, архиепископу Казанскому
об укреплении веры

О святителю Христов Германе, богомудрый обители сея основателю, духовный иночествующих вождю, примером Христоподражательной жизни твоея всех верных и в жизни и по кончине твоей наставляющий! К тебе прибегаем и тебе усердно молим: соделай святыми твоими молитвами, да и мы благодатию Божиею созиждемся во обитель Духа Святаго, последованием жизни твоей воображаемся во образ Христов, во образ преподобия и правды, и осеняемы силою благоприятных молитв твоих, приносим плоды благих дел, благоугождающе Господу, да тщимся ходити во свете лица Его, паче всего любити Его и исполняти святую волю Его, служити во благо ближних наших и всемерно соделовати спасение свое, на пути многопременчивой жизни, терпением всякой тесноты, скорбей, лишений. А дабы возмощи нам понести благое иго Христово, моли, святче Божий, о укреплении немощи нашей помощию свыше, да избавит нас Господь от враг видимых и невидимых, от огненнаго и воднаго потребления, от неблагорастворения воздуха и тлетворных ветр, а паче от душепагубнаго пламене, потопления и обуревания страстей наших, да, под кровом благости и милосердия Божия, тихое и безмолвное житие поживем, ждуще блаженаго явления Господа и Спаса нашего Иисуса Христа, Емуже со Отцем и Святым Его Духом честь и слава во веки веков. Аминь.

Молитва вторая святителю Герману, архиепископу Казанскому
о том же

О святителю Германе, великий угодниче Христов, обители сей богомудрый основателю, монашествующих наставниче и града сего недремлемый блюстителю, святою душею твоею на небеси престолу Святыя Троицы предстояй, нетленным же телом зде во обители твоей почиваяй и многоразличная чудеса молитвами совершаяй! Призри на ны и на вся люди, к цельбоносному твоему гробу притекающия и твоего ко Господу ходатайства во обдержащих нуждех просящия. Понеже мы, по множеству грехов наших, не точию недостойни принести со дерзновением молебный глас, но ниже возвести очес наших на небо; ты же, яко стяжавый дерзновение, принеси за всех, к честней раце твоей приходящих, теплыя молитвы ко Господу, еже избавитися нам от глада, потопа, труса, огня, меча, брани, от людей и диавола бывающия, и от всякия душевныя и телесныя болезни; да избавльшеся сих и работающе Господу, Емуже предстоиши, внидем в нескончаемый покой и вкупе с тобою прославим всех благих подателя Бога, всегда, ныне и присно и во веки веков. Аминь.

Молитва третья святителю Герману, архиепископу Казанскому
о даровании доброты и смирения

О великий угодниче Христов, Германе, теплый о нас ко Господу молитвенниче, всем притекающим к тебе во скорбех предстателю, испроси нам помощь в немощех, утешение в скорбех, здравие в недузех душевных и телесных; умоли Господа даровати нам оставление во всех, елика согрешихом от юности нашей в житии сем делом, словом, помышлением и всеми нашими чувствы, и при кончине нашей испроси нам время покаяния, да, предваривше искренним исповеданием грехов и очищением совести исход душ наших, безбедно прейдем воздушныя мытарства и избавимся осуждения и муки, милостию Безначальнаго Отца, благодатию собезначальнаго Сына и освящением присносущаго Духа. Аминь.

Молитва четвёртая святителю Герману, архиепископу Казанскому
об исцелении телесных и душевных недугов

О великий угодниче Христов, Германе! Испроси нам, рабам Божиим (имена), у Господа помощь в немощех, утешение в скорбех, здравие в недузех душевных и телесных: умоли Его даровати нам оставление всех, елика согрешихом от юности нашея в житии сем и при кончине нашей испроси нам время покаяния, да искренним исповеданием грехов сию предваривше, безбедно прейдем воздушныя мытарства, и избавимся от осуждения и муки, милостию Безначального Отца, благодатию Собезначального Сына и освящением Присносущнаго Духа, во веки веков.

Новые молитвы

Молитвы от коронавируса

Ознакомиться

Молитвы о самоубийцах

Ознакомиться

Молитвы за скончавшихся вне своего Отечества, за безродных и убогих

Ознакомиться

Молитвы за наставников и воспитателей

Ознакомиться

Молитвы за всякого усопшего

Ознакомиться