Молитвы святителю Софронию Иркутскому
От юности Христа возлюбил еси, блаженне Софроние, добре управил еси иноческия обители и, архиерейства саном почтен быв, упасл еси иркутскую паству, темже и по преставлении дарования чудес от Бога приял еси и молиши Христа Бога избавити нас от бед и спасти души наша.
Скорый в бедах и скорбех заступниче, отче иерарше страны Сибирския, святителю Софроние, на Небеси предстояй с первоиерархом Иркутския Церкве и всеми святыми, выну имаши благоволение Господа славы, призри на люди, притекающия к честным останкам святых мощей твоих, с верою и любовию слезно просящия твоея помощи и заступления, моли, Егоже проповедал еси людем Сибири, избавити я от находящих зол и наветов вражиих, просветити людей оляденевшая древле неверием сердца, даровати утверждение веры Христовы и спасти души наша.
Соименнаго мудрости иерарха, изрядное Церкве Иркутския украшение, отца нашего святителя Софрония любовию восхвалим, вси вернии, той бо есть хранитель града и страны сея и молитвенник о душах наших.
Пастырей Начальнику, Христу трудился еси, святителю Софроние, на пажити духовней северныя страны нашея, языцы монгольстии от прелести и скверны идольския избавляя, привел еси я к свету веры Христовой, и ныне, со Ангелы Владычню Престолу предстоя, моли непрестанно о всех нас, избавити ны от бед и спасти души наша.
Величаем тя, святителю отче Софроние, и чтим святую память твою, ты бо молиши за нас Христа Бога нашего.
Святителю Христов Софроние! Предстоя у престола Божия, призри с небесе на нас, грешных и недостойных раб Божиих (имена)! Возгрей сердца немощных людей и призови к покаянию и исправлению жизни греховныя. Утверди нас твоею благодатною помощию, предстательством твоим и молитвами приход сей от всякого зла и навета вражия огради, спаси и сохрани именем Господа Бога и Спаса нашего Иисуса Христа, Емуже славу приносим во веки. Аминь.
Святче Божий, святителю Христов, добрый пастырю словеснаго стада, человече Божий, новый чудотворче и неусыпный к Богу молитвенниче за страну сию, отче Софроние, призри с высоты Небесныя на нас, с верою и любовию покланяющихся образу твоему и честным останкам святых мощей, в наше утешение избывшим от всепоядающаго огня. Призри, святче Божий, и виждь наше нестроение и раздоры, нашу тугу, скорбь и сердечную болезнь, от лишения братския любве пребывающия. Испроси у Христа Бога коемуждо нам благодати смирения, познание своея греховности и самоукорения, да, внимающе кийждо своей совести, престанем осуждати ближняго, клеветати и поношати, но, соединившеся ко друг другу любовию, сподобимся мирно во смирении прочее время живота нашего пожити и улучити христианскую кончину. Да, совокупльшеся в будущей жизни со всеми святыми и с тобою, пастырю наш, прославим Единаго в Троице славимаго Бога, Отца и Сына и Святаго Духа во веки веков. Аминь.