Молитвы святой мученице царице Александре Римской
Царства земнаго славу презревши, Единаго Христа, нас ради распятаго, возлюбила еси и, Того мужественне исповедающи, венцем мученическим увенчалася еси, всеблаженная царице Александре. Темже и ныне Престолу Царя славы на Небесех предстоящи, молися о спасении душ наших.
О, священная жено, мужественнейшая исповеднице и преславная людей защитнице славная царице Александро! Милостиво призри на нас, подданных верных твоих, от земного жития сего, скверного, прелюбодейного и грешного, его преславно в житии твоем отреклася еси, малое сие моление тебе приносящих! Не возгнушайся греховных язв, а наипаче малодушия нас, грешных раб твоих, к падшему миру сему привлаченных! Умоли Господа нашего Иисуса Христа, просветити разум наш светом истины и любви Христовой и Тому Одному служити. Сподвигни на молитву о нас, недостойных и грешных, славного великомученика Георгия Победоносца, с нимже ты Царю всех предстоиши, и буди вкупе с ним славной защитницей нашей, да славной вашей помощью охраняемы, сподобимся избежати всех бед и напастей лукавого жития сего и тако, сетей его избежав, достигнути тихой гавани спасения нашего и вкупе с вами вовеки славити неизреченной милосердие Царя и Создателя нашего во веки веков. Аминь.
О святая мученице царице Александре, о возлюбившая Господа от всего сердца твоего, и от всея души твоея, и всею крепостию твоею и всем помышлением твоим! Вемы, яко младенца тя сущу страданием венча Христос матери ти умершей: помолися о чадех наших, матерей лишенных, матерьми оставленных, матерьми убиенных. Вемы, яко Жениха ради Небеснаго готова была еси отвергнути жениха царственнаго: помолися об отроковицах и отроцех наших, да не изберут скотскую пишу, ценою души купованную. Вемы, яко возненавидено была еси ближними от венца брачнаго: помолися о юных женах, в домы мужей входящих. Вемы, яко неугодны были суть чада твоя, дондеже наследник не родися: помолися о женах, в долгонедужии сущих. Вемы, яко чадо молитвы, чадо веры твоея, сын и наследник, неисцельно болен явился есть: помолися не быти оставленным и болящим младенцем страны твоея. О избранная крестонесице Христова чрез все житие твое, возлюбившая народ твой паче себе: возжелевшая паче умрети, неже оставити страну твою: разделившая мученический венец с помазанником Божиим: умоли Бога твоего, да не отступим от Него в час посещения нашего, да верны пребудем Христу кийждо на месте своем, да внидем в Царство, идеже ты солнечная луча еси Солнца Правды, Христа Бога нашего, в Троице Славимаго. Аминь.