Молитвы святой мученице Татиане Римской
Агнцу Пречистому и Пастырю последуя, агнице словесная Татиано, мысленных зверей не убоялася еси, но знамением крестным вооружившися, до конца тех низложила еси, и вошла еси в Небесную ограду, идеже помяни и нас, мученице Христова многомудрая.
Агнцу Пречистому и Пастырю последуя, агнице словесная Татиано, мысленных зверей не убоялася еси, но знамением крестным вооружившися, до конца тех низложила еси, и вошла еси в Небесную ограду, идеже помяни и нас, мученице Христова многомудрая.
Светло во страдании твоем возсияла еси, страстотерпице, от кровей твоих преиспещрена и, яко красная голубица, к Небеси возлетела еси, Татиано, темже моли присно за чтущия тя.
Величаем тя, святая мученице Татиано, и чтим честная страдания твоя, яже за Христа претерпела еси.
О, святая мученице Татиано, приими ныне нас, молящихся и припадающих к святой иконе твоей. Молися о нас, рабех Божиих (имена), да избавимся всяких скорбей и болезней душевных и телесных и благочестне поживем в настоящем житии, и в будущем веке сподоби нас со всеми святыми поклонятися в Троице славимому Богу, Отцу и Сыну и Святому Духу, ныне и присно и во веки веков. Аминь.
О, святая мученице Татиано, невесто Сладчайшего Жениха Твоего Христа! Агнице Агнца Божественнаго! Голубице целомудрия, благоуханное тело страданьми яко одеждами царскими одеявшая, к ликом небесным сопричтенная, ликующая ныне во славе вечной, от дней юности служительнице Церкви Божия, целомудрие соблюдшая и паче всех благ Господа возлюбившая! Тебе мы молимся и тебе мы просим: внемли прошениям нашим сердечным и не отвергай молений наших, даруй чистоту тела и души, вдохни любовь к Божественным истинам, на путь добродетельный введи нас, ангельское охранение испроси у Бога нам, наши раны и язвы уврачуй, юность огради, старость безболезненну и безбедну даруй, в смертнем часе помози, поминай наши скорби и отраду даруй, посети нас сущих в темнице греха, на покаяние настави скоро, возжи пламень молитвы, не остави нас сирых, да славяще страдания твоя, возсылаем хвалу Господу, ныне, и присно, и во веки веков. Аминь.