Молитвы святой праведной Гликерии, деве Новгородской
Вышния красоты желающе, нижний сласти телесныя далече от себе отринула еси, и нестяжание паче суетнаго мира возлюбивши, ангельское житие провождала еси, Гликерие, дева блаженная, моля Христа Бога спастися душам нашим.
Веселися, Великий Новград, великое сокровище стяжав, мощи твои, святая праведная дево Гликерие, благодать исцелений подающия всем с верою и любовию приходящим к ним. И ныне предстоя с ликом святых жен русских пред Престолом Святой Троицы, молися оставление грехов даровати чтущим святую память твою.
Величаем тя, святая праведная дево Гликерие, и чтим святую память твою, ты бо молиши за ны Христа Бога нашего.
О, святая праведная Гликерие, дево Новгородская, яко свеща теплая на свещнице горящая пожила еси во славу Христа Бога и многими чудесы прославленная! Не забуди нас, яко молитвенница наша пред Пречистой Матерью Господа нашего Иисуса Христа, сохрани юных во святей вере, целомудрии и чистоте, укроти вражду и злобу действом диавола воздвизаемую, подай мужество и крепость во искушениях. Благодать приемше исцелений, подай здравие сущим в болезнех, умоли Господа, да дарует мир граду твоему и отечеству нашему, да не оскудеет в земле нашей вера православная, испроси исправление греховнаго жития нашего и вечное спасение, да с тобою сподобимся прославляти в Троице славимаго Бога, Отца и Сына и Святаго Духа, во веки веков. Аминь.