Молитвы святой великомученице Ирине Македонской
Агница Твоя, Иисусе, Ирина зовет велиим гласом: Тебе, Женише мой, люблю, и, Тебе ищущи, страдальчествую, и сраспинаюся, и спогребаюся Крещению Твоему, и стражду Тебе ради, яко да царствую в Тебе, и умираю за Тя, да и живу с Тобою, но яко жертву непорочную приими мя, с любовию пожершуюся Тебе. Тоя молитвами, яко Милостив, спаси души наша.
Девства добротами преиспещренна, дево, страдальчеством была еси краснейшая, Ирино, кровьми твоими истекшими обагрена, прелесть же низложившая безбожия. Сего ради и прияла еси почести победы рукою Создателя твоего.
О, многострадальная и преславная Ирино, невесто Христова всехвальная, угоднице Божия! Ты предстоиши у Престола Пресвятыя Троицы и наслаждаешися неизреченнаго блаженства. Призри убо милостивно на нас, приносящих ти хвалебное пение сие, испроси нам милость, отпущение грехов у Преблагаго Господа, вемы бо, воистинну вемы, яко вся, елико восхощеши, испросити у Него можеши. Темже убо смиренно припадаем к тебе и просим: умилостиви Владыку неба и земли, да подаст нам дух твоея ревности ко хранению святых Его заповедей, яко да возможем земное поприще в добродетельном житии проводити, райских селений унаследовати и тамо с тобою и всеми святыми прославляти Отца и Сына и Святаго Духа во веки веков. Аминь.