Молитвы cвятому Петру, митрополиту Московскому
Яже прежде безплодная, земле, ныне веселися: се бо Христос светильника в тебе показа, яве сияюща в мире и исцелевающа недуги и болезни наша. Сего ради ликуй и веселися со дерзновением: святитель бо есть Вышняго сия соделоваяй.
Ликуй светло, благославнейший граде Москва, имеяй в себе архиерея Петра, яко зарю солнца, всю Россию чудодеянии озаряюща, той бо немощи врачует и недуги, яко тьму, прогонит от вопиющих ему: радуйся, иерарше Бога Вышняго, тобою сия пастве твоей соделовающаго.
Наста днесь всечестный праздник пренесения честных мощей твоих, святителю Петре, веселя изрядно твое стадо, и верное отечество, и люди, о нихже не оскудевай, моляся Христу Богу, еже от Него дарованней ти пастве сохранитися от враг ненаветованней и спастися душам нашим.
Благоверно пожив в мире, житием чистым просветився, учением святительства прият паству, апостолом наследниче. Тем прием дар чудес от Бога, отче Петре, моли Христа Бога, да спасет души наша.
Взбранному и дивному нашея земли чудотворцу, днесь любовию тебе притекаем, песнь, богоносе, плетуще, яко имея дерзновение ко Господу, многообразных избави нас обстояний, да зовем ти: радуйся, утверждение граду нашему.
Яко врача преизрядна и источника чудесем обильна, днесь сошедшеся любовию, духовная твоя чада, в пренесение честных мощей твоих, архиерею Петре, молим тя: моли Христа Бога даровати честным твоим пренесением верному воинству нашему на враги победительная, да твоими к Богу молитвами находящих зол избавльшеся, радостною душею и веселием сердца благодарная ти воспоем, глаголюще: радуйся, отче Петре, архиереев и всея Российския земли удобрение.
Явися днесь пресветлая память твоя, святителю преблаженне Петре, в мире светло сияющи и являющи всем Божественное сияние.
Величаем тя, святителю отче Петре, и чтим святую память твою, ты бо молиши за нас Христа Бога нашего.
О, великий святителю, преславный чудотворче, Российския Церкве первопрестольниче, града Москвы хранителю и о всех нас усердный молитвенниче, отче наш Петре! К тебе смиренно припадаем и молимся: простри руце твои ко Господу Богу и помолися за ны, грешныя и недостойныи рабы Его, да пробавит нам милость Свою и низпослет нам вся благопотребная к временному житию и вечному спасению нашему, дары благости Его, наипаче же да оградит нас миром, братолюбием, благочестием от всех искушений врага диавола и дарует нам быти верным чадом твоим, не по имени токмо, но и всем житием нашим. Молим тя, святителю Христов, сохрани предстательством твоим небесным град Москву и люди ея. Ей, угодниче Божий! Услыши нас благоутробно и буди всем нам помощник и заступник во всяких бедах и напастех, не забуди нас и в час кончины нашея, егда наипаче твоего заступления потребуем, да при помощи молитв твоих святых, сподобимся и мы, грешнии, кончину благую получити и Царство Небесное унаследити, славяще дивнаго во святых Своих Бога нашего, Отца, и Сына, и Святаго Духа. Аминь.