Молитвы всем преподобным отцам, на святой горе Афонстей просиявшим
Пустыни Афонския отцы,/ Ангелы во плоти,/ исповедники вкупе и преподобнии,/ святители же и мученики в пениих почтим,/ подражающе добродетелем их,/ зовуще согласно и глаголюще:/ слава Прославльшему вы,/ слава Венчавшему вы,/ слава в бедах предстатели нам вы Показавшему.
Онебесившия Гору сию,/ и показавшая в ней житие ангельское,/ и множество монахов собравшия отцы,/ приидите, благохвалим вси, к ним взывающе:/ всякия беды и искушения нас избавите,/ множество преподобных,/ Афонская похвало.
О блаженнии и святии отцы, преподобнии, святителие, священномученицы и преподобномученицы, мироточивии и чудотворцы, земнии Ангели и Небеснии человецы, сея Святыя Горы насельницы и украсителие, по Богородице наши предстателие пред Господем, благодетелие и назирателие, царское победоносное ополчение, в телесех победившее безтелесныя демоны, Царицы Небесныя Пречистыя Богородицы мироуханнии цвети, светлоплодовитая древеса мысленнаго сего рая Приснодевы, реки приснотекущия дарований духовных! Приимите похвальная словеса сия, яже вам приносим, якоже Господь прият вдовицы две лепте, и общее празднество, совершаемое нами в честь и память вашу, объимите, яко воню благоухания и жертву благоприятну: не имамы бо ино что принести по долгу благодетелем нашим за великая благодеяния, яже прияхом и имамы приити от вас. Ей, исповедуем, яко мы грех ради наших несмы достойни жити на месте сем и именоватися сынми вашими, но вы за благосердие ваше не отрицайтеся быти нам отцы. Не забывайте нас, смиренных, но соблюдайте священныя монастыри ваша и вся скиты и келлии и нас, живущих в них, сохраняйте и избавляйте от всякаго искушения и напасти в житии сем, в будущем же веце да сподобимся святыми вашими молитвами блаженства купно с вами, сынове со отцы своими, стадо с пастыри своими, ученицы со учители своими, и да услышим от вас оный блаженный глас ко Господу: се мы и дети, яже дал еси нам, Господи! И, радующеся, воздадим всякую славу, честь и поклонение Отцу и Сыну и Святому Духу во веки веков. Аминь.
О преподобнии и богоноснии Отцы наши Афонстии, светила земная пресветлая, от пустынных удолий святыя горы Афонския, в церкви православней славно просиявшии, и святую гору вселения вашего жития добротами онебесившии, всю же вселенную высоких добродетелей светлостьми и чудес божественных блистаний удивившии. Ныне смертным западом вы плотски на время во гроб зашедше, душами вашими со Xристом - Солнцем правды, суще праведницы, просвещаетеся, яко солнце, во царствии небеснем; идеже молитвенная ваша, к Богу свету истинному, лучи простирающе, не забудите нас, чад ваших духовных, в нощи страстей и скорбей пребывающих, свыше благодатными призирати осиянии, яко да во стт добродетельнаго вашего жития право ходяще путем заповедей Христовых, сподобимся зрети свет неприступныя славы Божия, хваляще купно с вами, в Троице святей славимаго и покланяемаго Бога, Отца и Сына, и Святаго Духа в нескончаемыя веки. Аминь.