Молитвы святому благоверному князю Вячеславу Чешскому

Молитвы святому благоверному князю Вячеславу Чешскому
Тропарь святому благоверному князю Вячеславу Чешскому, глас 4-й

Днесь Ангели с человеки радуются вкупе общим веселием, Небо и земля светло ликуют в память твою, святе. И мы, грешнии, прилежно ти вопием: помолися к Владыце о нас, избавити ны от напасти видимых и невидимых враг, чтущих пресветлую память твою.

Ин тропарь святому благоверному князю Вячеславу Чешскому, глас 4-й

Благочестиваго корене отрасль пречестная, святый благоверный великий княже Вячеславе, поборник быв Восточныя в Чехах Церкве и прибежище теплое убогим и сирым, яко вторый Авель, незлобиве претерпел еси смерть, во главу усечен рукою брата пред враты церковными. Темже и всели тя Христос яко исповедника правыя веры во обители Небесныя, прослави всечестную память твою в словенских языцех и дарова тя скораго помощника всем, почитающим тя. Молися о людех твоих ко Господу, да обратит их в лоно Православной Церкве и спасет души наша.

Кондак святому благоверному князю Вячеславу Чешскому, глас 1-й

С лики Ангельскими предстоя, блаженне княже Вячеславе, наслаждаешися Божественныя и неизреченныя доброты и, оттуду благодетельныя дары почерп чудес, всем, притекающим верою под твою святыню, источавши цельбам дарование.

Величание святому благоверному князю Вячеславу Чешскому

Величаем тя, благоверный княже Вячеславе, и чтим святую память твою, ты бо молиши за нас Христа Бога нашего.

Молитва первая святому благоверному князю Вячеславу Чешскому
для обращения в веру неверующих родственников

О, святый благоверный княже мучениче Вячеславе, избранный воеводо земли Чешския и всех христиан словенских теплый пред Богом предстателю! Днесь, в память твою единодушно сошедшеся в честнем храме сем и пред иконою твоею умиленно молящеся, сице из глубины сердца нашего к тебе взываем: ты в житии твоем ревнитель и защитник Православныя веры был еси – и нас в ней теплыми твоими к Богу молитвами непоколебимы утверди. Ты великое возложенное на тя служение усердно проходил еси, и нас твоею помощию пребывати коегождо, в немже призван есть, настави. Ты супостатов полки от отечества твоего силою ратною и мудростию управительною отгнал еси, и на нас ополчающихся всех врагов видимых и невидимых низложи. Ты в пределах страны своея правду и мир и милосердие насаждати потщался еси, и нам от милостиваго Бога в сих добродетелех преуспеяние испроси. Ты безвинную кровь твою, аки Авель, от руки брата своего пред враты церковными пролиял еси, и нас, яко чада единыя Матере Церкве, братолюбию и кротости научи. О, великий и славный княже Вячеславе, ради вящшия славы Небесныя венец земнаго княжения оставивый и венцем мученическим праведно увенчанный! Ныне с мудрою наставницей, праматерию твоею Людмилою, и всеми святыми у Престола Божия предстоя, не забуди нас сирых и убогих, якоже в животе твоем никогоже от таковых оставил еси. И предстательством твоим житие тихое и безгрешное и к вечному царствию шествие устрой нам, да прославим Бога, дивнаго во святых Своих, Отца и Сына и Святаго Духа, ныне и присно и во веки веков. Аминь.

Молитва вторая святому благоверному князю Вячеславу Чешскому
о помощи в опасностях

О святый княже Вячеславе! Усердно просим тя молитися за ны (имена), да простит Господь Бог наши согрешения вольные и невольные и очистит нас от всякия скверны плоти и духа, да избавит нас от козней диавола и сохранит от клеветы людския, да утвердит нас в истинной вере и благочестии, да соблюдет от суемудрых и душетленных учений, да сохранит сердца наша от соблазнов мира сего и да научит огребатися* от плотских страстей и похотей, да тако горняя мудрствовати, а не земная, прославляя Единосущную Троицу во веки и в век века. Аминь.

Молитва третья святому благоверному князю Вячеславу Чешскому
для разрешения семейных конфликтов

О, великий воине Христов, святый мучениче княже Вячеславе! Призри от Горния славы на нас грешных, яда теплохладности вкусивщих. Молися о нас, святче Божий! Да сподобит нас Господь во дни апостасии благодать для покаяния стяжати, с состраданием на брата и с любовию на врагов взирати, без злобы святую веру в оправдание себе пред Богом в чистоте содержати. Да сподобимся твоими молитвами последняго Царя на Святей Руси от Господа прияти, с тобою наследниками Царствия Небеснаго стати: вечнаго познания творений Божиих и благостнаго славословия Пресвятой Троицы: Отца и Сына, и Святаго Духа, ныне и присно и во веки веков. Аминь.

Новые молитвы

Молитвы о самоубийцах

Ознакомиться

Молитвы за скончавшихся вне своего Отечества, за безродных и убогих

Ознакомиться

Молитвы за наставников и воспитателей

Ознакомиться

Молитвы за всякого усопшего

Ознакомиться

Молитвы об ослаблении вечных мук умерших без покаяния

Ознакомиться